#25 | Twa (3) mwayen pou metrize lang ou

 

Li atik sou menm sijè sa: Senk (5) peche lang ka lakoz ou fè

Metrize lang ou se donte li, pran kontwòl li, gouvène li, pa kite l di nenpòt sa ki vin nan lide ou. Se yon travay tout kretyen ki konsyan de frajilite li dwe fè. 

Malgre dife frajil, nou rive metrize dife ki nan yon recho pou kuit manje. Se konsa nou bezwen metrize lang nou pou onore Bondye, fè ak di sa ki byen (Som 19.14). 

1. Chwazi moman pou w pale

Bib la fè nou konnen gen yon lè pou chak bagay, yon "lè pou ou rete san pale, lè pou ou pale" (Eklezyas 3.7). 

Daprè Job 6.24, lè ou gen tò, ou ta dwe fè silans:"Bon. Pale avè m. Si m antò, fè m wè kote m antò a. Lè sa a, m a pe bouch mwen. M a koute nou". E pou yon moun ki pa konn chwazi moman pou l pale, ou ta dwe evite l paske "Bouch alèlè pa kenbe sekrè. Pa mele ak moun ki pale twòp"(Pwovèb 20.19). 

Gen moun ki kwè yo dwe pale tout sa yo konnen pou yo pa parèt ipokrit. Poutan, fè silans nan anpil ka se prèv diskresyon. 

Pa di tout sa w santi ka fè w pase pou lach men sa rele respè. 

2. Reflechi sou sa w ap di

Bib la di:"Pawòl moun ki di tou sa ki vin nan bouch yo se kout ponya. Men, pawòl moun ki gen bon konprann se remèd"(Pwovèb 12.18). 

Kretyen an bezwen reflechi sou sa l ap di paske li ka fasil blese san rann li kont e difisil pou mande padon. Daprè Efezyen 4.29, pawòl k ap sot nan bouch yon kretyen dwe edifye sila k ap koute li. 

Menm lè se blag, pawòl ou pa dwe bay manti ni blasfème non Bondye. 

3. Byen di sa w ap di

Kolosyen 4.6:"Lè n ap pale, di bagay ki pou fè yo kontan, ki pou enterese yo. Konn ki jan pou nou reponn chak moun." 

Pèsonn pa ka anpeche ou di laverite men gen yon fason pou di l. Pa janm bliye tout moun bezwen respè ou menmsi ou pa apresye yo. Bon jan ledikasyon fè ou respekte tout moun san ou pa zanmi yo pou sa.

Nou gen egzanp pwofèt Natan ki te desann li devan wa David ki te peche. Li pa t joure li paske li te wa. Avèk respè, li te ba li verite a.

Ou konnen lang ou ka lakoz gwo dega? Ou viktim de sa deja? Aprann metrize li pou yon lòt moun pa viktim de ou. Konsa, pawòl nou va sèvi pou fè tout moun k ap koute nou grandi nan konfyans yo nan Bondye.

Jerome Dorsonne Emerson