1) Paran an, lidè legliz la dwe chèche zanmi timoun yo. Konsa y ap pi lib pou di sa yo genyen kòm dezi.
2) Depi timoun nan kòmanse gen bon konprann fòk li gen yon kras libète. Libète pou l soti avèk zanmi l, rantre ayon lè granmoun yo fikse. Y ap bay mwens manti.
3) Fè yo plis konfyans. Montre yo sa.
4) Evite fè presyon sou yo legliz la kòmkwa pou nenpòt bagay se sanksyon. Plis prevni pase sanksyone.
Emmanuel Norcius
Lektè nan ATG17
Nan refleksyon mwen sou avni jèn yo nan Legliz, jodi 30 mas 2023 a, mwen te poze yon kesyon nan 2 gwoup WhatsApp pou m te jwenn opinyon lòt kretyen:"Kisa lidè yo (paran, responsab legliz) ta dwe fè pou ede jèn yo reyisi san yo pa oblije pran pòz yo se kretyen pandan y ap mennen vrè vi yo ankachèt?"
Se avèk plezi m ap pataje youn aprè lòt repons ki te plis konvenk mwen e k ap fè w reyalize pwofondè pwoblèm jèn yo ap sibi sitou nan sektè pwotestan an. Entansyon an senp: fè lidè yo itilize lòt estrateji pou ede jèm yo reyisi. Pa neglije pataje repons sa yo tout kote e bay tout lidè evanjelik yo.
______________________
Antanke jèn ki legliz k ap viv ak obsève sitiyasyon jèn yo. Mwen ka di pi gwo zam pou ede yo se lanmou ak egzanp. Sa ki fè yo wè lemonn pi bon pase Legliz se paske valè ki legliz yo pa parèt jan yo ta dwe parèt.
Egzanp, lè m ale legliz yo di m maryaj se bèlbagay. Poukisa fanmi yo pa ka mache? Poukisa pa gen lanmou ak respè nan mitan paran yo?
Poukisa lè m ale legliz yo di m padone, mache nan lanmou alòske toujou gen chire pit nan mitan ansyen yo?
Mwen panse pi bèl fòs pou ede lajènès la swiv Kris se lanmou ki dwe renye, egzanp ki dwe bay. Lè nou fè yon erè, fòk egzòtasyon yo fèt sou baz lanmou olye de jijman.
Sentespri konvenk kè moun men li itilize aksyon avèk pawòl nou.
Pou nou ede m ki se jèn, montre m valè nou yo pi bon pase sa ki deyò yo a.
Lanmou pa gen anyen ki malonèt, li gen pasyans, li gen bon kè, li pa egoyis, li pa chache parèt tèt li.
Nou se limyè, se nou ki ta sipoze klere ak valè nou yo.
Givischar FELIX
Lektè Bib nan ATG25 (EBP|10 sou 10)
Li dezyèm opinyon an: Opinyon Job
Bondye te kreye nou lib, gason kou fanm. Se akoz libète sa ki fè pèsonn pa fèt tou kretyen menmsi paran li ta sove. Chak moun lib pou kwè ak pa kwè nan Jezi.
"Moun ki kwè epi ki resevwa batèm va delivre. Men, moun ki pa kwè va kondane"(Mak 16.16).
Sepandan, lè ou kwè, sa vle di ou repanti de lavi ou t ap mennen nan sistèm monn lan (1 Jan 2.15-16). Ou resevwa Sentespri ki fè w vin piti Bondye, patizan Kris.
"Pou nou menm, nou p'ap viv dapre egzijans kò nou ankò, men dapre egzijans Lespri Bondye a, paske Lespri Bondye a nan nou. Si yon moun pa gen Lespri Kris la nan li, li pa pou Kris la "(Women 8.9).
Puiske ou pou Kris la, kò w pa pou ou ankò paske se avèk san li, nan lanmò li sou kwa a, Bondye te achte ou.
"Bondye achte nou kach, li peye chè pou sa. Se poutèt sa, sèvi ak kò nou yon jan pou fè lwanj Bondye"(1 Korent 6.20).
Fè lwanj Bondye nan kò w se fè tout sa k ap fè l plezi ladan. Pou sa, ou bezwen "Kouri pou dezòd lachè" (1 Korent 6.18).
Lòm divize nan 3 pati: kò, nanm ak lespri. Lè Bib la pale de kò, sitou nan 1 Korent 6.20 an, li pale de lavi ou. Sa vle di, kò ou montre lavi w ap mennen nan Kris la. Si w ap itilize l pou fè tèt ou oswa lòt moun plezi, li pa pou Kris la.
Alò, èske yon kretyen ka fè sa li vle nan kò li? Non. Okontrè, se fason yon moun ap mennen kò li ki fè yo ka rele l kretyen paske pa gen kretyen san sanntifikasyon.
Jerome D. Emerson
Bib la pa drese yon lis peche pou kretyen an ta konnen kisa pou l evite. Konsa, depi yon aksyon pa ekri nan Bib la (Nouvo Testaman sitou), li otorize. Yon tèl tandans t ap fè ansèyman, krentif ak sajès pa enpòtan. Paske, yon aksyon ka peche nan yon kontèks epi li pa peche nan yon lòt.
Egzanp, nan fiyansay, rapò seksyèl se peche alòske se yon byen nan maryaj. Se menm rapò a, men kondisyon matrimonyal la chanje l.
Yon minè kretyen peche lè li kite kay paran l pou jui libète li (tankou tigason ki te pèdi a) tandike lè li majè, li ka kite l pou jui menm libète a. Laj fè yon aksyon pa peche. Pakonsekan, se pa aksyon w ap fè yo ki peche answa, se entansyon ou, motivasyon ou, kondisyon li fèt la.
Alaverite, definisyon peche pa sifi pou konnen ni evite peche. Tankou apot Jan te ekri :
"Tout moun ki fè peche, se dezobeyi yo dezobeyi lalwa Bondye, paske peche se dezobeyisans lalwa"(1 Jan 3.4).
Nan ka sa a, se konesans lalwa ki pou aprann ou sa ki peche. E menm lè ou ta fin konnen aksyon ki peche, sa p ap anpeche ou peche puiske David te byen konnen Batcheba marye epi Ouri t ap mouri avèk lèt li te ba li a. Li pa t gen krentif pou Bondye nan moman an. Èv te tèlman konnen fui a entèdi, li te menm raple koulèv sa. Ananyas te konnen li pa t dwe manti. Salomon te konnen Bondye pa t vle fanm lòt nasyon. Yo pa t kite sajès gide yo, yo pa t krentif pou Bondye ki pi enpòtan pase konesans. Se krentif k ap ba w sajès pou konesans ka itil ou. Sinon, Pòl pa t ap di pawòl sa a:
Lè ou nan fè nwa, konesans pa ka anpeche ou peche. Ou pa gen limyè ki pou klere w. W a konnen kichòy men lògèy, rankin, imoralite, eskiz ap rann ou esklav sa ki mal. Se Jezikris ki pou klere w. E lè sa a, w ap kapab...
"Chache konnen sa k ap fè Senyè a plezi"(Efezyen 5.10).
Tout sa ki byen, bon, dwat, vre fè Bondye plezi. Tout sa ki montre renmen, konpasyon, padon, fè Bondye plezi. Li pa bezwen gwo pou l peche, ni piti pou w pa fè l. Bib la di:
"Se sak fè, kit n ap manje, kit n ap bwè, nenpòt kisa n ap fè, fè l pou sa sèvi yon lwanj pou Bondye"(1 Korent 10.31).
Sa ki pi enpòtan an se lwanj Bondye ap jwenn nan sa w ap fè a oswa di a. Se pa sa k ap fè w byen an, sa k ap deranje zanmi oswa sosyete a.
Pou fini, sèvitè Jak deklare:
"Se poutèt sa, moun ki pa fè byen li konnen li gen pou l fè a, li fè peche"(Jak 4.17).
Ou ka konn tout mal pou w pa fè men si w pa fè yon grenn byen, ou peche. Vrèmanvre, konnen sa ki peche pa anpeche w peche. Plis w ap sèvi Bondye avèk sajès, se plis l ap louvri je w pou w aprann fè lwanj li nan tout bagay. Se pa lè ou ret lakay ou, ou fè silans, ou izole tèt ou k ap fè w viv nan sanntifikasyon.
Depi ou se kretyen tout bon, Sentespri a ap dirije ou nan tout sa ki pou fè Bondye plezi. Se konsa, w ap konnen kilè w ap fè peche.
Jerome D. Emerson
Foto/Atik: fr.freepik.com
Kisa sove ye? Se yon kesyon ki merite byen reponn pou opinyon sou li pa kreye konfizyon. Annefè, yon pechè sove lè Jezi delivre li anba pouvwa peche. Alò, ki pouvwa peche genyen? Bib la reponn:
"Peche pa dwe donmine sou nou, paske nou pa anba pouvwa lalwa Moyiz la ankò, se anba favè Bondye a nou ye"(Women 6.14)
Lè Jezi sove nou, li pa sèlman padone peche nou yo (Lik 24.47; Travay 3.19), li delivre nou anba pouvwa peche. Sa vle di, peche pa ka defèt rezilta sakrifis Jezi a. Se sa ki fè, pi devan, nan menm lèt li te ekri a, apot Pòl pral di:
"Koulye a, nanpwen okenn kondanasyon pou moun ki fè yon sèl kò ak Jezikri"(Women 8.1).
Si e sèlman ou fè yon sèl kò avèk Jezi, peche pa gen pouvwa sou ou ankò. Men, kòman nou ka konprann yon moun ki sove epi k ap viv nan peche? Si ou sove nan peche, ou pa ka retounen viv ladan. Gen moun ki kwè sa men Bib la pa anseye sa. Lè ou sove, w ap mennen yon lavi apa pou Bondye (1 Tesalonisyen 4.3-4, 5.23).
Koute sa Bib la di:
"Nan kondisyon sa a, kisa n a di? Eske nou mèt kontinye ap viv toujou nan peche pou favè Bondye a ka vin pi plis toujou? Non. Sa pa ka fèt. Poukisa? Paske annegad peche nou mouri. Ki jan pou n ta ka kontinye ap viv toujou nan peche?"(Women 6.1-2).
Yon moun ka toujou panse li sove paske tradisyon fè konprann depi yo priye pou ou, ou batize nan dlo, ou sove. Reyalite a montre se pa vre, sove se rezilta repantans ak konfyans nan Bondye. Sila ki sove a ap mennen yon lavi tounèf nan Kris (2 Korent 5.17; Efezyen 5.8-9). Se pa yon relijye, se yon pechè ki vin pitit Bondye. Sou pwen sa, men sa apot Jan te ekri:
"Si yon moun se pitit Bondye li ye, li p ap kontinye fè peche, paske pouvwa lavi ki soti nan Bondye a ap travay nan li. Si se Bondye ki papa l, li pa kapab ap fè peche toujou"(1 Jan 3.9).
Levanjil klè sou kesyon peche ak sove. Se de bagay ki pa mache ansanm. Se tankou limyè ak fè nwa: se youn ki pou la, tou de pa ka nan menm espas. Yon kretyen se yon kretyen, li sove, li se pitit Bondye. Si l pa viv konsa, li pa sa. Men se pa sa li pa ye a ki pou eksplike l. Nou pa ka di chat pa yon chat paske li viv tankou chyen. Chat se chat, chyen se chyen. Chak gen karakteristik pa li. Youn pa ka pase pou lòt.
Konsa, Kris pa ka nan lavi ou epi pou peche ap domine ou. Ou pa ka sove epi an menm tan pou w ap viv nan peche. Sa ta vle di Jezi pa toupuisan puiske li pa ka menm sove w nan peche sou latè. Kòman l ap fè asire ou lavi aprè lanmò nan syèl la?
Nou bezwen chache plis konprann misyon ak pouvwa Jezi epi fè l konfyans. Se pa lòm ki te fè nou pwomès, se Bondye. Li te voye Jezi vin mouri pou nenpòt pechè sove. Ebyen, depi w repanti, ou mete konfyans nan li, konte sou sa li pwomèt ou.
Si Jezi k ap sove w la fè ou pwomès peche p ap kondane w, se sèten li p ap ka kondane w. Kontinye fè li konfyans.
Jerome D. Emerson
Foto/atik: www.croirelacroix.com
Wa ki te pi gran sou latè, pi saj e pi rich, Salomon te pote anpil pri pandan rèy li (970-931 AJK). Mete sou sa, li te gen pou li sèlman 1000 fanm: 700 madan marye ak 300 fanm kay (1 Wa 11.3). Sou baz yon ane 365 jou, Salomon t ap bezwen 2zan 9 mwa anviwon pou l kouche avèk yon fanm chak jou san kanpe.
Anpil gason kwè Salomon te ere anpil jis yo ta renmen suiv li men yo petèt inyore move kote nan lidèchip li tou. Li te enfidèl, idolat e se li menm ki te lakoz Izrayèl divize (1 Wa 11.11). Se akoz enfidelite ki fè li te rive gen tout fanm sa yo. Koute sa Bib la di sou sa:
Salomon te renmen ak anpil fanm ki moun lòt nasyon. San konte pitit fi wa peyi Lejip la, li te gen fanm ki soti nan peyi Moab, nan peyi Amon, nan peyi Edon, nan peyi Sidon ak nan peyi Et. Li te marye ak anpil fanm ki soti nan lòt nasyon, atout Seyè a te bay moun pèp Izrayèl yo lòd pou yo pa janm marye ak moun sa yo, pou yo pa janm kite yo mele ak yo, paske moun sa yo va pran tèt yo pou fè yo sèvi bondye pa yo. Men, Salomon te sitèlman renmen yo, li marye ak yo".(1 Wa 3.1-2)
Èske se paske Salomon te pitit Batcheba, madan Ouri papa l David te fè tiye ki fè li te vin renmen fanm konsa? Bib la pa reponn kesyon sa men pi gwo leson yon kretyen ka tire nan istwa sa parapò avèk Levanjil (Matye 28.20), se konsekans poligami an:
"Medam sa yo fè l [Salomon] vire do bay Bondye".(1 Wa 11.3)
Yon kretyen pa ka gen plizyè fanm paske pa gen poligami nan Levanjil. Se poutèt sa apot Pòl te di:
Men, sitèlman gen dezòd lachè deyò a, se pou chak gason gen madanm pa yo¹. Konsa tou, se pou chak fanm gen mari pa yo".(1 Korent 7.2)
¹ sa femme: français, singulier
Jerome D. Emerson
Anpil nan moun ki pa patizan Kris yo kenbe plizyè diskou pou dekouraje lòt moun sèvi Bondye. Pami diskou sa yo, "Levanjil pa pou ayisyen". Sou baz listwa depi sou lakoloni, yo vle fè konprann se blan ki te pote levanjil oswa Bib ba nou. Èske sa sifi pou ayisyen rejte Kris? Eske se vre Jezi pa t vin mouri pou ayisyen?
Men 10 vèsè ki ka ede w konprann verite a.
1. "Paske, Bondye sitèlman renmen lèzòm li bay sèl Pitit li a pou yo"(Jan 3.16).
👉 Lèzòm (le monde: français) enplike 5 kontinan yo. Jezi te vin mouri pou tout nasyon sou tout latè. Ayiti ladan.
2. "Ale fè disip pou mwen nan tout nasyon,.."(Matye 28.19).
👉 Aprè Jezi te vini, mouri, resisite, avan li te monte nan syèl, li te bay disip li yo misyon fè disip pou li nan tout peyi sou latè. Ayiti konte.
3. "Men, sa ki te resevwa l yo, sa ki te kwè nan li yo, li ba yo pouvwa tounen pitit Bondye"(Jan 1.12).
👉 Jezi te dwe vin nan yon peyi pou l te ka akonpli misyon li. Malerezman, yo pa t resevwa li nan peyi Izaryèl. Ebyen tout lòt moun nan nenpòt nasyon ki resevwa l ka vin pitit Bondye. Yo pa oblije juif.
4. "Koulye a pa gen diferans ant moun ki jwif ak moun ki pa jwif, pa gen diferans ant moun ki esklav ak moun ki pa esklav, ant fanm ak gason. Nou tout nou fè yonn nan Jezikri"(Galat 3.28).
👉 Granmesi Jezikri, Bondye gen yon sèl pèp ki se tout moun ki kwè nan Jezi. Se yo ki fòme Legliz Inivèsèl la.
5. "Men, lè Sentespri a va desann sou nou, n a resevwa yon pouvwa. Lè sa a, n a sèvi m temwen nan Jerizalèm, nan tout peyi Jide ak nan tout peyi Samari, jouk nan dènye bout latè"(Travay 1.8)
👉 Plan pou preche monn lan te fèt avan Jezi mouri. Se nòmal pou l te kòmanse yon kote men jiskaprezan gen peyi ki poko tande Levanjil. Kidonk, travay la fèk kòmanse.
6. "Men, Seyè a di li: Ale. Paske nonm sa a, mwen chwazi l pou sèvis mwen, pou l fè tout moun konnen non mwen, moun lòt nasyon yo ak tout wa yo ansanm ak pèp Izrayèl la"(Travay 9.15)
👉 Malgre Jezi te voye disip yo nan misyon nan lemonn, li te chwazi Pòl (Sòl) espesyalman pou fè sa.
7. " Paske pwomès la, Bondye fè l pou nou, pou pitit nou yo, pou tout moun ki byen lwen, pou tout moun Bondye, Mèt nou, va rele vin jwenn li"(Travay 2.39)
👉 Te gen moun lòt nasyon ki t ap tande Levanjil nan jou Pannkot la, pami yo Lejip ak Wòm. Pwomès Bondye a te pou yo tout ak pou ayisyen jodi a.
8. "Tout moun gen pou mouri yon sèl fwa, apre sa, Bondye gen pou jije yo"(Ebre 9.27)
👉 Se pa juif yo oswa ayisyen k ap mouri sèlman. Antanke kreyati Bondye, tout moun gen mouri, ayisyen ladann. Ebyen, jijman Bondye pou li tou.
9. "Tout moun ki pa t gen non yo ekri nan liv ki gen non moun ki gen lavi a, yo jete yo nan letan dife a tou"(Revelasyon 20.15).
👉 Tout moun, se pa tout juif, tout ameriken oswa oksidan. Bondye pa gade sou nasyonalite pou sove, enskri ak jije.
Achte liv Jerôme D. Emerson yo: Peze la
10. "Seyè a pa pran twòp reta pou kenbe pwomès li yo, jan kèk moun kwè a. Okontrè, se pasyans l ap pran ak nou, paske li pa ta renmen pesonn peri, li ta vle pou tout moun tounen vin jwenn li"(2 Pyè3.9).
👉 Se tout moun Bondye ap rele: afriken, ameriken, ewopeyen, aseanyen ak azyatik. Depi ou ka li mesaj sa a jodi a, ou tou tande apèl la. Jezi bezwen sove w.
Yon ayisyen ka toujou kwè Levanjil pa pou li paske Bondye te kreye tout moun lib. Dayè, nasyonalite juif oswa ameriken pa vle di yon moun tou sove. Fòk li kwè nan Jezi.
Ou gen yon kesyon? Poze li la
Jerôme D. Emerson
Gen anpil ka nan fwaye kretyen yo kote madanm yo ap sibi vyolans anba men mesye yo. Rezon yo anpil e se pa de yo n ap pale nan atik sa a. Sepandan, li enpòtan pou yon mari kretyen konprann chèf li ye pa ba li dwa fè vyolans sou madanm li. Paske, men sa ki ekri nan Bib la:
« Kounye a, pa gen diferans ant moun ki juif ak moun ki pa juif, pa gen diferans ant moun ki esklav ak moun ki pa esklav, ant fanm ak gason. Nou tout nou fe youn nan Jezikri » (Galat 3.28).
Vèsè sa a retire tout tandans negatif sou fanm nan fwaye. Fason istwa montre nou anpil fanm t ap jwenn tretman pa ka kontinye nan Kris akoz li te mouri pou rann tout moun lib. Pakont, libète sa pa anpeche wòl mari a ak madanm nan jwe nan respè. Se vre, se fanm nan ki pou soumèt devan mari li (Efezyen 5.22), men soumisyon sila pa vle di obeyi tankou yon esklav. Li de dwe fèt nan respè pou Kris la ki se chèf gason an :
« Se pou nou youn soumèt devan lòt pa respè pou Kris la » (Efezyen 5.21).
Ou vle poze yon kesyon pou n reponn? Peze la
Jérôme Dorsonne
Emerson
🔴 LAPRIYÈ
Majorite abitid ou genyen yo se pa ou ki te deside yo. Pafwa, se sikonstans, lòt fwa se perèz e lòt fwa ankò se neglijans. Ui, neglijans ak parès fè w ramase tout kalite abitid. E se yo menm ki fè w pa ka pran abitid ki nan avantaj ou.
Chak sa w pa vle fè se akoz yon lòt bagay ou gen abitid fè. Egzanp, si w pa gen abitid priye chak jou se paske w abitye fè yon lòt travay chak fwa pou w ta priye. Abitid gade seri anpeche w gen yon lòt abitid ki pi enpòtan pase rezilta w ap jwenn nan.
Eseye teknik sa yo pou w fè yon eksperyans nan lapriyè chak jou nan 7 jou k ap vini yo apati jodi a.
1. Fè l nan moman ou sonje a
Depi w sonje priye, fè tout sa ki posib pou priye. Pa prevwa anpechman, w ap bloke tout motivasyon. Menm jan w ka mande pèmi pou fè bezwen, sonje fè sa pou priye. Lesansyèl, pa bay eskiz.
2. Pèsonn pa bezwen wè ni tande
Fè moun konnen w ap priye pa enpòtan. Ou p ap preche ni evanjelize. Se avèk Bondye w ap pale. Menm jan w pa vle koze sekrè w pran lari, jere kominikasyon ou avèk Bondye nan lye sekrè a.
3. Ou pa oblije pale anpil
Wi, koze de moun ki bon zanmi pa janm fini e youn pa repouse lòt pou jan yo alèz. Youn pa bezwen pale anpil pou lòt la konnen bezwen li. Lè pou dyalòg yo long, se sanzatann. Konsa, li posib pou pale avèk Bondye plizyè fwa nan yon jounen. Demann ou an pa oblije long, yon sèl fraz konn sifi chak fwa bouch ou louvri.
4. Kous pa ladan
Non, ou pa nan kous avèk pèsonn. Se menm Bondye a k ap tande tout moun sou latè beni. Se pa sila ki pi rapid oswa ki fè plis tan an li reponn. Fè l konfyans.
5. Volonte Bondye pi enpòtan
Yon demann rete yon demann. Kondisyon an se konfyans. Prensip la se pasyans ak pèseverans. Li pi enpòtan pou ou konnen sa Bondye vle pase ou jwenn sa w vle. Lasante miyò pase pase lajan pou achte medikaman.
Jerome Dorsonne Emerson
Foto/atik: EMCI TV
Li atik sou menm sijè sa: Senk (5) peche lang ka lakoz ou fè
Metrize lang ou se donte li, pran kontwòl li, gouvène li, pa kite l di nenpòt sa ki vin nan lide ou. Se yon travay tout kretyen ki konsyan de frajilite li dwe fè.
Malgre dife frajil, nou rive metrize dife ki nan yon recho pou kuit manje. Se konsa nou bezwen metrize lang nou pou onore Bondye, fè ak di sa ki byen (Som 19.14).
1. Chwazi moman pou w pale
Bib la fè nou konnen gen yon lè pou chak bagay, yon "lè pou ou rete san pale, lè pou ou pale" (Eklezyas 3.7).
Daprè Job 6.24, lè ou gen tò, ou ta dwe fè silans:"Bon. Pale avè m. Si m antò, fè m wè kote m antò a. Lè sa a, m a pe bouch mwen. M a koute nou". E pou yon moun ki pa konn chwazi moman pou l pale, ou ta dwe evite l paske "Bouch alèlè pa kenbe sekrè. Pa mele ak moun ki pale twòp"(Pwovèb 20.19).
Gen moun ki kwè yo dwe pale tout sa yo konnen pou yo pa parèt ipokrit. Poutan, fè silans nan anpil ka se prèv diskresyon.
Pa di tout sa w santi ka fè w pase pou lach men sa rele respè.
2. Reflechi sou sa w ap di
Bib la di:"Pawòl moun ki di tou sa ki vin nan bouch yo se kout ponya. Men, pawòl moun ki gen bon konprann se remèd"(Pwovèb 12.18).
Kretyen an bezwen reflechi sou sa l ap di paske li ka fasil blese san rann li kont e difisil pou mande padon. Daprè Efezyen 4.29, pawòl k ap sot nan bouch yon kretyen dwe edifye sila k ap koute li.
Menm lè se blag, pawòl ou pa dwe bay manti ni blasfème non Bondye.
3. Byen di sa w ap di
Kolosyen 4.6:"Lè n ap pale, di bagay ki pou fè yo kontan, ki pou enterese yo. Konn ki jan pou nou reponn chak moun."
Pèsonn pa ka anpeche ou di laverite men gen yon fason pou di l. Pa janm bliye tout moun bezwen respè ou menmsi ou pa apresye yo. Bon jan ledikasyon fè ou respekte tout moun san ou pa zanmi yo pou sa.
Nou gen egzanp pwofèt Natan ki te desann li devan wa David ki te peche. Li pa t joure li paske li te wa. Avèk respè, li te ba li verite a.
Ou konnen lang ou ka lakoz gwo dega? Ou viktim de sa deja? Aprann metrize li pou yon lòt moun pa viktim de ou. Konsa, pawòl nou va sèvi pou fè tout moun k ap koute nou grandi nan konfyans yo nan Bondye.
Jerome Dorsonne Emerson
🔴 Plan
Lang se yon ti ògàn ki plase nan bouch lòm. Li fè li pale e li ka santi plizyè kalite gou tankou sale, sikre, pike, elatriye. An menm tan, lang gen pouvwa. Li ka fè byen ak mal.
Bib la di: "Menm bouch la bay benediksyon, li bay madichon tou. Frè m yo, sa pa dwe fèt konsa"(Jak 3.10).
Ebyen, men 5 peche oswa fason ou ka mal itilize lang ou.
1. Manti
"Pa bay frè nou yo manti. Paske, nou voye vye moun nou te ye a jete ansanm ak tout vye mès li yo"(Kolosyen 3.9).
2. Blasfèm
"Tout moun ki pale mal sou Moun Bondye voye nan lachè a, y a padonnen yo. Men, moun ki pale mal sou Sentespri a yo p ap padonnen yo sa"(Lik 12.10).
3. Joure
"Pa kite ankenn move pawòl soti nan bouch nou. Pale bon koze ki ka ede lòt yo grandi nan konfyans Bondye, koze ki ka ede yo lè yo nan move pa. Konsa, se yon byen n a fè pou moun k ap tande nou yo"(Efezyen 4.29).
4. Flate
"Moun konsa, se pa Kris la, Seyè nou an, y ap sèvi. Se vant yo y ap sèvi. Y ap bay bèl pawòl, y ap fè bèl diskou pou achte figi moun. Se konsa yo pran tèt ti inonsan yo"(Women 16.18).
5. Medizans
"Frè m yo, piga nou yonn pale lòt mal. Moun ki pale yon frè mal, osinon ki jije frè li, se lalwa li pale mal, se lalwa li jije. Si w ap jije lalwa, ou pa yon moun k ap obsève lalwa, men ou pran pòz jij ou sou li"(Jak 4.11).
Jerome Dorsonne Emerson
.jpeg)
Fèt Pak kretyen raple lanmò Jezikri, rezireksyon li ak retou li pou vin chache vrè patizan li yo (1 Tesalonisyen 4.15-18). Se granmesi lanmò sa a tout moun ki vin kretyen lib. Men, nan ki kalite esklavaj yo te ye? Kòman yo vin lib? Ki sans sa genyen pou ou?
Koute sa Bib la reponn: "Nou delivre anba peche. Koulye a se esklav sa ki byen nou ye."(Women 6.18)
Kretyen an libere anba pouvwa peche, sa vle di peche pa ka kondane li ankò (Women 8.1). Pou li mennen yon vi sanntifye, li pa ka kontinye viv ladan tankou san Kris la ba li libète fè sa li vle. Non, li tounen esklav jistis (sa ki dwat), li dwe fè sa ki byen (Efezyen 5.9) konparativman avèk zèv li nan fè nwa (Galat 5.19-21).
Libète kretyen an genyen an pa libètinay ki ta ka otorize li fè sa li pito san teni kont prensip evanjelik yo. Lè ou se pitit Bondye, ou gen vrè libète a (Jan 8.36). Ou p ap itilize li pou suiv dezi chanèl ou, mennen move lavi ankachèt (Galat 5.13; 1 Pyè 2.16). Ou lib pou chwazi men w ap chwazi sa k ap fè Bondye plezi (1 Korent 6.12, 16-20).
Nenpòt moun ka kwè li soti anba pouvwa peche. Dayè, se pou sa Jezikri te vin mouri. Men si l ap mennen yon lavi ki kontrè avèk pawòl Bondye a, li poko libere toutbon.
Jerome Dorsonne Emerson
Konsa, si ou pran plezi nan fè neglijans, se ka prèv Bondye pa ba ou anvi fè sa li vle. Sa ta vle di li p ap viv nan ou. Men 3 pami neglijans ki ka montre w sa.
1. Bay manti pou jwèt
Gen moun ki pran plezi nan bay manti. Li santi l alèz e li fè nenpòt moun sa. Jwe avèk yon peche konsa montre ou pa gen krentif pou Bondye. Satan ka itilize w fasil pou twonpe moun. Bib la di:" Pa bay frè nou yo manti. Paske, nou voye vye moun nou te ye a jete ansanm ak tout vye mès li yo"(Kolos 3.9).
2. Neglije li Bib la
3. Bliye priye souvan
Yon pitit Bondye gen relasyon avèk Bondye. Akoz tout kalite rekèt li chak jou, l ap bezwen priye. Bliye priye vle di relasyon ou pa twò enpòtan, ou gen lòt priyorite. Ò, Bib la ankouraje nou priye tout tan (1 Tesalonisyen 5.17).
Ou neglijan lè ou pa pran swen oswa fè yon bagay jan ou te dwe fè l. Koulye a, mezi 3 sa yo ka ede ou dekouvri lòt neglijans nan lavi w ap mennen nan Kris la.
Jerome Dorsonne Emerson
Foto/Atik: SANTE MAGAZINE
Li difisil pou w pa jwenn yon manm oswa yon gwoup nan yon legliz ki nan kont. Soti nan klas timoun, pase nan lajenès rive nan granmoun yo, e menm nan nivo komite, w ap jwenn yon konfli.
Pami konfli sa yo, genyen tout moun konnen. Gen lòt se gwoup la e lòt ankò se 2 ènmi yo ki ka fè w dekouvri sa. Nenpòt dimansyon yon konfli ta pran, chak moun ki konsène ta dwe reflechi sou 5 pwen sa yo:
1. Sèvi Bondye se yon konba
Tout kretyen k ap li Bib konn sa: n ap batay kont yon ènmi ki pa vizib (Efezyen 6.11). Poutan, li itilize nou pou detui nou ankò. Si kretyen se frè ak sè, yo pa ta dwe nan kont youn avèk lòt paske yo se sòlda nan konba espirityèl la.
2. Moun ki renmen pa fè ènmi
Renmen fratènèl la se youn nan kondisyon pou konnen vrè sèvitè Bondye (Jan 13.35). Youn fè lòt ènmi tou montre pa gen yon vrè renmen.
3. Nou youn bezwen lòt
Pou nenpòt rezon ou ta ènmi yon frè oswa yon frè ou, li ka itil ou yon jou. Dayè, si li ka ènmi w, se paske li jwe yon wòl nan egzistans ou. Nou pa dwe janm chache fè ènmi moun nou ka bezwen.
4. Levanjil preche rekonsilyasyon
Rekonsilyasyon se baz levanjil la menm. Se sa Jezi te vin fè ant nou avèk Bondye akoz peche (Women 5.10). Antanke kretyen, nou la pou kontinye jwe wòl sa a nan lemonn. Alò, kòman sa ap fè posib si frè ak sè nou deja ènmi nou?
5. Lapriyè nou p ap efikas
Youn nan kondisyon pou Bondye tande lapriyè nou se lè n ap viv byen ansanm (Matye 18.19). Pakonsekan, fè ènmi pa nan avantaj kominyon nou.
Apati jodi a, ou menm k ap li mesaj sa a ta dwe panse de fwa avan ou fè yon ènmi. Ou ta dwe panse plizyè fwa sou ènmi ou ta gen deja paske levanjil dwe fèt nan bon zanmitay.
Jerome Dorsonne Emerson
Foto/Atik: Foto: iStock
Tout kretyen bezwen benediksyon, menm sila ki p ap sèvi Bondye e ki konn menm joure li. Benediksyon sa a ka materyèl oswa espirityèl.
Gen plizyè mwayen ou ka resevwa yo, youn ladan yo se yon prensip nou jwenn nan deklarasyon Jezi te fè fanm ki t ap di Bondye beni Mari, manman li, paske li te pote li nan vant epi ba li tete.
"Moun ki koute pawòl Bondye epi ki mete l an pratik, se yo menm Bondye beni (Lik 11.28).
Ou sèten ou bezwen benediksyon Bondye? Mete sa li di an pratik.
Jérôme Dorsonne Emerson
Tout kretyen konnen Bondye se yon lespri. Sa vle di, ou pa ka wè li men li egziste. Gen moun ki kwè li se yon fòs men Bib la montre li se kreyatè monn lan ak tout sa ki ladan. Yon fòs pa ka kreye. Li ka fè yon moun kreye. Kifè, Bondye gen fòs, tout pwisans menm. E se sa ki eksplike omnisyans, omniprezans ak omnipotans li.
Pa gen kote ou ye, sa w ap fè, sa w panse Bondye pa konnen. Youn nan rezon ki ka fè w doute se pinisyon ou pa jwenn touswit. Se paske Bondye gen pasyans, l ap tann ou repanti (2 Pyè 3.9).
Gen moun ki di Bondye konnen, li konprann, l ap padone m, li wè m pa kapab. Se vre, men Jezi di: "Vini jwenn mwen, nou tout ki bouke, nou tout ki anba chay, m a soulaje nou" (Matye 11.28)
Alò, si peche w yo pa twòp pou ou, sa vle di yo bon pou ou. Nan ka sa a, ou pa bezwen Jezi soulaje w. Ou mèt tann jijman Bondye men ou t ap pi entèlijan si w te repanti jodi a paske Bondye vle pou w chanje, sove epi glorifye non li nan panse w, pawòl ou ak aksyon ou.
Men 2 vèsè ki ka montre w Bondye wè tout sa w ap fè:
1. "Ki bò mwen ta ale pou m pa jwenn ak ou? Ki bò mwen ta ale pou ou pa wè m devan je ou?(Sòm 139.7).
2. "Anyen pa kapab kache pou Bondye. Tout bagay nan kreyasyon Bondye a aklè konsa devan je l, san anyen pa kouvri yo. Nou menm tou, nou gen pou nou rann li kont pou tou sa nou fè"(Ebre 4.13).
Jerome Dorsonne Emerson
Foto/Atik: monnaie magazine
Yo pa achte respè e pèsonn pa oblije moun respekte l. Dayè, chak moun dwe travay e viv pou fè yo respekte l. Kou nou konn di l: Respekte tèt ou si w vle yo respekte w.
Montre yon moun ou respekte l alòske se pa vre, se tankou w aji antanke yon esklav. Esklav la pè mèt li lè li la, men kou l vire, li aji tankou moun lib. Pa ka di an prezans yon moun sa w ap di dèyè l pa rele kouraj, sa rele feblès ak tout kalite non ou te ka ba li.
Men kat kote ou ka konnen si w respekte yon moun: paran w, frè ak sè w, pitit ou, konjwen oswa fiyanse w, zanmi oswa yon pèsonaj.
1. Nan piblik
Bon ledikasyon mande pou n pa atire twòp rega sou nou lè n ap pale e aji. Konsa tou, rad n ap mete dwe konfòm pou evite kritik menmsi dèfwa li inevitab paske chak moun gen gou pa yo.
Si w respekte yon moun, fò w montre sa devan tout moun. Pa imilye l an piblik, epi aprè pou w al pale ak li an prive. Li fasil pou yo kwè sa w di devan tout moun menmsi se pa vre. E se sa k fè, laprès, trak ak rezo sosyal yo konn fasilite sal non moun nan bay manti ak enfòmasyon ki pa ka verifye. E li difisil pou w demanti sa ki fin di an piblik. Moun ki kwè ap kwè, sa ki pou pa kwè pap kwè. Pou rezon sa, ou dwe evite di e pataje enfòmasyon ou pa ka verifye. Fò w pa konfonn sa w panse de yon moun, sa lòt moun, ki ka enmi l, panse de li ak sa moun nan ye li menm nan reyalite a.
Pa bliye: Moun ou avili oswa ki avili w an piblik pa zanmi w!
2. An prive
Bay yon moun tout respè li merite an piblik epi devalorize l an prive se ipokrizi. Ou montre li enpòtan pou ou devan moun men lè w avè l, se dènye moun ou swete pale. Pa t gen anyen ni pèsonn ki te fòse w respekte l. Si w fè sa ak tout ou menm, fè l tout kote. E si w konnen ou ka jwenn yon moun apa, pa pwofite lè li ak moun. Ou ka sezi wè se tèt ou ki sibi sa w te vle fè a.
Pa bliye: Rad sal lave nan fanmi.
3. Nan prezans li
Gen moun ki konn pwofite akize moun pandan yo anfas yo. Non, sa ka rive w gen gwo pwoblèm avè yon zanmi, si w respekte l se pa nan mitan moun pou w regle koze avè l. Dayè, sa te pase ant nou de epi tou, lòt moun k ap swiv ou ka evite vin zanmi w paske w ka fè yo sa tou. Bay tout moun ki mérite respè lè li la, se pi bon okazyon an. Pa tann lè l mouri pou w montre w te respekte l. Pafwa, gen moun ki pa tap mouri bonè si yo te konn sa yo vo lè te vivan.
Pa bliye: Respekte yon moun pa vle di w abese w devan l. Se valè ki bay valè valè.
4. Nan absans li
Dèfwa, zanmi an vin lakay ou, li nan baz ou, li nan chanm ou, li avèk zanmi w, ou ri avè l, bay blag, anbrase l, fè l santi l byen. Epi kou l vire, ou kòmanse pale l mal. Non, sa pa rele respè. Bèl dan lè nou kwaze, lè n ap pale nan telefòn, lè n rankontre nan yon randevou, yon aktivite piblik: antèman, maryaj, gradyasyon, inogirasyon, match foutbòl, elatriye. Men kou entèl vire, sijè a devlope sou li. Non, sa pa rele respè.
Pa bliye: Bon zanmi pa pale zanmi l mal dèyè do l.
Moun ki pa respekte w pa renmen w.
Moun ki pa respekte w pa bezwen w.
Moun ki pa respekte w pa ba w valè.
Èske w t ap santi w alèz pou w fin pale avè m epi kou w vire, m tanmen di vye pawòl sou ou?
Si se wi, repanse respè w dwe gen pou moun. Si se non, sonje: Sa w pa vle yo fè w pa fè lòt li paske sa w fè se li w wè.
Jérôme Dorsonne Emerson
® 7 avril 2019
Foto/Atik: Joseph Mandour
Gen omwen twa bagay ki ka fè ou kwè yon verite oswa yon manti. Se konesans, konfyans ak inyorans.
KONESANS: Depi w konnen, ou ka kwè lè w ap tande oswa li sa ki konfòm avèk li. Sepandan, se pa paske 100 moun di yon sèl pawòl ki fè li verite. Sinon, ate yo t ap sifi pou pwouve egzistans Bondye pa vre.
KONFYANS: Nivo konfyans ou fè yon moun ka fè w kwè fasil nan aprantisaj li oswa deklarasyon li. Se sa ki fè plis moun twonpe: yo kwè san reflechi. Se sa nou ka rele fanatis tou.
INYORANS: Moun ki pa konnen ka toujou kwè nan tout sa li tande. Sitou si se yon nouvote. Inyorans ka fè w pa gen ase agiman pou refize. Tout sa ki parèt mèveye, enpansab se verite.
Kwayans ou pa verite
Se pa sa ou kwè ki verite a, se verite ki verite. Kwayans ou se repons ou, reyaksyon ou, enpòtans ou bay verite ak wòl li jwe nan egzistans ou. Kwè Jezi pa Bondye pa fè li pa Bondye. Kontrè a valab.
Kwè vle di: M pran sa w di a pou verite. Kifè, li pa fòseman verite men pou mwen li se verite.
Libète ak kwayans
Tout moun lib pou yo kwè. Yo ka pran verite pou manti, manti verite. Men manti p ap janm verite ni verite vin manti. Nan yon sèten nivo, se prèv ki konfime verite. Se sa ki fè anpil moun pa kwè nan Jezi: pa gen prèv. Sepandan, se pa tout verite ki mande prèv. Osinon, pou kèk prèv, fòk ou nan reyalite a tankou moun ki gen pou pase nan dènye jijman an, se lè sa y a konn verite a.
Nou dwe evite konfonn verite ak kwayans nou. Yon kwayans ka lakoz ou peri menm jan avèk yon verite. Fè atansyon avèk sa ou kwè pou manti pa pi gwo verite pou ou.
Verite ak relijyon
Si w ap suiv yon relijyon, li posib pou w gen anpil kwayans sou divès doktrin men si se Kris w ap suiv, l ap fè w dekouvri verite a(Jan 8.31-32).
Levanjil pa anseye sa ou kwè. Pito, se ou ki kwè nan sa Levanjil anseye.
Jerome D. Emerson
Foto/Atik: Shutterstock
Nan de pwochen liv mwen ki pral soti sou tit "Konprann wòl gason nan fwaye" ak " Konprann wòl fanm nan fwaye", mwen fè yon pledwari pou gason ak fanm kretyen yo chache konnen, konprann epi byen jwe wòl yo nan fwaye yo pou otorite gason sispann yon fòm pou abize pouvwa e pou soumisyon fanm sispann yon wòl pou desann valè yo.
Men kèk agiman, si nou etidye byen nan Bib la, ki ka fè gason yo konprann valè fanm ak respè yo merite nan travay yo.
1. 1. Premye fanm Bondye te kreye a te pou
akonpanye premye gason an ki te pou kont li (Jenèz 2.18).
2. 2. Se nan vant yon fanm Jezi te vini sou latè
(Matye 1.18)
3. 3. Eskrib yo ak farizyen yo t ap fè konplo
pou kondan222e yon fanm yo te siprann nan adiltè. Yo te mennen li epi kache
gason an. Jezi pa t kondane li (Jan 8.1-11).
4. 4. Nan Ansyen Kontra a, mesye yo te kite kè di fè yo repidye madanm yo pou nenpòt detay (Detewonòm 24.2-5). Jezi te chanje sa nan ansèyman li pou madanm yo te sispann sibi enjistis(Matye 19.1-9).
5. 5. Nan Ansyen Kontra a ankò, yon sèl gason
te ka gen plizyè madanm. Pou ezanp ki plis konnen se wa Salomon ki te gen mil
pou kont li ase pandan youn ladan yo pa t ka gen de (1 Wa 11.3). Apot Pòl pale sou
sa chanjman ki te fèt nan lwa Kris la : yon gason, yon madanm (1 Korent
7.2).
6. 6. Apot Pòl konpare madanm yo avèk legliz Jezikri a pou montre enpòtans soumisyon li (Efezyen 5.22-23).
Jérome D. Emerson
Foto/Atik: Unsplash / Christina@wocintechchat.com
JJ
Yon disip se yon elèv. Antanke elèv, li gen yon mèt k ap ba li leson. Yon leson se yon enstriksyon, yon konsèy oswa yon lòd. Nan sans sa a, li bezwen kiltive 3 kalite:
1️. KOUTE
Aprè Jezi te fin pale sou parabòl nonm k ap simen an, li te di disip yo konsa:
《Koulye a, koute. Men sa parabòl moun ki t ap simen an vle di.》 (Matye 13.18).
Pwiske Jezi pa la ankò, nou ka li Bib la pou n tande sa li t ap di yo. Nou ka tande disip li yo tou k ap anseye nou. Yo se anseyan, pastè, evanjelis, predikatè, monitè lekòl dimanch, pou n site sa yo sèlman.
2️. POZE KESYON
Plizyè fwa, disip yo poze Jezi kesyon sou sa yo ta renmen konnen oswa pa fin konprann:
《 Jezi te chita sou mòn Oliv la. Disip li yo te pou kont yo avèk li. Yo pwoche bò kote l, yo mande li: Manyè di nou kilè sa va rive? Di nou ki siy ki va fè nou konnen lè w ap vini an, lè tan sa a va fini nèt?》(Matye 24.3).
Lòt rezon ki ka fè yon disip poze kesyon se pou li gen plis asirans sou sa li kwè.
3️. PRATIKE
Disip Jezi yo te santi yo renmen li menm jan avèk ou jodi a. Men Jezi te vle fè yo konnen santiman renmen an pa sifi:
《Si nou renmen m, se pou n obeyi kòmandman m yo.》(Jan 14.15).
Pa gen disip san mèt. Douz premye yo te gen Jezi (Matye 4.19), Pòl te jwenn leson nan men Jezi tou (Galat 1.12). Premye disip nan jou Pannkot la te gen apot yo pou mèt (Travay 2.42).
Pou ou kiltive kalite sa yo, chak kretyen dwe asire li l ap li Bib la oswa tande pawòl la pou li ka aprann. Lè li pa konprann, li bezwen kesyon e finalman, sa ki pi enpòtan an, se mete pratike sa li kwè yo.
Jerome D. Emerson
Sou baz tèks sa a, Bib la oswa Levanjil rekonèt yon kretyen ki gen Sentespri e non yon kwayan ki te konvèti e batize nan dlo san yon reyèl repantans. Toutotan mo "kretyen" an gen sans "manm yon legliz lokal" gen anpil verite nou p ap janm ka aksepte. Paske, yon kretyen se yon moun Kris la ap viv nan li. Kòman yon demon ka fè abite nan li an menm tan?
Pou ale pi lwen, petèt, sa ki ta demon an se yon maladi yon espesyalis ta dwe dyagnostike, tankou ISTERI (Hysterie) ki ka bay kriz emosyonèl, pètkonesans, koma, enkapasite pou pale.
N ap remake se plis fi sa touche pase gason. Listwa fè referans de sa nan lane 1900 yo avan Jezikri nan yon papiris. Trè souvan, fi ki bay sentom sa yo konn sibi maltretans, vyolans oswa vyòl nan adolesans yo. Kidonk, anpil ka demon konn isteri. Se sa ki fè li toujou bon pou moun ki posede a konsilte medsen avan li lage li nan lapriyè ak jèn.
Alò, biblikman, daprè bon jan ansèyman sou Sentespri (nematoloji), èske demon ka posede yon VRÈ kretyen? Non.
Ou gen yon kesyon? Yon sijesyon? Yon temwanyaj? Pataje l nan kòmantè a.
Jerome Dorsonne Emerson
.jpeg)
Kesyon li poze a enpòtan men sa pa jistifye konpòtman li anvè pitit li a. Menm jan ak tout moun, nou chak bezwen yon eskiz pou jistifye sa nou di, sa nou fè e sa n pa vle di e pa vle fè. Nou kanpe dèyè eskiz la rèd tankou ke makak. Pafwa, nou konn prè pou n pèdi zanmi nou, travay nou, kite legliz la pou montre nou gen rezon.
Lè w se kretyen, tout moun vle ou viv tankou kretyen. Yo egzije ou sa yo p ap fè e yo vle ou fè tout sa yon kretyen dwe fè. Angwo, yo vle ou san defo, san mank. Poutan, atout ou fè anpil efò, yo toujou jwenn yon fay, yon ti detay, yon ti dout, yon lojik, yon istwa pase, yon kesyon pou yo montre ou pa fè ase, ou pa sa, ou sou blòf, ou se yon fo, ou sou kou.
Yo gen pou di sa ou pa di. Y a pran sa yo panse pou yo di sa ou di. Y a di sa yo panse sou sa ou fè e y ap tòde, detounen, defòme tout sa ou di. Mwen garanti ou, batay pou ou fè tout moun plezi a enposib.
Yon modèl: timoun, jèn oswa gran moun se yon moun ki se yon egzanp pou swiv oswa tout moun dwe swiv. Se yon moun ou ka imite: ou fè sa li fè. Se yon moun ki ka enspire ou, ankouraje ou nan pouswiv rèv ou. Nan sans sa, chak moun gen yon modèl ki mouri oswa vivan.
Jezi te yon modèl pou apot Pòl. Pòl te yon modèl pou Timote e Timote te dwe viv pou li te yon modèl pou fidèl yo.
Kilès ki modèl ou antanke timoun? Jèn? Gran moun? Kilès ki modèl ou Legliz ou? Lekòl ou? Nan peyi a? Nan zòn w ap viv la? Nan metye w ap pratike a?
Eske ou konnen menm jan w ap chache youn modèl sa yo, gen moun k ap swiv ou, ki pran ou pou modèl? Genyen k ap kritike ou tou paske ou pa modèl pou yo? Se nòmal paske ou pa pafè.
Eske ou te konnen menm jan ou wè yon moun se konsa gen lòt moun ki wè ou tou? Ou pa t janm panse si gen moun k ap egzije ou menm jan w ap egzije lòt moun tou?
E si ou te yon modèl tou? E si ou te modèl èske ou t ap yon modèl? Ou t ap yon bon oswa yon move modèl? E pouki w pa yon modèl? Paske ou pa kapab? Ou pa vle? Sa difisil? Li enposib? E poukisa ou vle yon lòt la vin yon modèl ou pa ka ye? Ou vle li fè sa ou pa ka fè?
Pandan w ap chache repons yo, men sa ou pa dwe janm bliye: moun ou wè ki nan plas li ye a bezwen sipò ou, konpreyansyon ou ak tolerans ou. Se sa ou menm ou bezwen nan plas ou ye a tou.
Souvan, lè n ap gade match la, nou wè tout sa jwè a te dwe fè men lè nou sou teren an, nou pa konn ki kote pou nou kanpe e dèfwa, nou fè pi mal pase jwè nou t ap kritike a. Vrèmanvre, bouch toujou di sa men pa ka fè. Pye bezwen ale kote kè l pa ka rive. Zòrèy bezwen tande pawòl bouch pa ka repete.
Lavi ka bèl si nou youn chache konprann lòt! Gen twòp rayisans nan monn lan ki kreye jalouzi, mechanste, grangou, ensekirite ak krim. Ou menm ki sot li tèks sa, evite fè pati sila k ap ogmante ak ankouraje mal. Pou fè sa, ou bezwen vin yon modèl!!!
Jérôme Dorsonne Emerson
@Avril 2019
Ede yon moun se fasilite l fè yon travay, jwenn sa l bezwen oswa akonpli yon misyon. Konsa, n ap konprann lè Bondye te di:"Seyè a, Bo...
