#44| Kisa pou m fè pou m kite peche sa a?

 

Plizyè repons posib men n ap konsantre nou sou yon sèl ki dwe nan tout: deside.

Pou rekonèt yon peche, konfese, repanti oswa kite li, ou bezwen DESIDE.

Ou ka panse se Bondye ki dwe fè ou kite l oswa pran konsyans. Sitou, lè ou estime ou fè tout sa ki posib san siksè. Men anreyalite, kite peche depann de ou avan. Fòk ou deside, ou vle, ou dakò. Se volonte ou k ap ede ou pase tout lòt etap ak sakrifis yo. Bondye gen KAPASITE a men se nan ou CHWA a, DESIZYON an ye. Li vle sove ou men se pa kont volonte ou. Li gen SALI a, ou gen KONVÈSYON an. Li mete BATÈM nan, se nan men ou KONFYANS lan ye pou resevwa li. 

Deside se detèmine sa ou dwe fè. Alò, kisa ou vle fè? Mwen vle kite peche. Imedyatman dezi sa nan ou, pawòl Bondye a ka travay nan ou paske konnen yon aksyon, yon konpòtman, yon estil, yon move pawòl se youn e sa depann de konesans ou, entèlijans ou. Gen peche ou rekonèt granmesi lekti biblik, etid biblik, teyoloji ak seminè. Men, pa fè sa ou konnen ki se peche a se de (2). Nou pa dwe konfonn ENTÈLIJANS Bondye ban nou ak VOLONTE pou nou DESIDE fè sa sèl KONFYANS ap pèmèt (2 Korent 5.7). 

Nan faz pou w deside, sa ki pi fasil yo se bay eskiz ak akizasyon. Ou pa vle dakò ou responsab, w ap chache yon moun pou pote chay la. Lè ou ta pran konsyans, ou mete pou pita sa ou dwe fè tousuit.

Zache pa t tann Jezi ale, li te fè tout sa li te dwe fè nan prezans li. Konsa tou, pandan w ap li mesaj sa a, si ou rann ou kont ou gen yon peche ou dwe kite, se koulye a pou w kòmanse. Pa gen anyen ki asire ou pita, demen, lòt semèn oswa lòt ane w ap gen tan. 

Anpil moun kwè Bondye fikse yon jou pou retire yo nan peche. Sa fè yo kontinye panse si yo toujou ladan, se paske jou a poko rive. Poutan, se yo ki pou deside. Si se jodi a ou konnen w ap viv nan peche, se jodi a Bondye vle pou kite l. Tout lòt chwa se rebelyon. 

Alò, èske ou vle vrèman kite yon peche w ap pratike lontan ou konnen ki dwe sispann? Okazyon an se koulye a. Pa mete desizyon ou pou demen.

Jerome Dorsonne Emerson