#55 | 10 bagay yo pa fòse yon vrè kretyen fè

10 bagay yo pa fòse yon vrè kretyen fè

Konbyen fwa sa rive w ap ankouraje yon moun ki fèk konvèti oswa ki legliz lontan oswa ki fèk batize, epi malgre tout sa ou fè, li pa janm chanje? Sa ki pi fasil pou fè, se dekouraje menmsi ou konnen ou dwe kontinye. Ebyen, tèks sa a pa ekri pou fè ou sispann paske se ka ministè ou. Toutotan, ou ka ankouraje yon moun sèvi Bondye byen, li bon. Men pou ou ka pi efikas nan ministè sa, li enpòtan pou ou konnen avèk ki tip kwayan ou annafè. Konsa, w ap konnen ki pi bon estrateji ak egzijans pou reyisi.

Lis aksyon oswa konpòtman sa yo pa egzostif men yo ka ede ou gen yon lide sou yon vrè kretyen.

    1.      Batize

Depi jou ou te konvèti a, ou se yon kretyen paske yon vrè repantans toujou suiv batèm Sentespri (Travay 2.38-41). Lè ou fin sove, ou pa ka refize batèm ki se prèv kwayans ou nan Jezikri (Mak 16.15-16). Yo pa fòse yon moun ki konvèti tout bon plonje nan dlo batèm. Fòse batize se youn nan pi gran koz chite anpil manm nan Legliz Evanjelik yo.

    2.      Ale legliz

Se pa ale legliz ki fè ou vin yon vrè kretyen men pèsonn pa bezwen fòse ou ale nonplis puiske ou konnen se moman pou kominote a reyini pou yo edifye ak adore Bondye (Travay 2.42 ; 1 Konret 11.20-22). Yon moun ki pa vle ale legliz ap jwenn ase pretèks pou jistifye sa men yon vrè kretyen konnen youn dwe sipòte ak padone lòt nan lanmou Kris la (Kolosyen 3.13). Kou yo toujou di, depi se kote ki gen moun, konfli a posib. Pou legliz zanj yo, se nan syèl la l ap ye. 

    3.      Li Bib la regilyèman

Pi souvan, kretyen yo renmen priye paske se mwayen pou pale avèk Bondye. Sepandan, se nan Bib la nou jwenn ansèyman sou lapriyè (Matye 6.5-13 ; 21.22 ; Lik 11.1 ; Jak 4.3, 1 Tesalonisyen 5.17). Eskiz nimewo 1 pou pa li Bib la regilyèman se manke tan. An reyalite, se manke enterè ak inyorans paske yon vrè kretyen se yon disip k ap aprann sèvi Mèt li chak jou. Li dwe gen yon sous l ap puize pou li ka pi efikas chak jou (2 Timote 3.16).

    4.      Priye

Se Bib la ki di : « Pa janm sispann lapriyè » (1 Tesalonisyen 5.17). Pakonsekan, yon kretyen bezwen priye chak fwa sa nesesè (Filipyen 4.6). Li difisil pou sèvi Bondye san yon videpriyè puiske Bondye se Lespri. Ebyen,  yon moun ki deside sèvi Bondye pa ka bezwen yo fòse li devlope yon relasyon pèsonèl avèk li. Fòse li se inyore verite sa.

    5.      Pran repa Senyè a

Bib la di : « Sa se kò mwen. Se mwen menm ki bay li pou nou. Se pou nou fè sa pou nou ka toujou sonje mwen » (Lik 22.19). Sakris Jezi te fè pou sove yon pechè dwe toujou nan lespri li. Se yon fason pou l toujou sonje pri ki te peye pou delivre li nan peche. Konsa, l ap toujou mennen yon lavi apa pou li ka toujou kominyen. Pèsonn pa oblije fòse yon kretyen raple l sakrifis Sovè li. 

    6.      Mennen yon lavi apa pou Bondye

Pa gen vrè kretyen san yon lavi apa pou Bondye (sanntifikasyon). Paske, men sa Bib la di : « Men sa Bondye vle pou nou : Se pou nou viv papa pou Bondye, pou nou pa lage kò nou nan imoralite » (1 Tesalonisyen 4.3). Yon moun imoral pa ni genyen ni respekte prensip. Li fè sa li vle e li pa gen kontwòl kò li. Poutan, kò kretyen an se pou fè lwanj Bondye (1 Korent 6.19-20). Kòman yon vrè kretyen ap ka viv nan imoralite (pratike peche)? Enposib. Viv pou fè Bondye se yon plezi pou li (Som 34.7). Ou pa ka fòse l fè sa.

    7.      Bay moun ki nan bezwen

Lavi pami premye kretyen yo te kòmanse nan pataje sa yo genyen selon bezwen chak moun (Travay 2.45). Jezi ki t ap viv nan yo a pa chanje (Ebre 13.8), li toujou nan nou jodi a. Ebyen, nou bezwen santi menm devwa sa a anvè frè ak sè nou sitou lè nou konnen yo nan nesesite. Bib la ankouraje nou fè byen nèt ale (Galat 6.10).

    8.      Padone

Pami tout rezon pou yon kretyen ta padone, an nou site 3: 1) se yon devwa (Kolosyen 3.13); 2) Jezi se modèl padon (Kolosyen 3.13 e 3) Se yon mwayen pou jwenn padon anretou (Matye 6.14-15). Refize padone ka anpeche Bondye reponn lapriyè ou (Matye 6.12). Yon vrè kretyen pa chache rezon pou l kenbe frè l ak sè l nan kè l. Li konnen se yon devwa. Yo pa fòse padon ki se yon aksyon lib ou pran pou ou pa vanje. Annefè, pa padone se premye mwayen pou tire revanj. 

    9.      Mande padon

Nan Jak 5.16, sèvitè a ekri : « Se pou nou konfese peche nou youn bay lòt.. ». Menm jan ou konn nan pozisyon pou padone paske yo blese ou, se konsa li posib pou blese lòt moun paske ou pa pafè. Tout moun ka fè erè e nou fè peche san nou pa rann kont. Lè sa rive, diskite pa enpòtan. Rekonèt erè ou epi mande padon. Sa pa fè ou piti, se prèv ou gran. Yon vrè kretyen p ap kite yo fòse li fè sa paske li konn sa ki bon ak sa ki pa bon.

    10.  Evanjelize

Yon kwayan ki sove tout bon resevwa Kris nan lavi li. Granmesi lavi sa a, li se yon limyè k ap klere tout kote li pase (Matye 5.14-16). Kòman l ap ka fè sere limyè sa a ? Anreyalite, tout kretyen konnen byen se devwa yo pou chache nanm pou Kris nan nivo  yo kapab men eskiz pa manke anpeche yo fè sa. Sepandan, si yon swadizan kretyen ta pè oswa ou pa ka evanjelize, li ta dwe krenn Bondye pou l pa fè yo pale levanjil, legliz oswa Bondye mal nan fason l ap viv.

 Jérome D. Emerson

Modifye 13 novanm 2023

 Jérome D. Emerson