#56 | Depi yon fanm mete pantalon, li pa sanntifye ?

 

Sanntifikasyon se youn nan doktrin ki mal konprann nan legliz kretyen yo. Rezon prensipal yo, daprè analiz sou opinyon Ryan Rufus nan liv li a ki titre « La sanctification par la grâce », se:

        1.      Volonte pou fè Bondye plezi

        2.      Efò pou montre sentete

        3.      Règ ki enpoze pou konfòme (lalwa)

Rezon sa yo fè kwayan yo plis bezwen konnen si yon moun sanntifye pase yo chache konnen si yo menm yo sanntifye. Sa vin bay yon lespri jijman : n ap gade sa lòt ap fè, n ap entèprete sa l ap di epi nou imajine li pa sanntifye. Se konsa, yon moun ka di : « Ti dam sa a pa sanntifye non, li renmen mete pantalon ». Men, èske gen yon tèks ki di depi ou mete pantalon, ou pa sanntifye ? Asireman non menmsi Detwonòm 22.5 mal entèprete nan ka sa a.

Imedyatman yon anseyan fè konnen yon kretyen sanntifye pa ka mete pantalon, li tou bay yon prèv pou jistifye moun ki sanntifye alòske Bib la pa anseye sa. Moun sa yo ki kwè nan ansèyman ekstrabiblik sa a pral jije tout fi ki mete pantalon pou deklare yo pa sanntifye.

Pakont, chak kretyen ki sanntifye ap konnen kisa pou l fè ak pa fè pou l fè Bondye plezi paske Sentespri Bondye nan kè li, li ka konnen verite a (1 Tesalonisyen 4.8). Avèk sajès, yon jèn fi kretyen ka chwazi pa mete pantalon men chwa li a pa detèmine kwayans tout jèn fi kretyen. Se chak jèn fi kretyen ki pou chache konnen kòman li ka fè Bondye plezi (Efezyen 5.10) selon volonte Bondye e non selon prensip ak opinyon lèzòm. Se pa sa moun panse ki fè ou sanntifye, se sa Bondye fè nan ou granmesi pawòl li (2 Timote 3.16-17).

Non, yon fanm ki mete pantalon pa vle di li sanntifye. Pa mete pantalon pa vle di li sanntifye nonplis. Se pa yon rad, fo cheve, bijou, estil ou lamòd ki fè yon kretyen sanntifye ou pa. Dayè, mwayen ki pi fasil pou twonpe se mete ou nan pozisyon e pran karaktè ou konnen k ap fè kwè nan ou.  Kalifye nenpòt fanm ki mete pantalon "pa-kretyen" se pote jijman ki ka fè plis tò pase byen. Paske, nou pa dwe jije selon panse nou. 

Ou gen yon kesyon, yon sijesyon? Ale nan espas sa a adwat pou ekri m dirèkteman oswa ekri l nan kòmantè a.

 Jérome Dorsonne Emerson

F/Pinterest/Mode africaine