#102| Atitid lòm devan peche (2)

 

2. Ou regrèt peche a

Regrè se lè ou santi ou chagren akoz yon mal ou te fè, yon bagay ou pèdi, yon pwòch ou ki viktim. Ou te bezwen gen yon bagay men ou pa jwenn li epi w pa kontan. 

Nan sa ki gen pou wè avèk peche, regrè se yon santiman degou ou genyen aprè ou fin pran konsyans de dezobeyisans ou. Se lè ou rekonèt ou koupab osinon ou responsab yon mal, yon erè oswa yon desizyon.

Aprè David te fin peche, li te ekri pou di : « Mwen rekonèt sa m fè a pa bon. Se tout tan peche m lan devan je m » (Som 51.3).

Nan tèks sa, nou wè de (2) bon atitid kay David:

1. Li reyalize sa l fè a pa bon. Se pa t leka pou Amnon ki pa t rekonèt vyòl li te fè sou sè li Tama.

2. Li te twouble akoz peche li te fè a. 

Mo fransè «constamment» an vle di «avèk repetisyon, san kanpe». Sa vle di, depi w fin fè yon peche, ou p ap anpè toutotan Bondye pa padone w. 

Kidonk, regrè pa sifi. Ou bezwen konfese sa w fè ki mal epi evite tonbe ladan ankò. Pa di li difisil paske se Bondye k ap ba w fòs pou reziste. 

Nou konseye ou li twa tèks sa yo : Filipyen 4.13 ; 1 Korent 10.13 ; Galat 5.16.

Li premye atitid la: 1. Inyoran

Jérôme Dorsonne Emerson