#103| Refize marye ka fè w peche

Se Bondye ki te kreye gason, nan yon premye tan, e ki ta pral kreye fanm, nan yon dezyèm tan, pou l te ka retire gason an nan solitid epi ede li. Nou jwenn enfòmasyon sa yo nan tèks sila yo:

Seyè a, Bondye a, di ankò. Sa pa bon pou nonm lan rete pou kont li. M ap fè yon lòt moun sanble avè l pou ede l (Jenèz 2.18). 

Avèk zo kòt li te wete nan nonm lan, li fè yon fanm, li mennen l ba li (Jenèz 2.22).

Aprè sa, Bib la di: 

Se poutèt sa, gason an va kite papa l ak manman l pou l mete tèt li ansanm ak madanm li, pou tout de fè yon sèl (Jenèz 2.24).

Deklarasyon sa a montre klè gason ak fanm te fèt youn pou lòt e se sa k ap toujou rete. Se youn nan pi gran prèv egzistans Bondye ak kreyasyon li an paske kretyen ou pa, tout moun nan tout relijyon ak sosyete marye menmsi yo pa fè l menm jan. 

Poutan, Jezi, nan ministè tèrès li, ta pral ban nou yon lòt ansèyman sou maryaj. Aprè li te fin defann medam yo kont abi yo t ap sibi anba men mesye yo, espesyalman farizyen yo, sou divòs ak remaryaj, li te fè deklarasyon sa ki te choke yo:

Mwen menm, men sa m ap di nou: Lè yon nonm kite ak madanm li pou l al marye avèk yon lòt, li fè adiltè, esepte si se pou lekondit li ta kite avèk madanm lan (Matye 19.9). 

Sezisman fè mesye yo reponn konsa: 

Si se konsa bagay la ye pou yon nonm ak madanm li, pito yon nonm pa marye (Matye 19.10). 

Alò, maryaj t ap bon si mesye yo te ka repidye madanm yo pou nenpòt rezon epi pran yon lòt. Puiske kanmenm, y ap ka divòse men kondisyon an difisil, yo te reyalize maryaj pa gen avantaj. 

Youn nan leson pou nou tire nan repons farizyen yo se entansyon lòm ak volonte sou maryaj. Nan vèsè nou te li avan yo, nou wè Bondye te kreye gason ak fanm pou viv ansanm, Jezi raple yo sa (Matye 19.4-5/Jenèz 2.24). E youn nan repons Jezi te bay montre nou volonte Bondye pou byen maryaj la:

Konsa, yo pa de ankò, men yo fè yon sèl kò. Se poutèt sa, pèsonn moun pa gen dwa separe sa Bondye mete ansanm (Matye 19.6).

Poutan, yo te tèlman gen move entansyon, yo te lakòz Moyiz otorize divòs ak remaryaj (Matye 19.8). Yon rezon konsa pa ka fè maryaj bon paske li favorize enjistis. E se medam yo ki te plis viktim, yo te ka ranvwaye yo tandiske yo pa t gen pouvwa sa a. Se pa maryaj sa a Bondye te enstitye avèk Adan ak Èv la. 

Koulye a, èske chwa pou yon moun pa marye bon? Apot Pòl ap reponn: 

Li ta pi bon pou yo (moun ki pa marye yo) rete tankou m, pou kont yo. Men, si nou pa ka kontwole kò nou, marye marye nou. Pito nou marye pase pou n kite lanvi boule nou (1 Korent 7.8-9). 

Se Bondye ki te kreye gason ak fanm avèk dezi pou fè sèks. Misyon pou peple latè pa t ap posib san sa. Atout sa, gen yon eksepsyon Jezi te fè: 

...gen anpil rezon ki ka enpoze yon nonm marye. Genyen ki fèt tou konsa: yo pa ka marye. Gen lòt, se moun ki mete yo nan eta sa a pou yo pa ka marye. Gen lòt ankò ki pa marye poutèt Peyi Wa ki nan syèl la. Si yon moun ka asepte pawòl sa a, se pou l asepte li (Matye 19.12). 

...chak moun gen kado pa yo Bondye ba yo. Yon moun resevwa yon kalite kado, yon lòt moun resevwa yon lòt kalite kado (1 Korent 7.7). 

Alò, ki rezon ki fè ou pa (vle) marye?

1. Èske ou fèt tou konsa?

2. Yo mete w nan kondisyon pou sa?

3. Ou chwazi fè sa pou Wayòm Bondye a?

Jay E. Adams te ekri pou di: moun ki deside pa marye yo (alòske yo kapab) yo fè peche e sila ki marye malgre yo resevwa don pou marye peche tou (Mariage, Divorce et Remariage selon la Bible, p25).  

Youn nan sitiyasyon ou pa ta dwe ye si w pa vle marye se kouvèti oswa estrateji pou ou nan fònikasyon oswa plasay. Sa vle di, ou pa vle marye pandan ou nan relasyon seksyèl an kachèt. Si ou anvi fè sèks, ou pa santi w ka viv pou kont ou, solisyon an, daprè Pòl, se marye. Gen moun ki kwè yo ka kenbe nan lapriyè, se byen. Men si w ap tonbe oswa w ap reziste, se tèt ou w ap fè soufri. Bondye pa t kreye ou pou sa. 

Si ou ka sipòte yon moun nan kay san marye, pa kwè se volonte Bondye lè ou jwenn obstak pou marye. Paske, Bondye rele ou pou viv nan sanntifikasyon, li pa ka tolere ou nan fònikasyon oswa plasay pandan ou ka marye (1 Tesalonisyen 4.3-4). 

Suiv nou sou Facebook

Kidonk, si ou menm ki fin li tèks sa  konvenk ou gen don seliba, pa marye paske gen fwaye ki kraze akoz de sa. Konjwen ki pa t destine a ka pa entèrese kolabore epi li bay plis tan li nan sèvis Bondye (1 Korent 7.32-35). Pa marye lè ou pa santi dezi pou swa, oswa, kèk fwa, lè ou vle konsakre tout lavi w nan sèvis Bondye.

Men, si ou gen dezi pou marye, pa fè tèt ou soufri ni pa rete ap tann Bondye lè ou gen plizyè siy ki montre w li reponn deja. Se volonte Bondye pou ou marye, se pa yon peche, pa pran non l anven pou rete nan seliba pandan w ap soufri. Peche se dezobeyisans lalwa, maryaj soti nan lalwa Bondye ( 1 Jan 3.4).

Jérôme Dorsonne Emerson

Ekstrè SA OU DWE KONNEN AVAN OU MARYE