#91| 5 pyèj pou evite nan predikasyon

  

Preche pa konplike men si ou pa konn kòman pou evite anpil pyèj, se ka ministè oswa yon tach k ap parèt pi difisil pou ou. An reyalite, yon don espirityèl pa difisil. Okontrè, se paske li te ka difisil ki fè Sentespri a chwazi moun pou fè l. Bib la di :

« Si yon lòt resevwa don pou l fè yon travay, se pou l fè travay la. Moun ki resevwa don pou l montre lòt anpil bagay, se sa pou l fè » (Women 12.7).

Konsa, pi gwo difikilte ki gen nan preche soti nan moun ki pa aple pou sa. Se nan lide sa mwen pwopoze ou kèk pyèj pou evite nan predikasyon.

1.      Foli preche

« Bondye chwazi m pou m anonse bon nouvèl sa a, li voye m kòm apot pou m montre li bay tout moun ki pa juif » (2 Timote 1.11).

Pasyone pou yon travay nan legliz pa vle di ou gen don pou fè li. Ou ta dwe reflechi pito sou sa ki motive pasyon sa a (1 Korent 15.58). Menmlè pa ta gen predikatè nan asanble ou, se pa yon rezon pou w chwazi preche. Sentespri k ap dirije tout kwayan yo ap fè chwa sa a. Dayè, pa gen moun ki preche akoz li konn preche, se Bondye ki fè sa. Se nan li konesans la soti. Pòl pa t chwazi vin predikatè, Bondye te chwazi l (1 Korent 9.16). Foli preche ka fè ou vin yon move predikatè jiskaske ou preche fos doktrin.

2.      Pale anpil

« Men, nan mitan legliz la, mwen pito di senk ti mo tout moun ka konprann pou lòt yo ka grandi nan konfyans yo tou pase pou m di yon pakèt mo nan langaj » ( 1 Korent 14.19).

Objektif yon mesaj se pou moun k ap koute ou yo konprann pou yo ka edifye. Sinon, ou pase akote. Tan ou te itilize a gaspiye. Puiske oditè ou yo [ta] gen Sentespri (1 Tesalonisyen 4.8), mesaj ou a pa oblije long pou li edifyan. Pale anpil ka yon eksè pou ekspoze sa ou konnen san panse sou efikasite mesaj ou a. Sof nan kèk ka espesyal, yon mesaj ki dire anpil pa t byen prepare oswa enpwovize.

3.      Pale fò

« Lè m te fè nou konnen tout bagay sa yo, lè m te anonse nou nouvèl la, se pa t avèk bèl pawòl bon konprann lèzòm mwen t ap chache pran tèt nou. Men, se te avèk pouvwa Lespri Bondye a ki t ap bay tout prèv pou fè nou kwè » (1 Korent 2.15).

Gen sikonstans pou pale fò, li ka difisil pou evite li lè konsa. Egzanp, yon move sonorizasyon oswa absans sonorizasyon devan anpil moun ka egzije ou pale fò. Men si ou panse se sa k ap fè tande ou, ou reyisi. Sepandan, tande ou pa vle konprann, alewè edifye. Ou pa dwe pale pou moun tande ou ase, yo bezwen edifye. Yon mesaj puisan pa fòseman preche avèk kòlè ak raj. Ou pa bezwen swe nonplis pou wè sa. Se Sentespri ki fè pawverite w ap di a puisan, se pa otè vwa ou. Konsa tou, ou pa dwe preche twò dous nan lespri y ap konprann ou. Sèpan an pa t pale fò avèk Èv, men sa pa t anpeche li te pouse l tonbe nan tantasyon.

4.      Mesaj entansyonèl pou voye pwen

« Si frè ou fè ou yon bagay ki mal, ale jwenn li, rele l apa. Fè l wè sa li fè a mal. Si li koute ou, se mete w a mete frè ou ankò sou bon chemen » (Matye 18.15).

Li pi fasil pou jwenn yon moun ki fè ou mal apa pou regle yon pwoblèm pase pou ou itilize yon chè kote plizyè dizèn moun ki pa konsène de pwoblèm nou an oblije tande l kanmèm. Yon tèl demach pa favorize edifikasyon ki se objektif final yon predikasyon. Nòmalman, tout mesaj ki preche gen moun li ka fwase pandan gen lòt li ka beni. Toutfwa, fwase a pa dwe entansyonèl. Se dwe rezilta travay Sentespri a. Ou pa ka evite deranje moun k ap viv nan peche lè w ap preche laverite men ou pa dwe preche pou voye pwen. Sentespri pale klè, se sa ki fè apot Pòl te site non pitit ki te pran madanm papa l la (1 Korent 5.1-5).

5.      Imitasyon

« Sa ou te tande m di ou devan anpil temwen, se pou ou remèt yo bay lòt moun serye ou konnen ki ka montre lòt moun yo tou » (2 Timote 2.2).

Nan 1 Korent 11.1, apot Pòl egzòte kretyen yo pou imite li menm jan li imite Kris. Men, se pa nan fason Kris t ap preche. Dayè, pa t gen ni videyo ni foto pou li te wè li alèv. Anplis, Pòl pa t disip Jezi nan ministè tèrès li (Travay 9). Li te imite li nan mòdvi li, jan li te di disip yo : « …nou youn pa kab disip mwen, si l pa detache kè l sou tou sa l genyen » (Lik 14.33). Antanke predikatè, ou dwe imite kouraj, kapasite, konpetans, entegrite ak seryozite yon predikatè men se pa vwa li ak jès li. 

Jérôme Dorsonne Emerson