Rapèl apot Pòl fè kretyen lavil Korent yo nan 2 Korent 9.6 la pa pou ankouraje ofrann nan sèvis legliz sèlman. Se pou tout kretyen jenere.
Sonje sa byen: Moun ki simen ti kras va rekòlte ti kras. Moun ki simen anpil va rekòlte anpil (2 Korent 9.6)
Alò, kilè w ap konnen pou ou bay? Mwen pote twa siy ki ka fè ou konnen nan ki moman pou ou fè sa.
1. Lè ou genyen
Ou pa ka bay sa ou pa genyen. Pafwa, ou fè pwomès lè ou gen espwa men lè ou genyen, pa panse pou jere ak itilize (depanse) sèlman. Menm jan Bondye te fè ou jwenn atravè yon lòt moun, se konsa li vle itilize ou pou bay tou.
2. Lè ou konnen sila ki nan bezwen
Bib la di:
“Si yon moun ki pa nan bezwen wè yon frè li nan nesesite, si l pa gen pitye pou li, yon moun konsa pa ka pretann li renmen Bondye » (1 Jan 3.17).
Jak, bò kote pa l, te di:
« Se poutèt sa, moun ki pa fè byen li konnen li gen pou l fè a, li fè peche » (Jak 4.17).
Depi ou konnen yon moun nan bezwen, ou pa bezwen priye ni tann li mande ou, se Bondye ki fè ou konnen sa pou ou ka ba li.
3. Lè sa ou bay la pa deranje w
Youn nan mwayen pou ou konnen si ou bay avèk tout kè ou, se lè sa ou bay la pa deranje ou. Sa vle di, ou pa regrèt ou te bay li. Se poutèt sa li enpòtan, anpil fwa, pou ou reflechi avan ou bay. Pa kite emosyon ak fè wè motive ou.
Jérôme Dorsonne Emerson
Aucun commentaire:
Enregistrer un commentaire
Ekri tout lèt nan mo w ap chwazi yo.