#93| Kretyen foulay!

Daprè orijin mo kretyen an, pa gen fo ak vrè kretyen. Yon kretyen se yon kretyen. Men, puiske ou ka pa konnen kilès ki kretyen toutbon, lè yon moun ki te panse oswa te di se sa li ye, se li menm ankò ki montre li pa sa.

Nou ka pran egzanp Jida, youn nan 12 disip Jezi yo. Malgre li te aple menm jan ak 11 lòt yo, vann Jezi pou lajan te montre li pa t yon vrè disip. Se menm jan avèk vrè ak fo pwofèt yo, Jezi montre nou kòman pou n rekonèt yo:

Konsa tou, n a rekonèt fo pwofèt yo sou sa y ap fè (Matye 7.20).

Tout moun k ap pèsevere legliz se kretyen parapò avèk administrasyon an, patisipasyon yo nan sèvis yo, kat pèseverans yo ak wòl yo jwe nan yon gwoup. Men, sa pa sifi pou defini yon kretyen otantik. Li ka difisil pou konnen yon vrè kretyen sou renmen li genyen pou Bondye ki fè li obeyi pawòl. Jezi te di:

Se pa tout moun k ap plede di m: Mèt, Mèt, ki pral antre nan peyi Wa ki nan syèl la, men se sèlman moun ki fè volonte Papa m ki nan syèl la (Matye 7.21).

Ni mwen ni ou pa ka ni dwe anpeche yon moun site non Jezi, rele oswa priye Bondye, alewè antre legliz. Pakont, nou bezwen sèten nou se vrè kretyen. Sinon, se tèt nou n ap twonpe. Kou di pawòl la, nou t ap kretyen foulay.

Apot Jan te ekri pou di:

Lè yon moun di: mwen menm, mwen konn Bondye, epi pou anmenmtan an li pa fè sa Bondye mande l fè a, moun sa a se yon mantò. Verite a pa nan li (1 Jan 2.4).

Alò, si mwen menm avèk ou jije tèt nou parapò avèk pawòl sa a, n ap konnen ki kalite kretyen nou ye. Konsa, se pa kwayans nou sèlman k ap di nou se sa, aksyon nou atravè obeyisans nou nan Levanjil ap jistifye sa. Se sa Bondye vle menm.

Nan yon entèvansyon sou Facebook yon apot te fè sou yon pastè ki ta chita legliz, li te reponn pou fè rektifikasyon sa a: "Pastè a pa chite, li demaske tèt li." Vrèmanvre, tout vrè kretyen yo toujou rete kretyen nan nenpòt sikonstans. Se pou Bondye nan gras li kontinye kenbe ou nan vi apa w ap mennen pou li chak jou.

Jerome Dorsonne Emerson