#97| Atitid lòm devan peche (1)

Sove pa vle di ou se yon moun ki p ap janm fè peche.  Ou pa t ap moun ankò, men yon dye. Pakont, ou p ap pwofite fè oswa demere nan peche nonplis sou pretèks ou sove nèt. Malerezman, anpil moun rive kwè sa jis yo panse avan yo mouri, Bondye ap sove yo menmsi yo t ap pratike nenpòt peche. Okontrè, se atitid ou genyen devan peche ki ka jistifye ou sove tout bon (1 Jan 3.9). Sa vle di, depi ou sove, w ap chanje konpòtman fas ak tout sa ki ka fè ou tonbe nan peche. Pou egzanp, lè ou jwenn okazyon pou dezobeyi, w ap kouri (1 Korent 6.18). 

Bondye konnen ou ka peche, Bib la pale sou sa : « Si nou di nou pa gen peche, se tèt nou n ap twonpe. Verite a pa nan nou. Men, si nou rekonèt devan Bondye nou fè peche, nou mèt gen konfyans nan li… » (1 Jan 1.8-9). 

Parapò avèk tèks sila a, an nou wè premye fason ou ka konpòte ou nan okazyon pou peche. 

1. Yon inyoran

Inyore yon bagay ka gen de sans : 

1) ou pa konnen li

2) ou konnen li men ou pa valorize li 

De (2) ka sa yo posib lè ou fè yon peche. Premye a ka yon peche envolontè (aksidan), dezyèm nan ka fèt eksprè(1 Jan 1.8-9). Anplis de sa, inyore yon peche, nan dezyèm sans la, ka mennen andisisman kè (kè di). Si w ap kontinye inyore oswa bay eskiz pou sa ou fè ki pa bon menm jan avèk wa Sayil, peche sa a ka vin yon abitid nan lavi e se sa ki ka fè li difisil pou ou sove. Se pa paske sove difisil, se paske l ap difisil pou repanti. Anpil fwa, gen moun ki reziye yo nan plasay, fè maji, vann kò yo. Yo konnen li pa bon, men yo pa ka kite l. Se vre, Bondye pa kondane yo men si yo pa deside, li pa ka sove yo.

Kretyen inyore peche?

Eske yon vrè kretyen ka inyore yon peche?

Wi, li posib nan premye sans inyorans la. Ou ka ap fè yon bagay ki mal ou pa rann ou kont de sa, swa paske ou pa chache konnen oswa ou panse li bon. Toutfwa, Sentespri k ap viv nan ou ta dwe konvenk ou paske se youn nan travay li (Jan 16.8-13). Konsa, li enpòtan pou ou chache konnen sa k ap fè Bondye plezi (Efezyen 5.10). Trè souvan, gen kwayan ki konn di: "Sa pa anyen, m ka fè l". Sa se neglijans.

Nan dezyèm sans inyorans la, li pa nòmal paske granmesi konesans ou gen nan Levanjil, ou ta dwe konnen volonte Bondye : « Si nou fè sa Bondye mande nou fè, lè sa a nou mèt sèten nou konnen li (1 Jan 2.3). Se pa sa ou panse ki fòseman konesans sou Bondye ni sa ou tande k ap repete tout tan. Dabò, ou bezwen devlope yon relasyon pèsonèl avèk Bondye, se sa ki pral fè ou gen krentif pou li. Krentif sa a pral fè ou mache dwat devan li.

Dezyèm atitid: An atant!

Jérôme Dorsonne Emerson