#99 | Sis rezon pou ou pa doute sou sali ou

 

Doute ou sove se yon bagay nòmal men li pa enpòtan. Si nan kèk ka, li ka ede ou gen plis konfyans ak dekouvri fo doktrin, nan ka sali ou, li pa pote pyès avantaj.. Men kèk rezon ki ka ede ou konprann sa.

1.      Dout se yon sousi

Jezi te poze disip li yo ki t ap doute kesyon sa a : ” Kilès nan nou, afòs li fè tèt li travay (enkyete), kapab mete kèk ane an plis sou lavi l?” Nan pasaj sa a, Jezi ap pale sou lavi fizik e non etènèl. Leson nou bezwen tire ladan se rezilta a : sa p ap itil nou anyen. Konsa, pou anpil sousi w ap fè, l ap pote plis enkyetid. Konsa, li pa enpòtan pou ou doute sou sali ou.

2.      Dout pa ka sove ou

Si ou pa ka mete yon ane sou lavi fizik ou ki ta depann de pridans ak lasante, li pi difisil pou lavi ki p ap janm fini ou jwenn yon sèl fwa a. Dayè, pou sove ou, Bondye pa mande ou doute, li mande ou kwè nan li. Fè li konfyans. Si w ap doute, se pa delivrans li bay la w ap chache. Anpil fwa, se peche, inyorans ak lojik ki fè nou doute sou pwomès Bondye fè nou. Gen moun ki pa vle dakò sove se yon gras, yo bezwen ede Bondye sove yo.

3.      Bondye pa janm bay manti

Pòl t ap t ap lapriyè pou travay Bondye t ap fè nan kretyen lavil Filip yo lè li te di : « Mwen sèten Bondye ki te kòmanse bon travay sa a nan nou, li gen pou l kontinye l jouk li va fini l nèt, lè jou Jezikri a va rive » (Filipyen 1.6). Pòl pa t doute sou pouvwa Bondye pou kontinye travay li nan lavi yon kretyen. Se sa ki fè, tout sa yon kretyen ka fè pa soti nan li, se pou glwa Bondye (Efezyen 2.10).

4.      Sali ou se yon pwomès

Se pa t ou menm ki te mande Bondye sove ou, se li menm ki te deside fè sa lè li te voye Jezi, Sèl Pitit li a, vin mouri sou kwa a pou ou (Jan 3.16). Lè Bondye pwomèt ou kichòy, se pa sousi w ap fè k ap fè ou jwenn li, se konfyans ou gen nan li. Otè liv Ebre a di konsa : « An n kenbe espwa nou genyen an byen fèm. Paske, nou mèt sèten, Bondye ap kenbe pwomès li” (Ebre 10.23). Si se Jezi ki sovè ou, se li menm ki te di l ap vin chache ou vivan oswa resisite, se sou li pou konte e non sou yon lòt moun ki ta vle fè ou pèdi lespwa.

5.      Doute pa vle di ou pa sove

Nonsèlman, doute pa ka fè ou sove, li pa ka desove ou nonplis. Toujou sonje pwomès pou sove ou ak pou beni ou pa menm. Nan Jak 1.5-8, dout ka anpeche ou jwenn sajès (oswa nenpòt demann) nan lapriyè men lapriyè pa kondisyon ni mwayen pou ou sove. Kidonk, lafwa pou ou sove diferan de lafwa pou Bondye reponn rekèt ou yo. Pa melanje yo. Youn se yon mwa pou jwenn (Efezyen 2.8-9) tandike lòt la se yon kondisyon pou jwenn (Matye 21.22).

6.      Se pa sa Bondye mande

Bib la di : « Nenpòt moun ki mete konfyans yo nan li p ap janm soti wont » (Women 10.11). Li di ankò : « Pa kite bagay sa yo toumante nou. Mete konfyans nou nan Bondye, mete konfyans nou nan mwen tou» (Jan 14.1). Plis w ap mete konfyans ou nan Bondye, se plis w ap grandi espirityèlman. Si w ap fè sa Bondye pa mande a, rezilta ou jwenn nan pa soti nan li.

Se pou ou kwè ou sove nenpòt sa ki ta rive. Pa janm bliye se nanm ou Jezi te sove (Matye 26.16). Se pa kò ou. Konsa, menmsi ou ta nan nenpòt sikonstans kote kò ou ka peri, nanm ou sove pou tout tan. Amèn !

Jérôme Dorsonne Emerson