#125| Radyografi evanjelizasyon an (2)

2. Poukisa ou dwe evanjelize?

Evanjelizasyon se misyon tout kretyen sou latè. Ou se yon kretyen, pa vre? Ebyen, ou gen pou devwa evanjelize. Tout kretyen pa ka angaje yo nan evanjelizasyon an menm jan men yo chak ka fè sa yo kapab. Ou menm tou, ou ka fè sa jan ou kapab. 

Pastè Musuvaho Paluku Dieudonné ki se doktè nan teoloji pale de 2 motivasyon prensipal pou anonse bòn nouvèl la (Allons-y!, p11,12):

1.Renmen ou gen pou Bondye ak dezi ou pou wè non li egzalte pami tout moun. Sa sèlman ta dwe fè ou evanjelize. 

2. Renmen ou gen pou fanm ak gason ki nan anviwònman ou. Ou gen konpasyon pou yo, ou pa ta vle pou nanm yo kondane. 

Mete sou 2 motivasyon sa yo, ou ta dwe evanjelize paske....

1. Se yon lòd Jezi te pase. Antanke disip, ou dwe obeyi li. (Matye 28.19), nou dwe obeyi (Jan 14.15)

2. Se yon privilèj. Antanke pechè, Bondye ta dwe chwazi zanj yo pou preche. Poutan, li chwazi ou pou fè sa (Jan 15.16).

3. Se yon byen (Jak 5.19- 20). Evanjelize se pa joure, bay manti ak pale moun mal. Se yon bon bagay. Kidonk, ou dwe fè li nan tout okazyon (Efezyen 4.16).

4. Lanfè reyèl (Ebre 9.27). Aprè lanmò, se sèten ou pral jije men lè ou sove ou pa ka kondane (Women 8.1).

5. Ou retire yon nanm nan kaptivite. Chak nanm ki sove, se yon zouti djab la pèdi pou itilize kont monn lan (Women 12.1-2). 

6. Se prèv ou sove tout bon (Women 8.31-39). Si ou sove vre, ou dwe ede lòt yo sove tou. Konsa, w ap montre ou kwè nan Jezi toutbon epi ou pa egoyis.

🔴E si w te soufri avèk kouraj?

Mwen pa vin di w jodi a pou ou reziye ou soufri paske m pa konn rezon an. Nan yon predikasyon frè Robens François t ap fè jodi a nan yon pratik sou "Aprann preche" (1 Pyè 4.14-16), li te raple nou kèk rezon ki ka fè yon kretyen soufri.

Sa tout moun konnen an se peche. Men se pa jis paske se peche ki fè yon kretyen soufri. Si se te sa, tout moun k ap fè peche t ap soufri. Wi, tout moun k ap fè sa ki mal t ap soufri men ou ka remake anpil ladan yo ap rejui. Lè konsa, ou tris, ou anvi kite Levanjil paske ou chache mennen yon lavi apa epi se ou k ap soufri. Lojikman, li pa nòmal men kisa w panse....?

Lè ou wè yon timoun ap joure nan lari, ou wè gen moun okipe l? Gade valè timoun y ap met betiz nan bouch yo sou rezo sosyal yo epi plizyè milye moun ap renmen yo, si se te pitit pa w la, ou t ap fyè de li? 

Ou pa wè valè jèn fi k ap ekspoze pati entim yo, si se te madanm ou oswa pitit ou, ou t ap gade sa konsa? Yo pa t ap menm oze fè sa. Ebyen, se konsa ui, vrè pitit Bondye a pa ka pran plezi nan fè peche epi pou l gen kè kontan. Se pa santiman non k ap fè l tris, Sentespri a menm ap atriste nan lavi l. Li p ap ka trennen kò li nan labou pandan l gen Lespri Bondye k ap gide l. Non, yon pitit Bondye pa ka rejui nan sa ki mal. E Papa l pa t ap gade l konsa.

Bib la di:"Enben, sipòte soufrans sa yo tankou si se papa nou k ap peni nou. Paske soufrans sa yo se prèv Bondye konsidere nou pou pitit li. Nou janm tande yon papa ki pa janm pini pitit li?"(Ebre 12.7). 

Men gen yon lòt rezon ankò ki fè nou soufri. Se li nou jwenn nan 1 Pyè 4.16 la:"...si yon moun ap soufri paske se kretyen li ye, li pa bezwen wont pou sa. Okontrè, se pou li fè lwanj Bondye dèske li pote non Kris la". Sa fè, zanmi m, se pa akoz peche sèlman ou ka soufri. Gen fado w ap pote, gen mank w ap genyen jis paske ou se yon nanm sove k ap fè Senyè li plezi. 

Sou menm pwen sa a, nou te ka wè yon lòt rezon ki fè moun soufri, san li pa bezwen kretyen. Gen rèv ou vle reyalize, gen kote w bezwen rive, gen enpak ou bezwen fè, ou oblije soufri pou ou rete onèt, kredib, diy. Yo pa achte kalite sa yo, se moun ki konn valè yo ki defann yo. 

Alò, si w ap soufri nan moman w ap li mesaj sa a paske w te fè yon peche, mande padon. Si se pou fè Bondye plezi, pran kouraj men pa ret soufri, gen anpil bagay ou ka fè pandan w ap tann yo leve w sou sanksyon an.

E si se paske ou vle atenn yon objektif espesyal, inik, ekstraòdinè, enkonparab, soufri avèk kouraj.😌🙏👌👍🥺😊🫡

JDE

#124| RADYOGRAFI EVANJELIZASYON (1)

1. KISA evanjelizasyon an ye?

Evanjelizasyon se aksyon yon kretyen k ap evanjelize. Sa vle di l ap preche youn oswa plizyè moun Levanjil pou yo ka konvèti oswa kwè nan Jezi. Lè yon moun kwè, li sove. Sinon, l ap kondane aprè lanmò fizik si l pa t gen tan fè sa (Mak 16.16, Jan 3.16-21).

Nan Matye 28.19-20, teolojyen yo (Commentaire Biblique du N.T du disciple, p155) pale de "lòd misyonè" ki egziste jiska prezan, soti nan lè Izrayèl te fin rejte Kris rive nan lè li gen pou retounen. 

Lòd sa gen twa kòmandman : 

1.Fè disip = evanjelize, chache nanm pou Kris

2. Batèm dlo = resevwa batèm lè ou kwè

3. Ansèyman = anseye nouvo konvèti oswa disip yo prensip Senyè Jezi te aprann yo

Sa evanjelizasyon pa ye:

Nan liv li ekri ki se "GAGNER DES  ÂMES" (Europresse, U.E, 2008), Charles Spurgeon (1834-1892) bay 3 tandans oswa pratik ki pa evanjelizasyon: 

1. Se pa vòlè brebi (fidèl) lòt bèje

Kretyen oswa gwoup k ap evanjelize a pa dwe konvèti moun nan ti gwoup nou oswa Legliz yo. Premye sousi an dwe: mennen brebi yo bay bèje a pou l sove yo. Aprè, n a gen tan pale yo de prensip legliz lokal la. 

2. Alonjman lis manm Legliz la

Se pa kantite moun ou lapriyè pou yo pandan yon misyon, yon kwazad oswa yon tounen misyonè, se pito konbyen ki sove tout bon (Travay 2.47). Kidonk, nou bezwen tan avan nou konfime 90-100 moun konvèti.

3. Fè moun eksite pou yo aksepte Kris

Zèl tout bon an akòde avèk bon sans ak rezon. Pa fòse ni bay manti pou konvenk pèsonn. Kite Lespri a fè travay li. Sinon, se kòve oswa mouvman pou enpresyone moun.

Pakont, Charles Spurgeon bay 2 bon fason nou ka defini evanjelizasyon:

1. Enstwi lòm pou li ka konn verite Bondye a: Matye 28.19-20; Ezayi 55.3

Lè w di yon moun kwè, nan kisa oswa kilès li kwè? Se dwe nan Levanjil Jezi a. Se pa nan sa ou menm k ap evanjelize a kwè. Sinon, li pa sove men li adote kwayans ou. 

2. Mete verite a nan lòm pou li ka santi li: Jan 3.3

Moun w ap evanjelize a gen yon sèvo ak yon kè. Pale avèk tou de. Li bezwen konprann pou l kwè (lafwa). Sinon, se yon nouvo ènmi Legliz w ap prepare.

Nan kontèks biblik la, nou ka defini evanjelizasyon plizyè fason sou baz kèk vèsè. Men kèk ladan yo.

1. Fè disip pou Kris (Matye 28.19)

2. Anonse bòn nouvèl la (Mak 16.15)

3. Simen pawòl la (Matye 13.1-9; 18-23)

4. Fè konnen mesaj sou Kris la (Lik 24.47)

5. Krisyanize (Jan 1.11-13)

Jerome Dorsonne Emerson

🌑 E si chak moun te legliz?

Youn nan pwoblèm ki fè y ap pale legliz mal depi yon bon bout tan se ENKOYERANS. Sa nou kwè a, sa n ap preche a, sa n ap chante a, sa n ap anseye a, se pa sa n ap fè. 

Mwen konnen verite a, mwen li l, mwen tande l, mwen kwè l, m aksepte l men m ap eseye pase akote pou m ka jwenn yon eskiz pou m pa fè l, kita inyore l. Konsa, m ka akize yon fidèl, yon lidè, yon ènmi e menm Satan pou m jistifye sa m te dwe fè. 

Legliz pa bon. Lidè yo pa modèl. Moun sa yo tripòt twòp. M pa gen tan. Sa pa anyen. Kite mele m. Bondye konnen. Bondye konn kè m. M pa bay pèsonn regle anyen pou mwen. Lis la long men w konnen tout sa m pa site yo.  

Nan ansèyman sou sekirite etènèl ki fè nou kwè lè yon moun sove li sove nèt, m rive konprann rezon ki lakòz anpil moun pa kwè ladan. Se pa paske gen vèsè nan Bib la ki kontredi l ni paske anpil moun ap pwofite fè peche. Paske, pou premye rezon an, Bib la pa kontradiktwa e pou dezyèm nan, Levanjil pa anseye ou ka sove epi pou w ap viv nan peche (Women 6.1-2; 1 Jan 3.9). 

M plis kwè se nati rebelyon nou ki kreye dout la. Yon dout ki jistifye puiske malgre m ka di Bondye beni m li beni m nèt, m pase m pase nèt, m pa oze di m sove m sove nèt. Jwèt la klè: beni ak reyisi pi entèrese m pase asirans sali mwen. Dezyèm remak la se tèlman mwen konnen, ou konnen, li konnen e nou tout konnen nou pa sensè nan sa nou kwè yo ki fè nou ka admèt, avèk rezon, nou pa sove. E se vre, gen fason m ap viv, m pa ka oze di m sove. Si sèlman Jezi te lòm!

Tèks la long ui😊 Ou vle poze oswa w ap kontinye👇

Jodi a, pou jan teknoloji avanse, si yon kretyen di l pa konnen kòman pou l fè Bondye plezi, èske li serye? Wi, li serye paske li pa imajine Facebook ak YouTube ka aprann li tout sa l vle konnen. Men li plis kwè li ka gade yon seri antye sou Netflix oswa Novelas sou YouTube pase li pase tan ap tande yon anseyan sou yon sijè li pa konnen. Li kwè li ka suiv yon kou anliy men pa gen okenn lekòl biblik anliy. Tout sèvi Bondye l rezime nan dimancholoji: kilt la, adorasyon an ak mesaj la si predikatè a pa preche long. 

Lè yon moun di manm sa a, entèl menm pa yon vrè kretyen, raketè kou li nan pwen, kilès ki responsab? Ban m reponn: legliz ki reponsab. Se pa lidè k ap fè sakrifis preche, anseye ak priye yo non. Se kay la, ban yo, mikwo yo ak non legliz la ki responsab. Pa anmè, pa anmède fidèl yo. Yo pa gen tan pou li Bib. Si yo li, pa gen tan pou konprann. Konprann pa gen kouraj pou fè yo obeyi. E obeyi tèlman parese, se nan rèv li wè Jezi sèlman. Ate pa sispann di Bondye pa egziste, swadizan mwen menm ki kwè l ap pale de li chak fwa m fè rèv vant plen. 

Men e si chak moun te legliz? Si chak manm legliz te imaj legliz la. Si yo chak te reprezante lidè yo, koral yo, gwoup yo, komite a, lajenès, dam ak òm, ou kwè t ap gen moun pou akize Legliz? Si sa ta sa, ala lwanj Legliz t ap jwenn nan lari, nan mache, sou plas piblik, nan koridò, nan fè nwa, sou plaj, nan restoran, andeyò kou lavil! Se paske Legliz se yon kay ki pa ka deplase ki fè chak manm panse yo ka fè nenpòt sa yo vle nenpòt kote. Y a pale Legliz mal, men kanta yo, y ap toujou jwenn yon rezon, yon fè, yon souvni, yon istwa, yon egzanp, yon eskiz pou montre yo pi bon. Oups ! Dezole! Pou mwen menm avèk ou montre nou pi bon. 

Dayè, sa mwen menn avèk ou bay Jezi ak tout Legliz li a regle pou nou. N ap viv lavi nou, y ap pale l mal san rete. Epi nou menm, n ap byen paseeeeeeeeeeee jan nou vle.😌

Si sèlman nou te serye...

JDE

#123| Èske ou sove ?(10)

 

Sijè 10.  Kisa pou m fè pou lòt moun ka sove ? 

Se vre, se Jezi sèlman ki ka sove moun men èske se konsa w te rete ou konnen sa? Asireman, non. Omwen, ou te tande Levanjil epi ou te kwè yon jou. Konsa, menm jan te gen yon moun te pale pou w te tande, ou ka pale pou yon lòt tande, sitou sila ki pi prè w la. 

Gen anviwon yon vèsè nan chak Levanjil yo sou mwayen pou yon moun tande Levanjil pou li ka sove. 

1. Matye 28.19

"Ale fè disip pou mwen nan tout nasyon, batize yo nan non Papa a, Pitit la ak Sentespri a."

Pou w vin disip, fòk ou gen yon mèt k ap anseye ou. Se la nou jwenn enpòtans evanjelis yo ak tout moun k ap simaye Levanjil la. Menm jan yon kretyen te preche w, ou bezwen preche lòt yo ki poko kwè. 

2. Mak 16.15

"Ale toupatou sou latè, anonse Bòn Nouvèl la bay tout moun."

Ou fè pati tout moun ki te resevwa e ki te kwè. Ou pa bezwen ale lwen. Kote w pase plis tan an fè pati "toupatou sou latè". Se la ppu w anonse Bòn Nouvèl la.

3. Lik 24.47

"Y a pran non l pou yo mache fè konnen mesaj la nan tout peyi, kòmanse lavil Jerizalèm, pou mande tout moun pou yo tounen vin jwenn Bondye pou yo ka resevwa padon peche yo."

Se gras ak predikasyon mesaj la ki fè ou te ka konnen ou se yon pechè ki bezwen padon. Pa neglije di zanmi ki pi pre w la tounen vin jwenn Bondye. 

4. Jan 21.30

"Mwen voye yo nan lemonn lan menm jan ou te voye m nan lemonn lan."

Nan Lik 19.10, Jezi te di l vin sou latè pou chache epi sove pechè yo. Nan Jan 17.30 la, li bay disip li yo menm misyon an. Toutfwa, se nan non li yo pral preche pou sove nanm. Konsa, nan Jou Pannkot la, 3 mil moun te sove (Travay 2.38-41). Travay sa a dwe kontinye avèk ou. 

Se Jezi menm ki te ajoute nanm sove yo nan Legliz la (Travay 2.47). Kidonk, misyon nou kretyen se preche Levanjil, chwa pechè yo se kwè oswa refize epi Jezi la pou sove yo. 

Si ou pa vle preche Levanjil, se kòmsi ou pa vle pou pèsonn sove. Ò, se misyon tout kretyen. Se sa pou n fè.

Èske w konn evanjelize deja?

Kilè w ap fè sa?

- FINISMAN-

Jerome Dorsonne Emerson 

#122| ÈSKE OU SOVE? (9)

 Sijè 9. Kisa Sove Sove Nèt (SSN) la ye ? 

 "Sove Sove Nèt" (SSN) tradwi doktrin "SÉCURITÉ ÉTERNELLE DU CROYANT" nan lang kreyòl. Li vle di lè yon moun sove, li sove nèt, li pa ka pèdi delivrans (salut) li. 

1.    Kisa Bib la di sou sa?

2.    Kisa w dwe konprann?

Se de kesyon sa yo nou pral reponn pou ba w limyè sou SSN nan.

 1.    Èske se vre, depi w sove ou sove nèt? 

Li enpòtan pou byen konprann kisa "sove" vle di nan kontèks biblik la. Pami tout sans li ka genyen, nou ka konsidere "gen yon lavi ki p ap janm fini" (Jan 3.16, 5.24, 17.3). Lè ou sove, ou gen lavi ki p ap janm fini an (lavi etènèl). Pwiske lavi ou genyen an p ap janm fini, li pa ka fini. Si li fini, li pa t etènèl. Se lavi natirèl (fizik) ou genyen an ki ka fini akòz lanmò paske li pasajè, li kout jan Moyiz te di nan Som 91.9-12. 

 ·  Se Bondye ki te ba w lavi nan premye Adan an (Jenèz 2.7). Li menm ki bay li nan dezyèm Adan an-Jezikri (1 Korent 15.45; Women 5.12-21)

 · Akoz peche, lavi fizik ou gen pou fini (Jenèz 3.19)

 ·   Se Bondye ki ba w lavi etènèl la tou nan Jezikri (Jan 3.16). Se pa anyen w fè, se paske li renmen w (Efezyen 2.8-9; 1 Jan 4.9-10)

 Wi, depi w sove, ou sove. E lè w sove, ou sove. Pa gen demi, ni twaka, ou sove.

 2.    Kisa w dwe konprann? 

 ·   Se Bondye ki bay lavi etènèl la

Se pa teolojyen, lòm osinon lajan ki fè w achte li. Nan Jan 1.12-13, apot la di klèman se Bondye ki fè nou vin pitit li. Se pa volonte lòm. 

 ·  Bondye toujou kenbe pwomès li. 

Bib la di: "Bondye pa tankou moun k ap bay manti. Non! Li pa tankou moun k ap chanje lide yo pou ti krik ti krak! Depi li pwomèt yon bagay, l ap fè l. Depi li pale, fòk sa li di a rive vre!" (Nonb 23.19). Si li pwomèt ou lavi ki p ap janm fini an, se sèten, l ap ba w li.

 ·         Bib la pa kontredi tèt li

Apot Pyè site non Pòl nan liv li a pou pale sou pasaj nan Bib la ki difisil pou konprann. Gen moun k ap tòde sans yo. Apot la di se pou malè yo (2 Pyè 3.16). Kidonk, itilize yon vèsè biblik pou demanti Bondye sou pwomès li se tòde sans li epi rann Bib la kontradiktwa.

·         Move tandans yo

Bib la pa anseye ou ka sove epi pou w ap viv nan peche (Women 6.1-2; 1 Jan 3.9). Si yon moun ap viv nan peche, li poko sove men se pa yon rezon ki fè sali a pa etènèl. Se pa sou pechadò pou nou jije pouvwa Bondye. Se sou moun k ap mache dwat. Yon kwayan ki kwè li ka fè peche epi sove malgre tou pa konprann sans sove sove nèt la.

Gen moun ki kwè depi Bondye beni yo li beni yo nèt, poukisa li pa ka sove yo nèt? Paske beni pi enpòtan pase sove? Bondye gen plis pouvwa pou l kenbe benediksyon an pase pou l kenbe sali a?

 Jérôme Dorsonne Emerson

#121| ÈSKE OU SOVE? (8)

Sijè 8. Ki kote moun sove yo pral viv ? 

Si lè yon moun sove mouri, yo mete kò a nan mòg epi antere li nan simetyè, ki kote li ale? Kote l ap viv pwiske li mouri epi Jezi di li sove? 

Pou nou byen konprann, fòk nou raple n vrè sans mo "sove" a. Se yon lavi tounèf yon pechè jwenn lè li kwè nan Jezikri. Lavi sa a p ap janm fini paske li espirityèl tandike lavi fizik la fini nan lanmò (Jenèz 3.19). 

Koute sa Jezi te di:" Se mwen menm ki leve moun mouri yo, se mwen menm ki bay lavi. Moun ki mete konfyans yo nan mwen, yo gen pou yo viv menm si yo rive mouri".(Jan 11.25)

Se vre w ap mouri men gras ak lavi Kris ba w la, w ap reviv ankò. Men, ki kote ou pral viv? Bib la gen repons klè pou sa.

1 1 Tesalonisyen 4.15

Gen moun ki p ap gentan mouri lè Jezi ap retounen men yo p ap anlve menm lè. Sa vle di, Jezi ap vini yon dezyèm fwa pou kwayan yo.

2. 1 Tesalonisyen 4.17

Ni kretyen ki te mouri ak sila ki vivan yo prale ak Jezi. Kote li ye a, se la n ap ye avèk li. Men ki kote? Koute Jezi ki te fè pwomès la.

" Lakay papa a gen anpil kote pou moun rete. Mwen pral pare plas pou nou. Si se pa t vre, mwen pa t ap di nou sa." (Jan 14.2) 

E ki kote Papa Jezi ye menm? Ki kote plas sa yo ye? Koute li ankò👇

"Si nou padone moun lè yo fè nou mal, Papa nou ki nan syèl la va padone nou tou"(Matye 6.14). Se la Jezi te ale lè li te fin resisite: "Antan l ap beni yo konsa, li separe ak yo, li monte nan syèl la". (Lik 24.51)

Gen yon jou pou Jezi fin pare plas la epi l ap tounen. Li te fè pwomès la pandan l te sou tè a e li gen pou l kenbe pawòl li. Se sa li te anseye Pòl (Galat 1.12) e se sa Pòl anseye kretyen nan legliz primitiv e nou jodi a ki sove e ki kwè nan ansèyman apot yo. 

Alò, nou menm ki sove, nou dwe kwè nan pawòl sa a sovè a te di ak bouch li: kote m a ye a, se la n a ye tou. (Jan 14.3)

Se pa relijyon, lòm, osinon filozòf ki pwomèt nou syèl. Nenpòt moun ka kwè li pa prale nan syèl paske yo pa fòse pèsonn ale la e se sèlman moun ki sove ki ka ale. Kanta nou menm, se pou nou kwè nan Jezi ki se CHEMEN AN (Jan 14.6). 

Se sèlman moun ki kwè Jezi se yon mantè, yon enpostè, ki pa kwè kretyen sove yo prale nan syèl. E si yon moun pa kwè Jezi ka sove li, li pa ka kwè nan pwomès li yo nonplis. 

Jerome Dorsonne Emerson

#120| 11 konsèy pou byen jere pouvwa

 

Gen pouvwa se youn, byen jere li se de. Tout valè pozisyon ou se nan itilizasyon li pou akonpli misyon ou. Depi ou wè pouvwa, sonje misyon ou, travay ou gen pou fè avèk li. Se bon jesyon li k ap ba ou otorite oswa konfyans pou yo obeyi ou. Men kèk konsèy k ap itil ou.

1. Konsyan ou depandan

Nan yon lekòl, yon ONG, nenpòt ministè, depi se pouvwa yo delege ba ou, ou se yon depandan. Sa vle di, ou pa ka aji tankou pa t gen pèsonn sou tèt ou. Tout sa ou fè ki depase limit ou se yon mank respè kont yerachi a oswa lidè ki sou tèt ou a. 

2. Respekte limit ou

Pouvwa tout moun sou latè limite kèlkeswa pozisyon yo okipe akoz souverènte Bondye. Se li menm ki  sou tèt tout moun : wa, prezidan, rich, elatriye. Pouvwa ou genyen pou sèvi a gen limit li, pa tante depase li. Menmsi ou ka fè plis pase sa yo ba ou, se sa yo ba ou fè a pou w fè. 

3. Konnen w ap travay pou fè lwanj Bondye

Se vre gen yon moun sou tèt ou administrativman men travay w ap fè a se pou Bondye li ye : « Lè ou gade byen, ki moun ki Apolòs la ? Ki moun ki Pòl la ? Nou tou de se sèvitè Bondye nou ye… » (1 Korent 3.6). « Nenpòt travay yo ban nou fè, fè l ak tout kè nou tankou si se pa pou lèzòm nou t ap travay, men pou Senyè a. » (Kolosyen 3.23). 

4. Obeyi lidè ki nan tèt ou a

Antanke yon lidè lejitim, gen moun k ap obeyi lòd ou men pa bliye ou depandan tou: w ap gen pou obeyi siperyè ou lè li ba ou lòd. Li pa saj pou lidè ap dezobeyi lidè, dezobeyisans la fè asanble a wè feblès administrasyon an ki ka redui sou otorite tout lidè yo. 

5. Pa neglije lapriyè

Pouvwa ou genyen se pou egzekite tach. Ò, gen tach ki lye avèk pwoblèm. Egzanp, wòl ou se asiste fanmi epi gen yon koup ki nan konfli. Pou rezoud konfli sa a, lapriyè enpòtan pou ou ka jwenn pawòl sajès. Tankou Neyemi ki te priye Bondye lè li te aprann miryaj Jerizalèm nan te kraze (Neyemi 1.4), ou bezwen lapriyè sitou lè w ap pran desizyon. 

6. Respekte otorite ki sou tèt ou

Respè pou lidè ki te mete ou nan yon pozisyon ou ye a oswa ki pi wo pase ou se yon devwa. Respè pa fòseman gen rapò avèk santiman oswa klan. Ou dwe tout lidè respè, dabò paske yo se lidè parèy ou. Ansuit, paske ou dwe respekte tout lidè e finalman, paske ou ka sibi menm tretman ou ba yo.

7. Respponsablite (Pa gen eskiz)

Reflechi sou misyon yo ba ou a avan ou pran l paske tout sa ou ka di aprè pou inyore li se eskiz. Moyiz te bay pa li yo avan pou li pa t ale men lè li te fin ale, li te pran responsablite li. Se responsablite sa a ki fè li te Bondye retire non l nan liv li te ekri a (Egzòd 32.32). Se sa ki te fè li t ap fatige kò li nan jijman pèp la (Egzòd 18.18). Pou ou yon lidè responsab, ou bezwen renonse tout sa ki ka anpeche ou byen dirije. 

8. Evite konfli

Toutotan sa depann de ou, evite tout sa ki ka kreye konfli : yon pawòl, yon desizyon, yon dezakò, silans, elatriye. Gen konfli ou p ap ka evite paske li pa depann de ou men l ap gen enpak sou travay ou nan ekip la. Yon bon lidè pa pran plezi nan kreye konfli, li evite li epi kontribye pou rezoud li si li enplike ladan. 

9. Toujou kominike

Entansyon ou ka bon epi pawòl ou di oswa aksyon ou poze bay pwolèm. Rezon an senp : ou pa kominike. Pou ou byen jere pouvwa ou, ou bezwen kominike. Sa vle di, ou bezwen fè moun ki sou tèt ou a konnen sa w ap fè epi eksplike moun ki konsène oswa ki pral fè l yo konprann. Pa kenbe yon lide, yon konsey, yon plan nan tèt ou lè ou depann nan travay ou. 

10. Pa kite anbisyon mennen w 

Pandan tout tan Jozye te bò kote Moyiz, li pa t gen lanbisyon pran plas li. Se Moyiz ki te chwazi l pou asiste li epi ranplase li. Li pa t chache tiye Moyiz ni fè konplo pou malè rive li. Li te tann lè li e lè Moyiz te mouri, Bondye te rele li (Jozye 1.1-2). David pa t chache elimine Sayil, li te tann lè li. Timote pa t bezwen fè konplo kot Pòl ki te mentò li. Disip yo pa t chache tiye Jezi ki te vin akonpli yon misyon epi voye yo (Matye 28.18-19). Pa kite anyen ni pèsonn ankouraje ou leve kont lidè ou. Depi se Bondye ki te chwazi ou, se li menm k ap mete ou nan plas ou dwe ye a.

11. Rapò 

Aprè mwen te fin bay rapò sou yon lajan mwen t ap jere, responsab la te felisite mwen pou onètete m. Yon lòt fwa ankò, gen yon zanmi ki vin di m toujou bay rapò sou sa yo ba w jere. Li di mwen li konnen etidye pou sa men se yon konsèy li ranfòse. Yo pa di yon lidè onèt sou pawòl, se rapò travay li ak bon jesyon ki fè sa. Alò, nan nenpòt ti responsablite yo ba ou, menmsi yo pa mande ou rapò, bay li.

Ekstrè DELEGASYON POUVWA NAN LIDÈCHIP KRETYEN

Jerome Dorsonne Emerson

#119| ÈSKE OU SOVE? (7)

Sijè 7. Kòman m dwe viv lè m fin sove ?

Nan 2 Korent 5.17, apot Pòl fè konnen yon moun ki nan Kris la se yon lòt moun (kreyati). Sa pa vle di li chanje fizikman, men pwiske li resevwa Sentespri nan lavi li, li se yon moun tounèf.  Li p ap viv selon panse li ankò (Galat 5.16, Filipyen 2.5, Women 12.2).

Li ap itilize kò li pou glorifye Bondye (1 Korent 6.18-20) e li renmen Bondye ak tout kè li, panse li, nanm li epi lide li (Matye 21.37). Kidonk, pawòl Bondye a motive panse li, pawòl ak aksyon li.

Men 3 lòt tèks biblik k ap montre ou kòman pou viv lavi tounèf ak etènèl ou genyen nan Kris la.

1️⃣ Efezyen 5.8

"Nan tan lontan, nou te nan fè nwa. Men koulye a, paske n ap viv ansanm nan Senyè a, nou nan limyè. Se sa ki fè, fòk nou mennen tèt nou tankou moun ki nan limyè a".

2️⃣ 1 Jan 3.9

"Si yon moun se pitit Bondye li ye, li p ap kontinye fè peche, paske pouvwa lavi ki soti nan Bondye a ap travay nan li. Si se Bondye ki papa l, li pa kapab ap fè peche toujou".

3️⃣ Galat 5.22

"Men, Lespri Bondye a bay renmen, kè kontan, kè poze, pasyans, bon kè, seryozite, li fè ou gen bon manyè".

Youn nan rezon ki fè anpil moun pa kwè sove a fèt yon sèl fwa pou tout tan se libète pou viv nan peche. Men Bib la pa anseye yon moun sove ka kontinye viv nan peche. Kidonk, yon moun ki kwè li ka fè sa li vle antanke kretyen poko sove. Se pa travay Bondye fè a ki inefikas, se nan moun nan travay la pa fèt. Nou bezwen kwè sa Bib la di pou n grandi.

Jérôme Dorsonne Emerson

#118| ÈSKE OU SOVE? (6)

Sijè 6. Pou konbyen tan ou sove ? 

Lavi Bondye te mete nan Adan an lè li te fin kreye li a pa t la pou lontan. Kwaksa, li te viv pandan 800 lane (Jenèz 5.4). Alèkile, li difisil pou viv 100 lane. 

Moyiz te di: "Dènye bout nou se swasanndizan. Si nou gen bon sante, n a wè katreventan..." (Som 90.10a)

Gen diferans ant lavi ki nan ou jodi a ak lavi Jezi ba w lè w sove. Lavi w genyen jodi a pa la pou lontan pwiske w ap mouri yon jou. Se sa Bondye te di Adan ak Èv aprè chit yo. Ou te fèt nan pousyè, se la w ap tounen ((Jenèz 3.19). Men pa bliye lavi tounèf la pa soti nan pousyè. Kidonk, lè w gen lavi ki p ap janm fini an ou genyen li pou tout tan. 

Jezi te vin mouri pou ou te ka gen lavi ki p ap janm fini an (Jan 3.16). Se pa lavi ou genyen deja a, se sa l ap ba ou a. Si akoz peche Adan, lavi fizik la ka fini, granmesi Jezi, lavi espirityèl la ap dire tout tan (Women 5.12-19). Se pa yon mòtèl ki bay li, se yon imotèl. 

Se pa nan sèks, nou jwenn lavi etènèl, se nan Lespri Bondye a ki abite nan nou. Se sa ki rele "fèt yon dezyèm fwa a" (Jan 3.6). Nikodèm te panse li te dwe antre nan vant manman l pou li te ka gen lavi sa alòske li te dwe jis resevwa Sentespri Jezi pral pwomèt nan Jan 14.16 la. 

Si yon moun pa kwè li sove pou tout tan, li pa gen konfyans nan pwomès Jezi yo. Bib la fè konnen Sentespri a se garanti Bondye ap sove nou nèt (Efezyen 4.30). Se Bib la pou nou fè konfyans. Li pa ka di "nou gen lavi ki p ap janm fini" epi pou li kontredi sa. 

Jerome Dorsonne Emerson 

#117|ÈSKE OU SOVE? (5)

Sijè 5. Kilè ou sove ? 

Se kesyon majorite moun ap poze: Wi, mwen sove men kilè m sove? Sou pwen sa a, chaje sousi ki menm rive lakoz dout ak yon tandans ki ta vle fè kwè se aprè lanmò yon moun ap konnen li sove. 

Mete sou sa, gen moun ki kwè sove tèlman difisil, li p ap janm konnen si sa rive akoz peche pandan li vivan. An reyalite, se jijman youn ap pote sou lòt ki lakoz sa. Paske, pèsonn pa ka di yon moun sove ou pa. Li pa yon sovè ni li pa yon jij. Poutan, menm Bondye k ap sove atravè Jezikris gade sa ki nan kè e non sa ki frape rega (1 Samyèl 16.7). 

Toutfwa, lè ou sove, tout moun ap wè sa paske gen fason pou yon kretyen viv (Matye 7.17, Women 6.1-2). 

Nan 1 Jan 3.9, Bib la fè konnen pitit Bondye yo (sila li sove yo) p ap kontinye fè peche. Se sa ki montre yo gen lavi tounèf la, yon lavi ki p ap janm fini. Men, se pa yon rezon pou pèsonn pwofite di Jan oswa Jàn pa sove akoz li fè yon peche (1 Jan 2.2). Ou pa konn lè li repanti (1 Jan 1.8-9). 

Sa pa vle di tou pou yon swadizan kretyen pwofite peche paske li konnen..

1) se sèl Bondye ki ka jije li, 

2) li ka gentan repanti avan li mouri ( Bib la pa anseye sa)

3) li genn dwa peche paske li gen avoka

Se twa eskiz pou yon vrè pitit Bondye pa mete devan pou li fè sa li vle. 

Men kilè ou sove? Kòman w ap fè konnen sa ? Gen 2 vèsè ki ka ede ou. 

1. Lik 23.43

Aprè brigan an te fin repanti, men sa Jezi te deklare li: "Sa m ap di ou la, se vre wi: Jodi a ou pral avè m nan paradi" (Lik 23.43).

Se pa t aprè lanmò brigan an te konnen li te sove. Paske li te fè nesesè a, li te sove. Premye leson nou ka aprann nan sa sèke dout sou sali ou soti nan yon fo repantans. Ou pa t regrèt lavi w t ap mennen nan monn lan vre. Youn nan prèv yo, ou retounen. 

Lè ou sove toutbon vre, ou rekonèt peche w yo, ou konfese yo epi ou kite yo. Se twa aksyon ki ka fè w konnen si w sove pandan ou vivan. Sentespri ap ba w prèv la nan lavi tounèf ou pral resevwa a.

2. Travay 10.44-48

Apot Pyè, pandan li t ap pale avèk Kònèy, li te bay kondisyon pou sove: gen lafwa nan Jezi (v43). E pwiske se te kay Kònèy ak tout moun ki t ap koute yo, Lik rapòte: "Pyè t ap pale toujou lè Sentespri a desann sou tout moun ki t ap koute mesaj la" (v44). 

Se pa t aprè yon tan, se te nan menm moman an, kontrèman ak brigan an ki te rekonèt peche li (san dout li te rekonèt Jezi te sovè a), Kònèy te batize nan Sentespri a (sove). 

Kilè ou sove? Ou ka sove jodi a, koulye a oswa demen. Ou ka sove depi yè, kèk jou, kèk mwa oswa lane pase. Sa depann de repantans sensè ou fè ak lavi apa w ap mennen. Sentespri a ap ba w tout prèv yo. 

Jerome Dorsonne Emerson

#116| ÈSKE OU SOVE? (4)

 

Sijè 4. Poukisa ou bezwen sove ? 

Tout moun pa chwazi sove atout Jezi vle sove tout moun. Se pou sa li te vin mouri (Lik 19.10). Lè nou tande eskiz anpil moun ap bay pou refize repanti, nou reyalize yo pa konprann enpòtans sali a fas ak danje kondanasyon an. 

Sou nesesite sali a, ta sanble gen twa gwoup moun:

1. Gen yon gwoup ki kwè aprè lanmò pa gen anyen ki ta yon jijman oswa yon lanfè. Pou gwoup sa, sove pa enpòtan. Y ap jwi lavi yo, byen bwè, byen manje, pran plezi e travay jiskaske yo mouri.

2. Gen yon lòt gwoup ki konnen gen yon jijman aprè, men sove pa enpòtan paske yo pa gen tan pou sèvi Bondye. Yo konn di levanjil twò difisil. Yo priyorize lòt nesesite tankou fanmi, etid, plezi ak travay. 

3  Gen yon dènye gwoup ki kwè sove enpòtan epi ki aksepte Jezi. Petèt, ou se youn nan gwoup sa a.

Pou twa gwoup sa yo, nou pral wè 3 tèks biblik ki montre enpòtans sove.

1  Mak 16.16

Atout sove nesesè, li rete yon chwa. Se ou ki pou deside. Nonsèlman ou dwe kwè, ou bezwen aji: vin jwenn Kris ak tout peche w yo epi batize pou antre nan fanmi an. Moun ki pa kwè yo fè chwa yo tou: yo pito kondane tèt yo. Se pa ni Bondye ni Kris ni lòm ki fè li: se chwa yo (Jan 3.17). 

3. Ebre 9.27

Kwè osinon pa nan lavi aprè lanmò, Bib la anonse yon jijman. Se sèlman pechè ki sove yo k ap epanye santans la. Pandan w vivan, li posib pou  epanye li men se pa aprè lanmò. Ò, ou pa konn kilè w ap mouri. Alò, se plis pase enpòtan pou ou sèten de sali ou jodi a menm.

3  Revelasyon 20.15

Chak fwa yon moun sove, non li ekri nan liv lavi a. Se pa nan kaye Legliz lokal la ni nan rejis lekòl oswa seminè biblik. Ou pa ka peye mete non ou ni yo p ap mete l pou richès ni pou povrete. Ou bezwen sove. Sinon, se nan letan dife a yo pral jete ou.

Anpil moun di lanfè pa egziste, yo gen rezon paske yo pa ko wè li. Men se pa sa nou kwè ak sa nou vle k ap fè lanfè oswa paradi egziste ou pa. Yon jou, tout moun gen pou kwè paske yo tout pral wè men yo p ap ka repanti. 

Jerome Dorsonne Emerson

#115| Èske ou sove (3)

Sijè 3. Ki kalite moun Jezi sove ? 

Anpil moun kwè yo pa merite sove akoz yo tèlman fè peche. Yo imajine peche sa yo tèlman gran, Bondye pa ka efase yo. Se yon tandans ki nòmal lè ou pa konnen grandè padon Bondye. Yon kwayans konsa pa evanjelik. Gen yon verite pou eksplike sa: lòm renmen kondane men Bondye pran pasyans jiskaske li sove lòm. Mete sou sa, Jezi pa t vin mouri pou kondane pechè yo (Jan 3.17; Women 5.8). Li te bay vi li pou sove yo. Konsa, tout moun ki met konfyans yo nan ki ka sove pou tout tan. 

Nou pral chache plis agiman nan Bib la.

1. Lik 19.1-10 (li tèks sa a)

Antanke nonm rich, Zache pa t ka antre nan Wayòm Bondye a (Lik 18.25). Nan epòk pa nou an, li t ap youn nan milyadè yo. Men, kontrèman ak nonm rich ki te prefere byen li nan plas sove nanm li, Zache te pi entèlijan. Li te fè sa anpil moun ki rich nan move zafè ki bezwen sove refize fè pandan w ap li tèks sa a: 

RESTITISYON. Jwif yo te wè Jezi a mal nan aksyon li an. Yo te plis wè eta Zache ki te dwe mouri akoz repitasyon li nan sosyete a. Poutan, yo pa t wè konpasyon ak pouvwa Jezi te genyen. Li posib pou w ap imajine lanfè akoz mal ou te fè men ou pa dwe kondane tèt ou paske Jezi vle e li kapab sove w.

2. 1 Korent 6.9-11 (li tèks sa a)

Apot Pòl bay yon lis kalite moun ki p ap ka eritye Wayòm syèl la. Pami yo, adiltè, omoseksyèl, vòlè ak tafyatè. Èske yo p ap janm ka sove vre? Koute sa apot Pòl reponn: "Anpil nan nou, se sa menm nou te ye. Men, koulye a Bondye mete nou nan kondisyon pou nou sèvi l". Pastè, dyak, evanjelis ak tout tit ou konnen yo pa t fèt tou konsa. Okontrè, se Lespri Bondye ki te ba yo don pou yo te ka travay nan kò Kris la. Tout te pechè menm jan avèk ou e yo t ap peri menm jan an si yo pa t konvèti. Se granmesi lakwa ki fè nenpòt moun ka sove depi li repanti. Ou menm tou, ou kapab. 

3. Lik 23.39-43 (li tèks sa a)

Kilès ki pa ta renmen wè Jezi, menm nan rèv? Konbyen moun k ap tann anlèvman pou al rankontre li? Tout kretyen, menm mò yo (1 Tesalonisyen 4.13-18). Imajine ou de vòlè kondane amò gen tan jwi privilèj sila. Anplis, Jezi pa t menm ko mouri, ni antere, ni resisite, ni monte nan syèl. Gade yon okazyon!!!! Yon vòlè lajistis kondane sove avan jij li yo e ou menm sosyete a rejte? 

Pou n fini, men sa kòmantatè "Le commentaire Biblique du disciple" yo ekri sou pwomès Jezi a, lè li te di: "Jodi a ou pral avè m nan paradi." (Lik 23.43)

Jodi a: Gad kòman yon bagay rapid!

Avèk mwen: Gade yon akonpayman!

Nan paradi: Gade yon lonè! 

Pou kilès tout sa? Pou yon vòlè ki repanti. 

Alò, ki kalite moun Jezi sove? Nenpòt pechè ki repanti. Ou ladan!

Sa enposib pou ou? Men repons Jezi a: " Sa lèzòm pa ka fè, Bondye ka fè l". (Lik 18.27)

Jerome Dorsonne Emerson

#114| Èske ou sove (2)

Sijè 2. Kilès ki ka sove ou ? 

Si sove se delivre anba pouvwa peche pou tout tan nan sans espirityèl, kilès ki ka sove ou? Kilès ki gen misyon ak pouvwa pou sove w? 

Gen plizyè vèsè nan Bib la ki reponn kesyon sa a men majorite moun konnen Jan 3.16. An n nou dekouvri lòt vèsè nan lòt liv.

1. Travay 4.12

Se li menm sèl [Jezi] ki ka bay delivrans paske Bondye pa bay non okenn lòt moun sou latè ki kapab delivre nou.

2. Lik 19.10

Moun Bondye voye nan lachè a [Jezi] vin chache sa ki te pèdi pou l delivre yo.

3. 1 Jan 5.11

Men pawòl verite a: Bondye ban nou lavi ki p ap janm fini an. Se nan Pitit li a li ban nou li.

4. Jan 14.6

Jezi reponn li: Se mwen menm ki chemen an. Se mwen menm ki verite a, se mwen menm ki lavi a. Pesonn pa ka al jwenn Papa a si li pa pase nan mwen.

Li enpòtan pou ou konnen, konprann ak metrize tèks ki montre se Jezi e se li menm sèl ki ka sove ou pou pèsonn ni okenn lespri pa fè ou kwè gen yon lòt. Paske, se pa yon pastè, yon predikatè, yon pwofèt oswa yon evanjelis k ap ka sove w. 

#1. Kisa sove vle di?

Jerome Dorsonne Emerson

#113| 12 prensip pou yon dirijan sèvis aplike

Men 12 prensip yon adoratè(tris) ta dwe aplike lè li envite pou al dirije nan yon legliz oubyen yon aktivite evanjelik.

 1-Toujou li avèk anpil atansyon lèt envitasyon an :

- Gade sijè oubyen tèm lan byen

- Gade lè kòmanse ak lè tèmine a byen

 2-Chante chan ki gen rapò ak sikonstans lan.

 3-Bat pou w pa janm koz ki fè yo pa tèmine sèvis la atan.

- Si pa malè ou ta rive anreta pa rekòmanse sèvis la, kontinye sou menm lanse a

-Li pa obligasyon pou w chante tout sis(6) chan ou te prepare yo si w wè lè a gentan avanse anpil.

 4-Toujou kite ase tan pou predikatè a preche, pa egzanp :

-Si yo kòmanse 6h-8h, fè tout sa w kapab pou w remèt predikatè a nan 7h15... konsa.

 5-Toujou adapte w ak prensip legliz ou envite a :

- Yo kwè nan mare tèt; mare tèt ou👳‍♀️

- Yo pa kwè nan priye an lang e pale an lang, fè sèvis la san w pa fè sa (Sentespri pa manifeste tankou demon, ou dwe gen kontwòl tèt ou).

- Yo kwè sentsèn lan nan youn oubyen plizyè vè pran l jan yo fè l la, sa p ap fè w pa sove 

- Yo pa yon legliz ki renmen vole, danse lè y ap adore, adore ak yo jan yo vle l la, Sentespri p ap deranje pou pyès sa yo.

Apot Pòl di: Se pou nou fè tankou m: nan tou sa m ap fè, M ap fè mwayen posib pou m fè tout moun plezi; mwen p ap chache avantaj pa m, men avantaj tout moun, ...(1 Korent 10.32)

 6-Li pa fin saj pou bay predikatè ki gen pou preche a fè yon priyè avan predikasyon l lan, pa epuize l avan lè pa l la.

 7-Pa fè priyè yo tèlman long si se pa nan vèy de nuit, fè yo 5 a 10 minit pou pi plis.

 8-Evite fè asanble a kanpe pandan 4, 5, 6 fwa; pafwa 2 a 3 fwa sifi selon sa w ap fè nan sèvis la.

 9-Toujou sonje se pa ou ki predikatè a, evite fè anpil kòmantè ki pa gen rapò ak wòl ou kòm adoratè(tris).

 10-Fè tout bagay nan lanmou, imilite ak respè.

 11-Toujou met nan tèt ou se Jezi ki STAR a se pa ou menm :

-Efase w pou Jezi parèt

-Bese w pou Jezi leve

 12-Toujou remèsye lidè legliz ki envite w la e pa bliye di kiyès ki nan tèt ou, kiyès ki voye w; pastè w, oubyen prezidan w. +Lwayote.

-Toujou montre yo jan w kontan paske yo envite w (Legliz, ministè ou ye a)

...Bonis

 13-Onore e respekte Ing son an ak mizisyen yo menm jan ou te ka fè sa pou yon pastè, elatriye.

- Pa sèvi kòm yon ajan dekourajman pou mizisyen yo

- Toujou salye prezans yo

- Toujou envite yo pou yo akonpanye w nan pakou sèvis la

- Pa reprimande yo piblikman

- Konnen gen mizisyen ki pi zanmi ak Bondye pase ou e ki ka fè mye pase  w avèk gras Bondye.

Prensip sa yo pa kont manifestasyon Sentespri, okontrè se Sentespri ki dwe dirije nou nan tout sa n ap fè. 

Raple w ou p ap ka fin adore Bondye yon sèl jou. Otè a di menm si l ta pran dimil ane li p ap ka fin dil konbyen li dwe l. Donk, an nou eseye respekte lè ak prensip nan sèvis n ap fè pou Bondye yo. SENTESPRI PA DEZÒD.

Aprè ou fin li mesaj sa a, mwen panse w ap aprann yon bagay kanmenm; ebyen mwen ankouraje w :

Mitchaël Auguste, suiv li sou Facebook

Prezidan MPV

Senmak, Ayiti

#112| Eske ou sove deja?(1)

Sijè 1. Kisa sove vle di? 

Diksyonè fransè ak kreyòl defini sove konsa: prezève, garanti, retire yon [moun] nan yon danje, jistifye, epanye, chape, kouri, delivre. Li gen sans viktwa, pwoteksyon.

Nan lang grèk la, se mo "soteria" ki tradwi delivrans, konsèvasyon, sekirite nan lang fransè.

Nan kontèks biblik, yon moun (nanm) sove lè li delivre anba pouvwa peche pou tout tan. Se pa yon delivrans fizik, men espirityèl. Se sa ki fè, youn nan sans sove se "lavi ki p ap janm fini an". Jezi te di: "Tout moun ki va mete konfyans yo nan li p ap pèdi lavi yo. Okontrè, y a gen lavi ki p ap janm fini an "(Jan 3.16). 

Se pa tout kote mo sove (delivre) a ekri nan Bib la li vle di sove nan peche. Nan Jenèz 45.5, Jozèf di frè li yo Bondye te voye li devan yo pou sove lavi yo. Se diferan pou Jezi Bondye te voye pou sove nanm pechè yo. Youn fizik, lòt la espirityèl. Ankò, nan Matye 14.30, Pyè mande pou Jezi sove li anba van an akoz li te pè. Se pa t sove nan peche.

Plizyè sans sove nan kontèks Bib la. 

Gen anpil mo ak ekspresyon biblik nou konprann ki kontrè  sove. Poutan, yo chak se yon aspè ladan. Men 12 ladan yo, ou ka fè plis rechèch pou dekouvri rapò yo avèk sove.

1. Kwè nan Jezi

2. Fèt yon dezyèm fwa

3. Batize nan Sentespri

4. Jistifikasyon

5. Adopsyon

6. Rejenerasyon

7. Sanntifikasyon

8. Kretyen

9. Pitit Bondye

10. Lavi ki p ap janm fini an

11. Rachte

12. Mouri nan Kris

Jerome Dorsonne Emerson

Foto: Fréquence Chrétienne

#111| Atitid lòm devan peche (8)

8. Ou tire leson nan koz ak konsekans peche a

Gen bagay ou te fè pou jwèt, pou plezi, jis paske ou pa t panse konsekans yo t ap grav. Se sa ki fè gen moun ki kwè gen ti ak gwo peche. An nou wè si Bib la kore sa.

1. Jamè Èv ak Adan pa t ap chwazi manje fwi a si yo te konnen sanksyon Bondye a te serye.

2. Sayil pa t ap dezobeyi lòd Bondye si li te kwè li t ap pèdi twòn nan.

3. Jamè David pa t ap tante gade Batcheba k ap benyen jis pou l te rive kouche avèk li si li te konnen sa ta pral divize Wayòm li an toutbon.

4. Jamè Amnon pa t ap chwazi vyole sè li Tama si li te konnen sa t ap lakoz lanmò li.

5. Jamè Ananyas ak Safira pa t ap di l vann tè pou kòb li pa vo si yo te gentan wè lanmò yo.

6. Jamè, Pòl pa t ap chwazi pèsekite legliz Kris la si li te konnen sa ki ta pral rive li sou Wout Damas.

Tout moun sa yo, ak lòt, te sibi konsekans peche yo men yo tout pa t gen chans pran leson epi rekòmanse. Alò, si ou pa chanje atitid ou devan peche ak tout sitiyasyon ki ka fè ou tonbe nan peche, li posib pou peye konsekans ki grav nan lavi w. 

Kifè, si nan moman w ap li tèks sa, ou fin uit leson nan etid sa a epi ou santi w koupab de yon peche ou toujou ap fè epi w vivan, se moman pou ou repanti epi pratike pawòl Bondye a. Pandan w ap reflechi, sonje pa gen moun k ap panse pou deside nan plas ou. Se ou menm ki pou konnen sa ki bon ak sa ki pa bon paske relasyon ou ak Bondye pèsonèl. 

Jerome Dorsonne Emerson

#110| Atitid lòm devan peche (7)

 7. Ou deside pa refè peche a

Youn nan prèv ki montre w regrèt peche w fè se lè w deside pa refè l ankò. Bondye wè efò w ap fè yo, li konn sa w vle ak sa w pa vle. Menmsi sa ta rive ou refè yon peche, pa kondane tèt ou ni di Bondye p ap padone w paske Bib la di : « Senyè a gen kè sansib, li gen bon kè. Li pa fè kòlè fasil, li p ap janm sispann renmen nou » (Som 103.8). Konsa tou, pinga w pwofite fè peche paske w konnen Bondye renmen w. 

Kilès ki ta di Bondye t ap pini David paske se li ki te chwazi li ? Kilès ki ta panse se konsa Moyiz, bon zanmi Bondye, ta mouri ? Eske w ta imajine Bondye t ap mete Adan e Èv deyò nan jaden an ? Petèt non, men sa te fèt e w ap toujou gen sezisman chak fwa w ap inyore peche w yo nan lespri Bondye p ap di anyen. 

Si w te deside pa refè yon peche e ou ta santi w pa ka reziste, raple w pawòl sa apot Pòl te ekri kretyen nan lavil Filip yo : « Nenpòt sitiyasyon ki parèt devan mwen, m ap degaje m, granmesi Kris la ki ban mwen fòs kouray » (Filipyen 4.13). 

Pa bliye peche fè pati konba espirityèl la. Se pa lapriyè pou chase demon sèlman men pou w viv yon vi sanktifye. Kidonk, pa neglije pran e itilize zam Bondye mete pou sa (Efezyen 6.10-18). 

Jerome Dorsonne Emerson

#109| Atitid lòm devan peche (6)

6. Ou rekonèt peche a

Rekonèt peche w se avwe li, konfese li, dakò ou vyole yon prensip ou te dwe respekte antanke kretyen. Se youn nan prèv ou se pitit Bondye tout bon lè ou rekonèt mal ou fè tankou David ki te rekonèt adiltè li te fè ak Pyè ki te konsyan li te renye Jezikris. 

Sepandan, jan nou te di l nan atitid avan yo, fòk ou gen konesans pou w ka idantifiye peche a. Pou ou pa vyole yon lwa, ou te dwe konnen li. Sinon, ou ka plede vyole li san w pa janm rann kont. Sa montre nou enpòtans etid biblik ak lekti Bib la ak tout lòt liv k ap fòme ou pou w ka fè levanjil la byen. Inyorans se tankou yon vwal ki anpeche w wè, se yon andikap. Dèfwa, se pa eksprè yon moun fè lè li fè yon mal men li pa konnen si se yon mal. 

Chak fwa ou fè yon peche, ou dwe rekonèt li paske se sa Bib la di : «…si nou rekonèt devan Bondye nou fè peche, nou mèt gen konfyans nan li. Paske l ap fè sa gen pou fèt la : l a padone tout peche nou yo, l a netwaye nou anba tou sa ki mal. Men, si nou di nou pa t fè peche, nou fè Bondye pase pou mantò. Pawòl li pa nan kè nou "(1 Jan 1.9). 

Sepandan, ou bezwen konnen rekonesans peche a, konfesyon ou ak padon ou jwenn pa renouvle posiblite pou fè peche ni ba w dwa refè li. Ou pa janm konnen si se pa dènye fwa w ap fè li. Bondye ka padone w men w ap peye konsekans la. Ou ka bay manti epi Bondye padone w men pa bliye Ananyas ak Safira pa t jwenn chans sa a de fwa (Travay 5.1-5). 

Jerome Dorsonne Emerson

#108| Diferans ant pouvwa ak otorite

 

Si pouvwa se kapasite pou enfliyanse, otorite se pouvwa pou fè moun ou enfliyanse a obeyi ou. Nan yon lòt fason, otorite se pouvwa yon lidè genyen pou fè obeyi li, suiv li, konprann li, mache nan lojik li, deside, chanje lide, pran kouraj, pou nou site sa yo sèlman. Nan 1 Timote 3.4, Pòl montre otorite se youn nan kondisyon pou vin yon lidè nan legliz lokal: “Se pou l konn mennen kay li byen, fè timoun li yo obeyi l ak respè”. Nan sans sa a, li pa sifi pou yon lidè gen pouvwa. Sa vle di, li nan yon pozisyon pou li aji e li ka aji men si yo pa obeyi li, li pa gen otorite. 

[Daprè tout detay nou sot wè sou pouvwa], nou ka dakò tout moun gen pouvwa pou deside ak enfliyanse lòt moun. Yon paran, yon timoun, yon pwofesè, yon elèv lekòl, yo chak gen pouvwa men nan kad administrasyon fanmi an, pouvwa paran an lejitim. Se li menm ki deside pou pitit li. Nan lekòl la, se konsa tou: pwofesè a gen pouvwa direksyon an ba li pou deside pou elèv la.

Nan politik ak Leta, se menm jan an. Tout sitwayen gen pouvwa men se yon majistra ki ka deside pou vil l ap dirije a. Pakont, se chak lokatè oswa propriyetè ki ka deside pou kay li. Yo tou jwenn otorizasyon Leta oswa gouvènman an. Nan sans sa a, yo di otorite se yon dwa legal e fòmèl. Nenpòt sitwayen ka dezobeyi yon lòt ki pa gen otorite pou kòmande li.

Yon manm legliz la ka pi konpetan pase yon dirijan. Akoz li pa gen otorite, li pa ka deside nan plas li. Konsa, pozisyon ou ka detèmine otorite ou genyen men sa pa vle di w ap ka fè oswa jwenn tout sa ou vle.

Jerome Dorsonne Emerson

Ektrè liv "DELEGASYON POUVWA NAN LIDECHIP KRETYEN"

Yon gid pou seminè

#107| Atitid lòm devan peche (5)

 

5. Ou bay lòt moun responsab peche a

« Senyè Bondye a mande fanm nan : Poukisa ou fè sa ? Fanm lan reponn li : Se pa mwen non ! Se sèpan an wi ki pran tèt mwen ki fè m manje l » (Jenèz 3.13). 

Ou dwe konnen peche a se responsablite ou nenpòt rezon ki ta lakoz li. Lè w ap defann tèt ou, ou ka peche : ou tiye yon moun ki te vle tiye w. Lè w pa tande konsèy, ou ka peche (Pwovèb 1.5). 

Lè w pa li Bib ou pou konnen sa Bondye pa vle, ou ka peche. Lè w kite zanmi pran tèt ou, twonpe w, ba w move konsèy, ou ka peche (Som 1.1-2 ; 1 Korent 15.33). Finalman, lè w pa vle reziste anba tantasyon, ou ka peche (1 Pyè 5.8). 

Èv te byen konnen li pa t dwe manje fwi a (Jenèz 3.2-3), men li te kite avantaj yo fè li tonbe epi li akize koulèv la. Bay lòt moun responsab peche osinon erè w fè ka gen plizyè sans.

Dabò, ou meprize travay Sentespri a nan lavi w paske li la pou l konvenk ou sou peche. Ansuit, ou iresponsab paske se ou ki te chwazi peche, ou pa ka akize lòt moun. Ofinal, se ka yon mechanste tou paske ou prefere yon lòt moun sibi konsekans la nan plas ou, menm jan Èv te fè l pou sèpan an e Adan pou Èv. Kidonk, pa pran konsyans ou te fè peche ka agrave konsekans la.

Bondye pa yon jij ki bezwen tande akize pou li jije. Li pa bezwen pledwari yon avoka nonplis pou bay santans li paske li omniprezan e li pa nan patipri. Toutfwa, Jezi se sèl avoka ki ka plede pou ou bò kote Bondye lè ou peche (1 Jan 2.1-2). Sepandan, ou dwe rekonèt peche ou epi pa kontinye paske menm lè Bondye padone w, w ap peye konsekans peche a.

Jerome Dorsonne Emerson