#130| Radyografi evanjelizasyon an (7)

 

7. KILÈ ou ka evanjelize?

Men sa frè Lik ekri : "[Chak jou] yo te nan tanp lan, yo t ap mache kay an kay, yo pa t janm sispann moutre moun yo anpil bagay. Yo t ap anonse Bon Nouvèl ki pale sou Jezikri a". (Travay 5.42)

Youn nan pi gwo eskiz kretyen renmen bay pou evite evanjelize se pwoblèm tan: "M pa gen tan". Ekiz sa ka gen plizyè sans ki remete lafwa an kesyon:

1️⃣ Sove nanm pa entèrese w.

Sove oswa preche yon nanm pa misyon ou. Li pa gen valè. 

2️⃣ Ou pa prè pou fè sa.

Nenpòt kretyen ki byen fòme nan evanjelizasyon ap konnen li ka evanjelize nan nenpòt okazyon. Pou sa, li toujou prè depi li nesesè. Pwiske w ka evanjelize tout kote, nenpòt kote ou ye sa posib.

3️⃣ Ou pa rekonesan

Imajine ou si pa t gen pèsonn pou preche Levanjil, kòman w t ap fè konvèti ? Alò, poukisa w pa ka gen tan pou fè sa pou lòt moun?

4️⃣ Ou pa konn valè san Anyo a

Refize evanjelize ta vle di san Jezi te koule anven. Ou gen tan pou fè tout bagay, sof pou pale moun de li.

5️⃣ Ou wont evanjelize

Wi, gen kwayan ki wont pale de Kris pou yo pa konnen yo se kretyen. Poutan, yo fè lòt bagay devan moun san krentif pou Bondye.

Sa ka rive ou pa gen tan nan yon okazyon, yon travay oswa yon pwoblèm w ap andire men sa pa ka rete tout tan pandan w chaje tan pou pran plezi.

E si w te pran sèlman 5 minit chak jou pou di yon zanmi, sou Facebook, nan estati Whatsapp ou : JEZI VLE SOVE W! PA KITE LANMÒ PASE AVAN OU FÈ SA.

Chak semèn, ou t ap fè 35 minit, 150 nan yon mwa, 1825 minit nan yon lane. Menmsi yon sèl nanm sove, t ap gen fèt nan syèl la.

Jérôme Dorsonne Emerson
-FINISMAN-

#129| Radyografi evanjelizasyon an (6)

 6. KÒMAN ou ka evanjelize?

Pou evanjelize, ou bezwen itilize yon metòd ki efikas.

Gen 2 gran metòd pou evanjelize:

1. Evanjelizasyon demas: yon sèl oswa plizyè moun k ap evanjelize anpil moun

2. Evanjelizasyon pèsonèl: yon sèl moun k ap evanjelize yon moun.

Gen plizyè estrateji ki ka ede nan sans sa a: 

1. De pa 2 (Lik 10.1)
2. Pòt an pòt: Évangéliser de porte en porte
2. Konfwontasyon (2 Timote 4.2)
3. Temwanyaj ( Jan 9.1-7)
4. Entelektyèl (Travay 17.2-4)
5. Entèpèsonèl - Zanmi  (Lik 5.27-29)
6. Envitasyon (Jan 4.28-29)
7. Rann sevis (Travay 9.36)
8. Etid biblik (2 Timote 3.16-17)
9. Lekti biblik (Jozye 1.8)

Sa ki esansyèl la nan nenpòt metòd oswa estrateji a se mesaj la: levanjil ki prezante Jezikris epi objektif la ki se rezilta a.

🔴 Mesaj sou Kris la pa dwe chanje nan kèlkeswa metòd la. Se bon nouvèl li a ki pou preche paske se li menm sèl ki ka sove moun k ap tande a. (Travay 4.12)

🔴 Objektif evanjelizasyon an se KONVENK POU SOVE. Fòse, manti, tòde vèsè, fo pwomès pa ladan.

🔴 Kondisyon pou sove a pa gen dwa chanje nonplis: se lafwa, se pa zèv, volonte lòm, lapriyè, legliz lokal, elatriye. Se gras Jezi fè tout moun li sove (Efezyen 2.8-9).

Ou menm k ap evanjelize a, w ap fè PWOKLAMASYON (Travay 13.16). Si se yon sèl moun w ap evanjelize, se "evanjelizasyon pèsonèl" (Travay 8.26-37), si se plizyè (tounen, kwazad, plennè...) se "evanjelizasyon an mas" (Travay 2.14-36).

Pwoklame levanjil la se travay ou (Mak 16.15) tandike sila k ap tande a gen pou pran yon DESIZYON. Desizyon sa a ka pozitif (Travay 2.42), li ka negatif (Lik 18.18-25, Travay 13.16-45).

☝️PA JANM BLIYE !

1. Nenpòt metòd la, pa chanje mesaj la: Preche Kris !
2. Pwoklamasyon se devwa w, desizyon se devwa pechè a, pa fòse l ni ba l manti pou li deside.

Jérôme Dorsonne Emerson

#128| Radyografi evanjelizasyon an (5)

5. Ki kote ou ka evanjelize?

An nou reli sa Jezi te di disip li yo lè li t ap ba yo misyon evanjelize : "Ale toupatou sou latè, anonse Bon Nouvèl la bay tout moun"(Mak 16.15).

Disip yo te tèlman anvi viv nan wayòm Jezi t ap pwomèt yo a, yo te bezwen konnen si li t ap vini pandan yo te vivan. Se tankou yo te panse se yon wayòm politik menm jan ak sa koulye yo. Moun ki imajine Jezi te dwe vini deja t ap poze kesyon sa a tou. Ebyen, men sa Jezi te reponn: Men, lè Sentespri a va desann sou nou, n a resevwa yon pouvwa. Lè sa a, n a sèvi m temwen nan Jerizalèm, nan tout peyi Jide ak nan tout peyi Samari, jouk nan dènye bout latè. (Travay 1.8)

Nou ta di plan sa a sou katriyèm faz li: 

1.JERIZALÈM 

2. JIDE

3 SAMARI

4. ZÒN W AP VIV KOULYE A

Se yon plan ki gen plizyè sans: 

1. Se pa t disip yo sèlman ki te gen misyon an pwiske yo pa t gentan vin nan zòn ou ye a avan yo mouri. Menm apot Jan, dènye apot ki te viv nan tan Jezi a pa t rive. Li te mouri nan lane 100 yo konsa. Si w la, ou gen yon misyon. 

2. Ou pa oblije deplase ale lwen, tankou Pestèl oswa Fòlibète, pou evanjelize. Fè li lakay ou, nan travay ou, lekòl ou, nan zòn ou, lekòl ou, sou tout rezo sosyal ou ye.

Pou nou rezime, ou dwe evanjelize : 

1. Tout kote ki gen moun

2. Kote ki gen moun ki poko aksepte Jezi

3. Kote  w ap aprann: lekòl, inivèsite…

Ou konn listwa sa? 

De jèn gason te tande pale de yon zile nan Lanmè Karayib la kote te gen 40 mil afriken esklav. Pèsonn pa t ka ale sou zile sa a si se pa t antanke esklav. 2 jèn sa yo te gen konpasyon pou esklav sa yo. Yo te vin rann yo kont y ap peri nan peche yo si yo pa t tande Levanjil la. Ebyen, jèn Morav sa yo vann tèt yo pou esklav pou yo ka atenn esklav sa yo. Pandan yo t ap kite "Port Hambourg" nan peyi Almay, men dènye pawòl yo te di ap travèse lanmè yo jouk jounen jodi a. Yo te di: Nou pral chache rekonpans sakrifis Anyo a.(LES MORAVES, La Houllete du Berger, p140, S E4). 

Èske w ap dakò esklav pou w sove yon moun?

Kèlkeswa repons ou bay la, devwa ou se evanjelize tout kote ki gen moun e sitou moun ki poko aksepte Jezi. 

Jérôme Dorsonne Emerson

#127| Radyografi evanjelizasyon an (4)

4. KILÈS ou ka evanjelize?

Anpil fwa, nan evanjelizasyon an, ou konn chwazi moun pou evanjelize. Èske se byen? Men sa Jezi te di disip li yo lè li te ba yo misyon evanjelize : 

" Ale fè disip pou mwen nan tout nasyon, batize yo nan non Papa a, Pitit la ak Sentespri a"(Matye 28.19)

Bondye te chwazi Jezi, yon jwif, pou sove tout moun nan monn lan (Jan 3.16; Travay 4.12). Li menm, li te chwazi 12 disip pou akonpanye li. Kidonk, se tout moun ki vivan ki bezwen tande levanjil. Kanta pou kwè a, sa depann de yo. 

Gen moun ki kwè LEVANJIL pa pou Ayisyen paske Jezi pa t vin pou Ayiti. Kisa w panse? Repons ou jwenn pou kesyon sa yo ka ede ou konvenk sila ki kwè ladan yo. 

1. Kilès ki te kreye solèy la? 

2. Kilès ki te lakoz tout moun ka mouri jodi a? 

3. Èske dènye jijman an pa pou ayisyen?

4. Èske Ayiti pa fè pati dènye bout latè a(Travay 1.8)?

Nan Travay 10.34-35, men sa Pyè te deklare sou koze sa: “Wi, kounye a, mwen konprann sa se vre: Bondye pa gade sou figi moun. Li kontan ak tout moun nan tout nasyon ki gen krentif pou li epi ki fè sa ki dwat devan li”. 

Pa gen kesyon de peyi, ras oswa nasyonalite pou yon moun ka tande levanjil epi kwè nan Jezikri pou li vin pitit Bondye. Bondye pa gade sou nasyonalite ou ni sou koulè po pèsonn. Pakonsekan, ou ka preche tout moun, men se sila ki kwè yo k ap konvèti paske evanjelizasyon an gen 2 rezilta. Lè ou fin pwoklame, w ap jwenn yon...

1. REZILTA POZITIF : Pechè a aksepte Kris, li konvèti epi li prepare pou resevwa batèm ak sèvi Bondye tankou tout sèvitè l yo. 

2. REZILTA NEGATIF: Pechè pa aksepte Kris. Kidonk, li pa dakò konvèti. 

Nan nenpòt ka a, depi se levanjil ou te byen preche yon moun ki pa konvèti (Mak 16.16), ou pa responsab. (Jan 3.19). Konsa tou, depi gen posiblite, ou ka kontinye preche li. 

Pa janm bliye sa! 

1. Moun rich te refize lavi etènèl (Lik 18.18-25) tankou moun rich te aksepte li tou (Travay 8.26-36). 

2. Pa gade pèsonn sou aparans pou jije li pa bezwen sove (Travay 10.34)

3. Timoun pa w ak sila k ap rann ou sèvis, jeran lakou w, kliyan ou, anplwaye ou, patwon ou, zanmi (kèlke swa relasyon, nivo entèlektyèl, nasyonalite li) oswa ènmi ou, bezwen Jezi menm jan ak tout moun (1 Timote 2.4)

Jerome Dorsonne Emerson

#126| Radyografi evanjelizasyon (3)

3. Kilès ki ka evanjelize?

Nenpòt moun ki kwè nan Jezi ka evanjelize men pwiske evanjelize se pa di sa ou panse, li bon pou tout kretyen ki vle fè sa aprann li paske li mande plis pase sa ou te tande ki te fè ou konvèti. 

Se tankou lè ou te lekòl, ou te gen yon pwofesè ki t ap aprann ou. Paske ou te etidye epi konn leson ou, ou te pase klas la. Sepandan, si ou vle vin pwofesè, ou bezwen aprann pou w ka gen metòd, e menm metòd ki pi efikas, pou anseye. 

Se menm jan pou evanjelizasyon an. Yon moun te pale ou de Jezi epi ou te kwè nan li. Koulye a, ou se disip, ou bezwen aprann kòman pou w fè yon lòt moun kwè nan Jezi.  

Sonje☝️

1️⃣ Malgre Jezi te ka mete tout pawòl nan bouch disip yo pou yo preche, li te pase plizyè lane ap fòme yo (Matye 4.19) avan li te voye yo nan misyon (Matye 28.19). Kilès k ap fòme ou pou ou ka konn evanjelize?

2️⃣ Apot Pòl te konn lalwa Moyiz la byen. Se Gamalyèl ki te fòme li. Poutan, se Jezi ki te anseye li Levanjil (Galat 1.12). Kidonk, se pa yon jou li te leve epi li al preche ak anseye. Jezi te chwazi li, se vre, men li te dwe jwenn fòmasyon paske lalwa pa menm ak lagras.  

3️⃣ Aprè evanjelizasyon, raple ou twazyèm lòd Jezi te bay la: montre yo pou yo obsève tou sa mwen te ban nou lòd fè (Matye 28.20). Alò, avan ou evanjelize, ou bezwen konnen sa Jezi te montre disip li yo. 

Anpil fwa, kretyen ki gen zèl pou evanjelize yo pa gen zèl pou jwenn bon jan ansèyman. Nan plas evanjelizasyon, yo fè moral, yo joure, yo di sa yo panse, y ap chache fè moun kwè nan relijyon oswa doktrin yo alòske se LEVANJIL yo dwe preche. E levanjil, se nouvèl ki pale sou Jezikri a, se pa sou yon legliz lokal, yon misyon ni yon gwoup moun. 

Boutofen, men kilès ki ka evanjelize : 

1. Moun ki kwè evanjelize se misyon li (1 Korent 9.16)

2. Moun ki fòme pou sa. Se pa fòseman nan lekòl biblik. (Matye  4.19, Galat 1.12) Ou ka suiv yon bon fòmasyon legliz ou oswa nan seminè k ap byen prepare ou. Aprè, ou ka kontinye fòme tèt ou nan liv.

3. Moun ki resevwa apèl pou fè sa. Gen moun Bondye rele espesyalman pou fè travay sa a. Yo se evanjelis. Yo menm tou ka fòme ou (Travay 9.15; Efezyen 4.11).

4. Moun ki renmen Bondye. Depi w renmen Bondye, w ap renmen wè glwa li. Se sa ki pral motive ou pale de renmen sa a tout kote ou pase. (Matye 21.37, Jan 14.15).

5. Moun ki gen konpasyon pou nanm ki pèdi. Ou pa ka anpeche moun mouri men ou ka ede yo viv yon lòt fwa aprè lanmò. (Matye 9.36-38).

 

Jérôme Dorsonne Emerson