#4| Kèk detay sou kalite lapriyè yo

 

Jezi te aprann disip li yo priye (Lik 11.1) men gen plizyè kalite lapriyè nou ka fè jan apot Pòl fè konnen sa nan Filiyen 4.6: "Nan tout sikonstans, mande Bondye tou sa nou bezwen nan lapriyè". 

Nan atik sa a, n ap tante eksplike ou plizyè kalite lapriyè ou ka fè.

1. Sipilikasyon : Sipliye Bondye pou yon bezwen pèsonèl (Filipyen 4.6).

2. Entèsesyon : Mande Bondye yon bagay pou yon lòt moun : zanmi oswa lènmi, senp sitwayen oswa otorite. Yon kretyen pa pran plezi nan pale frè li, sè li ak nenpòt sitwayen an mal, djòb li se evanjelize ak entèsede (1 Tesa 5.23).   

3. Lafwa : Deman pou gerizon oswa pou Bondye fè mirak. Chak fwa nou konnen yon fidèl ki malad oswa nou nan moman difisil, nou bezwen priye Bondye pou li aji (Jak 5.16). 

4. Aksyon degras/remèsiman : Pou di Bondye mèsi pou gras li, bonte li. Nou montre nou rekonesan anvè tout sa li fè ki bon pou nou. (1 Timote 2.1).    

5. Konfesyon/repantans : Priye pou konfese peche ou fè epi pran desizyon pou ou pa rekòmanse. Depi ou santi ou koupab de yon pawòl, yon aksyon, ou bezwen konfese li. Sèlman, si se kont Bondye ou peche oswa ou rann ou kont yon mal ou fè envolontèman (1 Jan 1.8-9).

6. Konsekrasyon : Ou fè priyè sa a pou konsakre lavi ou oswa yon bagay/yon lòt moun (timoun) bay Bondye. Nan 1 Samyèl 2.27-28).

7. Adorasyon : Lapriyè adorasyon se lè w ap chache fas Bondye avan men li. Fas Bondye se esans sa li ye. Men Bondye se benediksyon li bay, sa li fè. Fas Bondye reprezante pèsonalite li ak prezans li. Men Bondye fè nou jwenn sa nou bezwen. Mwen aprann si se men Bondye n ap chache, nou riske neglije fas li. Sepandan, si n ap chache fas li, l ap louvri men li avèk lajwa pou li ka satisfè bezwen kè nou plis bezwen. (Daniel D. Henderson)

8. Madichon : Nou jwenn kalite lapriyè sa a nan liv Som yo lè moun ki jis yo t ap priye Bondye pou jijman ak kòlè Bondye tonbe sou moun ki enjis yo (Som 7,55, 69). Jezi te konn reprimande enjis yo, mechan yo ak lidè yo. Sepandan, li pa t janm aprann disip yo sa ni mande madichon pou yo (Matye 5.44). Priyè madichon diferan de denonsyasyon move zak lòt moun yo ap fè (Efezyen 5.11).

Chak lapriyè sa yo ka fèt sou de fò: 

1. Lapriyè pèsonèl: yon sèl kretyen deside priye pou kont li nan yon lye sekrè. Li chwazi nenpòt kalite a.

2. Lapriyè kolektif: ansanm, nan yon sèvis legliz la oswa yon lòt kote, plizyè kwayan mete ansanm pou fè yon rekèt.

Jérome D. Emerson

#3| Èske yon kretyen ka fè priyè madichon?

"Men mwen menm, men sa m ap di nou: renmen tout lènmi nou yo, lapriyè pou moun k ap pèsekite nou". (Matye 5.44)

Lapriyè madichon (prière d'imprécation) se yon demann yon kwayan ka fè Bondye pou jijman li ak kòlè li tonbe sou mechan yo oswa moun k ap pèsekite li. Se sèvitè ki te dwat ki te konn fè kalite lapriyè sa paske depi ou p ap sèvi Bondye byen, li pa tande priyè ou (Pwovèb 15.8, 29; 28.9). 

Repons pou kesyon an se “non”. 

Men kèk rezon ki chita sou Bib la ki fè sa: 

1. Nou jwenn modèl lapriyè madichon nan liv Sòm yo, tankou Sòm 7, 55 ak 69). Pa genyen li nan Levanjil. Jezi pa t montre disip yo fè sa (Matye 28.20a). Okontrè, nan modèl lapriyè li te montre yo a, li te di: “ Padone tout sa nou fè ki mal, menm jan nou padone moun ki fè nou mal (Matye 6.12).

2. Jezi pa t janm aprann disip li yo madichonnen pèsekitè li yo. Okontrè, li te di se yon benediksyon pou sibi pèsekisyon (Matye 5.11). Apot Pyè, youn nan disip yo, ta pral bay nouvo kwayan yo menm anseyman an(1 Pyè 4.14).

3. Kwayan ki vle mennen yon vi dwat nan sèvi Jezi ap jwenn pèsekisyon (2 Timote 3.12). Menm jan yo te pèsekite Jezi ak tout disip yo (Jan 15.18, Lik 6.22), tout kretyen dwe atann sa. Pòl pa t gen pwoblèm nan sa (2 Korent 12.10). 

4. Jezi te rekonèt lapriyè madichon paske se te yon ansèyman juif yo te resevwa : kòman sa te ye lontan. Men nan Kris (lalwa Kris la), juif oswa moun lòt nasyon, pa resevwa ansèyman sila a. Anplis, se pa sèlman lavi ou ki chanje nan Kris(2 Korent 5.17), fason ou trete lènmi ou chanje tou (Efezyen 5.8-9). 

5. Pèsekisyon pa fè Jezi sispann renmen ak pwoteje nou (Women 8.35). Nou dwe toujou sèten li avèk nou nan tout soufrans nou yo. 

6. Kretyen yo dwe aji pi byen pase mechan yo. Si n ap fè byen avèk moun ki fè nou byen sèlman, nou pa fè anyen ki merite rekonpans paske mechan yo aji byen youn anvè lòt (Matye 5.46-47). Kidonk, nou pa fè pyès efò pou montre diferans ki gen ant nou ak nonkwayan yo, sitou sila ki mechan yo. 

7. Lè yo t ap pèsekite Jezi jis yo te krisifye li, li pa t mande mal pou mechan yo: Papa padone yo (Lik 23.34). Li pa t sèlman aprann disip yo padone nan lapriyè, li te mete l an pratik menm nan moman li t ap soufri.

Pou tout rezon sa yo avèk lòt, yon kretyen pa dwe fè priyè madichon kont moun k ap pèsekite li. Men, kisa yon kretyen ka fè anfas pèsekisyon? 

Nan pèsekisyon, yon kretyen pa dwe janm bliye Bondye pa bliye li. L ap pwoteje li nan tout sikonstans. Se konsa, malgre Jezi te gen pou mouri, toutan lè a pa t rive, chèf yo pa t ka arete li. Apot Pyè te konnen li t ap mouri, men sa pa t anpeche li te kontinye travay, riske jiskaske jou a te rive. Pèsekisyon pa dwe fè nou pè soufrans oswa lanmò paske nou te fèt pou nou mouri. Sepandan, nan pèsekisyon yo, nou ka mande Bondye pwoteje nou e se rezon sa a ki fè lènmi nou yo pa fini avèk nou deja: Bondye ap pwoteje nou.

Jérôme D. Emerson

#2|Mennen tèt ou byen nan Kris la

 "Se sa ki fè, konnen ki jan pou n mennen tèt nou! Pa mennen tèt nou tankou moun ki sòt, men tankou moun ki gen konprann." (Efezyen 5.15)

Yon moun sòt se yon moun ki pa gen lespri oswa ki pa konn reflechi avan li pale oswa aji. 

Yo souvan kalifye yon elèv sòt lè li pa ka aprann yon matyè e li pa ka pase nan egzanen men tout moun pa fin tonbe dakò sou sa akoz enkapasite pou aprann lekòl pa defini nivo entèlijans yon moun nan lòt domèn tankou metye manyèl ak biznis.

Nan tradiksyon fransè a, lòt mo fè nou konprann sans "moun sòt" la pi byen. 

● "Agissez avec la conscience de votre responsabilité." (Parole Vivante)

○ Kretyen an bezwen pran konsyans de aksyon l ap poze pou l pa nye responsablite li aprè epi lage chay sou legliz oswa Satan. Ou rekòlte sa w simen (Galat 6.7), se pa moun ki fè w pa ka reyisi. 

● "ne vous comportez pas comme des fous," (Segond 21)

○ Isit, mo fou a pa vle di moun ki nan azil [oswa k ap voye wòch nan lari]. Se moun ki inyore Bondye nan chwa y ap fè. Yo aji tankou avèg (David Kelly).

Boutofen, kretyen an, selon vèsè sa, pa yon moun sòt, jan anpil moun ta vle kwè l. Dabò, ou pa ka gen Lespri Bondye nan ou pou w sòt. Ansuit, Bib la se gid ou. Kidonk, apot Pòl pa sipoze kretyen Efèz yo sòt. Pito, li atire atansyon yo sou aksyon moun ki san konprann. Konsa, chak kwayan ap ka analize fason l ap viv, chwa l ap fè pou evite sibi konsekans moun k ap aji san reflechi. 

Se pa yon jouman, se yon egzòtasyon, yon apèl pou kretyen an fè pridans nan lavi l ap mennen nan Kris la chak jou. Paske, antanke limyè, aksyon yo dwe bon, dwat e vre (Efezyen 5.9.

Jérome D. Emerson

#1| Ofrann ak rekonsilyasyon: kisa Bondye ap tann de ou?

"Kite ofrann lan la devan lotèl la, ale byen ak frè ou la anvan. Apre sa, w a tounen vin bay Bondye ofrann ou an". (Matye 5.24)

Trè souvan, nou plis panse sou sa n ap fè pase nou chache konnen si l ap fè Bondye plezi. Sa ki plis konte pou nou se fè sa ki pi fasil la. Poutan, nan anpil ka, pou fè Bondye plezi, li mande efò. 

Tradisyon oswa Sentespri?

Annefè, se kalite relasyon nou avèk frè ak sè nou yo ki detèmine nivo sanntifikasyon nou. Nou p ap mennen yon bon vi paske n ap fè sa k ap enpresyone lòt moun. Sèvi Bondye pa yon "show" nou chwazi fè chak dimanch pou lemonn gade. Kantite sèvis n ap fè yo pa fòseman nan kourikoulòm Wayòm Bondye a. Se sa ki fè nou plis santi nou alèz nan tradisyon ki pwograme pawòl ak aksyon nou pase nou kite Sentespri dirije yo.

Lafwa mande senserite 

Ou pa oblije bay ofrann chak dimanch, ni pran sentsèn chak mwa, pou Bondye pran plezi nan ou. Jezi te fè oditè li yo konnen kominyon fratènèl la plis enpòtan paske aksyon yo. Se pa ofrann nan Bondye bezwen, dayè li pa itilize lajan. Se pito bon relasyon nou devlope nan gwoup la, nan koral la, nan komite a. Konsa, si nou youn se ènmi lòt, sèvis oswa ofrann n ap bay yo pa sensè. Konsyans nou pa sispann kondane sa granmesi pawòl la. 

Rekonsilyasyon oswa ofrann?

Malerezman, nou plis vle fè sa ki pi fasil yo, sa nou plis konnen yo, sa ki pa mande nou okenn jefò e ki p ap mete nou nan kontrent. Alò, ou menm k ap li mesaj sa e ki pral (te) nan kilt maten an, èske w gen yon frè, yon sè ki gen kont avèk ou? Siwi, konnen se rekonsilyasyon Bondye ap tann nan men w. Se pa (t) lajan oswa dim ou te bay la. 

Yon aksyon pou semèn nan

Panse avèk moun ki pa byen avèk ou. Regle pwoblèm ou gen avèk yo pou w ka bay ofrann ou an san kè sote dimanch pwochen.

Jerome D. Emerson