#7 | Yon istwa biblik pa fòseman yon ansèyman evanjelik

Ou konn anpil istwa ki nan Bib la. Gen ki sou pèsonaj yo tankou Abraram, Jozèf, Moyiz, David. Gen lòt ki sou evènman tankou Delij, Lanmè Wouj ak Sodòm/Gomò. Men èske ou te konnen yon istwa biblik pa tou vin prensip oswa yon ansèyman pou kretyen yo pratike?  

Diferans ant istwa ki nan Bib la ak yon verite pou pratike jodi a

An nou pran egzanp istwa nan jaden Edenn lan. Gen manti ki bay lè sèpan an di Èv : « Nou p ap mouri kras. » (Jenèz 3.4).

Nan Travay 5.1-10, Lik rakonte nou manti Ananyas ak Safira, madanm li, te bay. Se sa Bib la rapòte nou pou nou ka konnen sa ki te pase men li pa anseye nou pratike yo jodi a. 

Bib la anseye nou konsekans manti ka bay, tankou maladi ak lanmò fizik men li pa aprann nou manti. 

Nou dwe evite konfonn yon istwa Bib la rapòte ki ka gen manti, krim oswa diskriminasyon ak yon prensip pou swiv nan Levanjil. 

Gen anpil istwa ki rakonte nan Ansyen Testaman an, byenke yo pa manti, nou pa oblije ni fè yo ni anseye jodi a. Nou ka tire leson ladan yo epi aprann grandè Bondye ak frajilite lòm. 

Nan tan lontan, moun yo te bezwen touye bèt pou mande Bondye padon. Ebyen, depi lè Jezi te fin mouri epi resisite, sa pa enpòtan ankò. Granmesi sakrifis li a ki pi efikas, nenpòt moun ka pwoche kote Bondye nan lapriyè pou mande li padon san èd yon prèt ki se pechè tankou nou.  

Se pa paske David te di Bondye: " Pa wete lespri sentete ou te ban mwen an" (Sòm 51.11, Bib Kreyòl Ayisyen, 2019) ki fè Sentespri ka soti nan yon kretyen. Kondisyon David te resevwa Sentespri a pa menm ak kondisyon pou kwayan nan Nouvo Testaman an (konpare 1 Samyèl 16.13 ak Travay 10.44).  

Pa pran tout istwa nan Bib la pou baze jijman ou, benediksyon, madichon, sitou nan Sòm yo. Chache konnen kisa Jezi oswa otè Nouvo Kontra yo di sou entansyon ou pou w pa mal itilize deklarasyon yo. 

Jezi te di anviwon 20 fwa :" Nou te tande kijan nan tan lontan yo te di:.." (Une église motivée par l'essentiel, Rick Warren, p45). Deklarasyon sa a dwe atire atansyon nou sou doktrin ki chita sou anpil istwa ki nan Bib la (Ansyen Testaman) men ki pa gen anyen pou wè ak prensip evanjelik yo.

Nan 1 Wa 11.3, nou aprann wa Salomon te gen 700 madan marye, 300 kenge. Se pa yon ansèyman pou kretyen gen de (2) fanm? Lè nou konpare pasaj sa avèk 1 Korent 7.2, nou wè youn aksepte poligami tandike lòt la rejete li. 

Menmsi n ap chante evènman ki te rive nan jou Pannkot la, li p ap janm refèt ankò e Sentespri a pa gen pou desann puiske sa te fèt yon fwa pou tout. 

Li trè bon pou konnen istwa biblik yo men l ap pi bon si nou pa pwofite yo pou fonde oswa kwè nan fos doktrin.

Gwoup WhatsApp fèmen pou w pa rate nouvo nimewo

Jérôme Dorsonne Emerson

#6| Ti tantasyon, gwo konsekans

 

"Sa a pa anyen" se youn nan deklarasyon ki konplis nan fè anpil kwayan tonbe nan tantasyon epi peye konsekans chè. Trè souvan, sa ki parèt ti peche yo konn lakoz plis dega nan lavi nou. Mwen envite nou reflechi sou ka sa yo ki te parèt piti avan men ki te lakoz gwo konsekans.

1️⃣ Adan ak Èv te echwe pou yon grenn fwi.

2️⃣ Moyiz te echwe nan plan pou antre Kanaan akoz dezobeyisans li kont Bondye.

3️⃣ Abraam te echwe paske li te pran move konsèy madanm li Sara pou pran Aga pou fanm.

4️⃣ Ezaou te echwe pou yon ti pen ak tigout nan yon bouyon pwa.

6️⃣ David te echwe akoz yon senp ti gade Batcheba.

7️⃣ Jida te echwe paske li trayi Jezi pou 35 pyès dajan.

8️⃣ Ananyas ak tout madanm li te echwe e mouri pou manti sou pwòp lajan yo.

9️⃣ Amnon, premye pitit David, te echwe e mouri akoz li te swiv move konsèy zanmi li Jonadab, pou kouche demi sè li, Tama. 

🔟 Lisifè te echwe paske li te bezwen pran plas Bondye.

Trè souvan, nou konn panse Bondye twò gran pou li okipe ti peche n ap fè pandan se sa ki konn lakoz gwo dega nan lavi nou tankou kèk egzanp nou sot site la yo. 

🔴 Mete sa nan tèt ou!

Enmi an ap toujou itilize ti tantasyon, ti okazyon, ti pawòl, ti peche pou fè ou pran gwo so.

Gwoup WhatsApp pou w pa rate nouvo nimewo yo.

Jérôme Dorsonne Emerson

#5| Eske Ananyas te fè peche kont Sentespri a?

"Lè sa a, Pyè di li: Ananyas, ki jan ou fè kite Satan antre nan kè ou pou l fè ou bay Sentespri manti, pou l fè ou kenbe enpe nan lajan tè a pou ou?"(Travay 5.3)

Anpil moun pretann manti Ananyas ak madanm li, Safira, te fè sou tè yo te vann lan se peche kont Sentespri (blasfèm kont Sentespri). Konsa, yo pa ta sove puiske pa gen padon pou moun ki ta fè yon kalite peche. Alò, èske koup sa a te rive peche konsa vre?

Gen anpil entèpretasyon sou peche sa a. Katolik ak Pwotestan pa wè li menm jan. Se konsa sa te ant Jean Calvin, Jacobus Arminius, John Wesley, pap Jean-Paul II, Thomas d'Aquin, pou site sa yo sèlman. Yo ta menm sipoze tèks sa yo pale sou peche kont Sentespri: Ebre 6.4-6; 10.25-31 ak 1 Jan 5.16 (Wikipedia). Men, li plis klè nan Matye 12.31 an: "Bondye va padonnen moun tout peche yo va fè, tout move pawòl ki va soti nan bouch yo. Men, kanta moun ki va pale mal sou Sentespri a, pa gen padon pou yo".

"Pale mal sou Sentespri a" (outrage à la divinité: diksyonè fransè).

Ananyas pa t pale mal sou Sentespri a. Li te ba li manti menm jan nou ka pran egzanp sou yon fidèl ki bay yon lidè manti. Si lidè sa a gen Sentespri, byenantandi, fidèl la bay Sentespri manti. Otreman, se pa ni manti ni peche kont Sentespri. Se jis yon peche tankou tout peche ki mande konfese.

Posiblite pou mande padon

Si moun ki pale mal sou Sentespri a p ap jwenn padon, se pa leka pou yon kretyen ki bezwen rekonèt peche li epi mande Bondye padon (1 Jan 1.8-9). Aksè sila a retire sipozisyon pou yon kretyen ( ki batize nan Sentespri) peche kont menm Sentespri sa a. Sa t ap vle di Sentespri pa travay nan li pou fè li rekonèt puisans Bondye ak zèv Satan.

De ka diferan

"Lè farizyen yo tande sa, yo di: Si nou wè nonm sa a ap chase move lespri, se paske Bèlzeboul, chèf move lespri yo, ba l pouvwa pou sa"(Matye 12.24). 

Se deklarasyon sa a ki defini "PECHE KONT SENTESPRI A": farizyen yo atribye pouvwa Jezi pou fè mirak avèk Bèlzeboul tankou Bondye pa t ka fè l alòske kontèks la montre Ananyas ak Safira te batize nan dlo ak nan Sentespri paske yo te rekonèt pouvwa Sentespri nan apot yo pou fè mirak. Kidonk, yo pa ka peche kont li. Dotanplis, yo te gentan jwenn padon (Travay 4.4). Kòman pou Bondye oswa Jezikris ta fin padone yon pechè epi pou l ta fè yon peche ki pa ka jwenn padon ankò? Eske sali a depann de yon repantans renouvlab? 

Motivasyon Ananyas...

Istwa a kòmanse nan Travay 4.34 kote lanmou fratènèl la te kontinye ap manifeste nan Legliz Primitiv. Jozèf vann yon tè epi l bay apot yo tout lajan an. Se yon gwo jès. Ebyen, Ananyas ak madanm li pran nan kouran an tou, y al fè menm bagay la. Malerezman, se te pou twonpe apot yo. Yo pa t bay tout lajan an (Travay 5.2). Yo te plis vle fè wè yo te kapab alòske Jozèf te vle ankouraje. 

Ananyas te bay Sentespri a manti...

Non, Ananyas ak Safira pa t fè peche kont Sentespri, li pa t pale mal. Petèt, si li te di se Bèlzeboul ki te fè Jozèf vann tè li a. Pakont, yo te ba li manti. Pakonsekan, yo pa ka sibi konsekans peche kont Sentespri ki se kondanasyon  nanm yo. Ofinal, lanmò yo se konsekans manti yo te bay la. Se yon lanmò fizik, li pa ni espirityèl ni etèl. Non sèlman apot Pyè pa t pwononse sou nanm mesye dam yo, li pa t gen pouvwa pou kondane yo paske se sèl Jezi ki te resevwa e ki toujou gen pouvwa pou sove (Travay 4.12).

Gwoup WhatsApp fèmen pou w pa rate nouvo nimewo

Jérôme Dorsonne Emerson

Liv otè a👇