#11| 4 rekòmandasyon pou yon sèvitè Bondye

Yon sèvitè Bondye pa menm moun li te ye avan li te konvèti a. Se leson li te pran nan men Mèt li Jezikri, atravè ansèyman apot yo, ki fè li chanje. Alò, kòman ou ka dekouvri ou se yon vrè sèvitè?

Men 4 rekòmandasyon apot Pòl bay k ap ede ou.

《Yon moun k ap sèvi Bondye pa fèt pou nan kont. Se pou l viv byen ak tout moun, se pou l konn ki jan yo fè enstriksyon moun, se pou l gen pasyans.》(2 Timote 2:24) 

1️⃣ Ou pa fèt pou nan kont

Ou pa dwe nan kont avèk pèsonn, sitou se pa ou ki dwe chache li. Paske, ou gen pou devwa chache rekonsilye ak priye pou ènmi ou. Kont diminye sou enfliyans ou kote w ap evolye. Sa pa vle di ou p ap gen moun ki opoze avèk ou men ou dwe anpè nan lespri ou, ou konnen ou pa koupab epi w fè tout efò posib pou regle sa.

2️⃣ Ou dwe viv byen ak tout moun

Ou p ap ka fè tout moun plezi nan tout sa w ap fè men w ka fè tout sa ki posib pou viv byen ak yo. Evite ipokrizi, lapès, pale mal, egoyis ak fo jijman. Dayè, yon vrè sèvitè Bondye p ap renmen fè ipokrizi. L ap degaje li mennen bak li byen.

3️⃣ Aprann fè enstriksyon moun 

Pou sa, ou bezwen byen enstwi avan. Sinon, ou pa oblije fò ni pase gwo lekòl. Depi w ap tande moun ki konnen, ou ka ede lòt moun. Si w ap li Bib la menm, se sa nèt. Enstui moun pa mande gwo konesans men pito eksperyans nan sa w ap fè.

4️⃣ Ou dwe gen pasyans 

Wi, pasyans se fwi Sentespri. Li montre ou gen metriz ak lafwa. Li fè w pa kouri kondane ni dekouraje. Se konfyans ou gen nan Bondye ki fè w gen pasyans. Konsa, lòt moun ap kontan viv bò kote w.

Jerome Dorsonne Emerson

#10 | Pa sispann fè byen

 

« Se poutèt sa, moun ki pa fè byen li konnen li gen pou l fè a, li fè peche » (Jak 4.17)

Nan katriyèm chapit liv Jak la, li pale sou konvwatiz ak yon seri de lit ki genyen nan legliz Bondye a k ap fin kraze li. Pou Jak, rezon yo se paske nou youn pa sispann denigre lòt, nou vle pou se dezi pa nou ki satisfè. Depi nou genyen, zafè ki gade lòt la.

Ou peche lè ou pa fè sa lalwa mande, se sa apot Jan aprann nou (1 Jan 3.4). 

Jeneralman, plis moun kwè peche se fè oswa di sa ki mal. Se sa ki parèt lèd nan sosyete a tankou tiye, vòlè, fè adiltè, divòse, kòripsyon, elatriye. Se vre. Peche sa yo se peche pa komisyon. Sa vle di, se mal ou dispoze fè alòske ou konnen sa pa bon. Ou konnen manti pa bon, ou manti kanmenm. Konsyans ou repwoche ou paske ou te konnen. Ou santi ou koupab, ou bezwen mande padon pou w santi ou soulaje.

Men nan Jak 4.17, otè a pale sou peche pa omisyon ki se lè ou pa vle fè sa pawòl Bondye a anseye. Nou ka pran egzanp bon samariten an pou eksplike kalite peche sa a. Yon prèt ak yon levi ap pase nan yon chemen, li wè yon nonm yo te bat twaka mò. Yo tou de janbe lòt bò wout la pou evite kò a ak pote li sekou. Li pa t ko mouri. Se yon samariten ki t ap fè wout la ki pran swen nonm lan, mennen li nan yon lotèl, peye kòb nan pòch li pou sove li. Jezi mande kilès nan twa moun sa yo ki te montre li se frè nonm lan. Direktè lalwa a di se bon samariten an. Jezi di li :« Ale, fè menm bagay la tou ». (Lik 10.30-37). 

Kòman ou konn aji ?

Yon prèt ak yon Levi se de moun ki konn lalwa, petèt menm jan ak ou menm ki konn anpil vèsè, ki diplome nan teoloji oswa ki konn swiv seminè biblik ak konferans. Kisa ou konn fè lè ou wè yon pwochen nan nesesite ? Si ou wè yon moun ou p konnen grangou, èske w ap ba li manje oswa w ap di li: gade yon moun ki pa manje depi maten ! Daprè sa Jezi te di nan Lik 10.37 la, ou dwe nouri moun sa a. Sinon, ou peche paske ou pa fè yon byen. 

Kote kritik yo pi fasil

Li pi fasil pou nou wè epi kritike yon lòt ki pa genyen. Se tankou malè yon lot plis atire atansyon nou pase bonè li. Se sa ki pa bon an ki souvan soulve kolè nou, raple nou sa levanjil mande men li difisil pou nou fè sa ki nesesè a. Anpil fwa, se manke lajan ki fè yon pwochen pa bati yon bon kay, li pa achte yon bon rad, yon bon soulye. Se kont volonte li. Kisa ou ka fè antanke kretyen nan yon ka konsa? 

Ka nonm nan te touche kè samariten an

Konpasyon se yon santiman ki pouse ou aji nan malè yon lòt moun. Se sa ki fè yo rele moun k ap fè byen «papa bon kè». Menm jan ak samariten an, kalite moun sa yo renmen reyaji pou ede pwochen yo ki nan nesesite. Chak fwa ou konnen yon bezwen pou w satisfè, ou pa fè l, se tankou sa pa touche kè w. Menm jan ak prèt ak Levi a, sa pa regade ou. Kite mele ou ! Sepandan, si ou pa kapab, ou ka pran pitye pou li oswa lapriyè pou li.

Eskiz fè nou peche anpil

«Fè byen se frèt» se youn nan pwovèb ayisyen itilize anpil pou jistifye mank konpasyon yo. Pwiske moun ou fè byen an ka vin ènmi ou, trèt ou epi pafwa menm tiye ou, ou bouche kè ou pou li. Levanjil pa aprann sa. Bousòl yon kretyen se Bib la, se pa pwovèb yon peyi. Li pa ka aprann pou fè byen epi pou li kite prensip monn lan anpeche li. Dayè, nan pa vle fè byen ak pwochen nou, se tout sitwayen yo, kretyen ou pa, ki sibi konsekans yo. Timoun ou pa vle ede jodi a ka tounen yon bandi k ap ba ou pwoblèm demen. Kidonk, ou pa dwe chache eskiz pou pa ede li nan nivo ou kapab. 

Koute sa Jezi, mèt w ap sèvi jodi a, gen pou di nan peryòd jijman nasyon yo : « Mwen te grangou, nou ban m manje. Mwen te swaf dlo, nou ban m bwè. Mwen te lwen peyi m, nou te resevwa m lakay nou. Mwen te touni, nou te ban m rad. Mwen te malad, nou pran swen m. Mwen te nan prizon, nou vin wè m. » (Matye 25.35-36). 

Moun ki te fè byen sa yo pral poze li kesyon sou kilè yo te fè sa, koute sa li va reponn yo: «Chak fwa nou te fè sa pou youn nan pi piti pami frè m yo, se pou mwen nou te fè li. » (Matye 25.40). Sa montre nou enpòtans fè byen sitou avèk moun ki pa ka remèt nou. Konsyans nou pa dwe anpè lè nou wè yon lòt nan bezwen. 

Yon leson pou jounen an !

Pa janm sispann fè byen !

Ou ka gen mil rezon pou ou pa fè sa ki byen nan avantaj yon sè, yon frè, yon enkoni, yon ènmi, yon zanmi. Rezon sa yo se pou ou men Bib la mande pou ou pa neglije fè byen : Pa janm bouke fè byen. Paske, si nou pa dekouraje, n a rekòlte lè lè a va rive. (Galat 6.9).

Jerome Dorsonne Emerson

#9 | Byen konprann dimansyon konba espirityèl la

"Se poutèt sa, depi koulye a, pran tout zam Bondye bay yo. Konsa, lè move jou a va rive, n a ka kenbe tèt ak lènmi an. Lè batay la va fini nèt, n a kanpe la byen fèm nan pozisyon nou toujou "(Efezyen 6.13). 

Nou pale de konba espirityèl oswa envizib pou opoze konba chanèl ki vizib, fizik; sa ki touche 5 sans nou yo. Se vre nou pa wè lespri yo, advèsè yo men yo la e se sa ki fè batay la pi difisil. Apot Pòl te konprann sa lè li te di :" M ap viv koulye a nan yon kò tankou tout moun, se vre. Men, mwen p ap goumen menm jan ak tout moun"(2 Korent 10.3).

Konba espirityèl pa vle di fòs fizik nou pa enpòtan tankou tout bagay depann de lespri. Non. Egzanp, si w chwazi tande (l'ouïe) ak gade (la vue) nenpòt bagay, ou ka tante w pi fasil. Lè konsa, si w pa konn priye, fè pridans ak reziste, ou ka tonbe fasil. Se sa ki fè, meyè mwayen pou w mennen konba espirityèl se aprann metrize kapasite fizik ou epi pa pwofite libète w ak dwa w genyen.

Daprè Gem KAKOU (Emci TV), "konba espirityèl se kapasite pou nou konbat kont fòs envizib k ap eseye enfliyanse lavi nou ak domine avni nou"(Tradiksyon kreyòl). Kidonk, fòseman, gen yon fòs k ap pouse n panse, pale ak aji. Èske se pa sou apot Pòl mande nou fè lwanj pou Bondye nan tout bagay?(1 Korent 10.31). 

Anpil fwa, se pa nou k ap lite, se Sentespri a k ap travay nan nou. Li ba nou kapasite pou n repouse move dezi yo, sajès pou n konprann ak kouraj pou n sipòte(Filipyen 4.13). Alò, li pa sifi pou nou vle konbat, nou bezwen gen Sentespri nan nou (Women 8.9). 

Tristeman, chaje fidèl ki pa rive konprann taktik dyab la nan atak li yo. Si n ap panse sou relasyon nou avèk Bondye, divizyon ki gen nan asanble yo e menm nan anpil komite, n ap poze tèt nou kesyon sila sa yo: 

○ Èske se pa dyab la ki plis ap mennen sou nou?

○ Kisa lidè yo ap fè ki pwouve y ap batay kont move lespri yo? 

○ Kòman legliz ka fè fidèl yo plis konprann konba espirityèl la pou gen mwens eskandal?

Jerome D. Emerson

#8| Ou REZIYE ou oswa ou gen LAFWA?

 

Yo anpil, moun ki panse Legliz ap preche fidèl yo reziyasyon. Youn nan rezon ki fè yo kwè sa se paske gen swadizan kretyen ki pa vle al travay e ki rete nan priye, jene ak pase tan nan lòt sèvis Legliz. Poutan, Bib la pa ankouraje moun ki parese: "M ap pale konsa ak nou paske m pran nouvèl gen kèk moun nan mitan nou k ap fè parese, ki pa vle fè lòt bagay pase foure bouch yo nan zafè lòt moun (2 Tesalonisyen 3.11). 

Kisa reziyasyon an ye? 

Se lè yon moun aksepte yon tò, yon sò, yon pèn, yon move sitiyasyon san pwoteste ni revòlte kont li. Li aji tankou li se yon esklav, li pa gen lòt chwa, toukout, li pa gen lòt sekou. Èske se sa ki fè yon moun ap sèvi Bondye? Asireman non paske Bondye se sekou sèvitè l yo.

Eske pa gen moun ki reziye yo?

Wi, gen moun ki legliz e ki reziye yo vre men se pa Bib la ni yon predikatè ki byen fòme ki preche reziyasyon. Levanjil mande pou nou pasyan, pèseveran epi konte sou Bondye men se pa pandan n ap dòmi, n ap fè parese. Nou dwe plante nan lespwa Bondye ap fè lapli tonbe pou wouze jaden. Sa se pa reziyasyon. 

Kisa lafwa ye?

Lafwa se konfyans nou gen nan yon Bondye ki fidèl, kapab, ki pa janm bay manti, li pa ni prese ni anreta. Se sou baz sa yo konfyans nou chita e atravè Bib la, istwa montre rezilta konfyans nan lavi sèvitè Bondye yo: "Se paske Abraram te gen konfyans nan Bondye ki fè li te obeyi lè Bondye te rele l la. Li pati pou peyi Bondye tapral ba li pou pòsyon eritaj pa li. Li leve, li kite peyi l la, san l pa t konnen ki bò li ta prale"(Ebre 11.8).

Moun ki reziye yo pa gen kalite konfyans sa, men kretyen yo gen plis pase sa: yo gen prèv Bondye egziste, li konn aji, delivre. Anpil enkonvèti kwè sa tou. Kidonk, si ou gen konfyans Bondye ka aji pou ou, nenpòt tan sa ka pran, ou pa REZIYE ou, ou gen KONFYANS nan li. 

Si atout Bib la klè sou kisa konfyans (lafwa) ye (Ebre 11.1) ak aksyon kretyen an dwe fè pandan l ap tann, epi yon moun chwazi reziye li, sa se chwa li. Levanjil pa responsab. 

Lavi w ap mennen an, kote w ap viv la, tray w ap pase pa fòseman volonte Bondye. Li enpòtan pou w chache konnen responsablite w ladan ak aksyon ou ka fè pou Bondye retire w ladan. 

Jerome Dorsonne Emerson