Lè ou fin li liv « L’Organisation
de l’Ecole du dimanche » Joël Laloi (Th.M/D.Min) ekri, w ap gen anpil
limyè sou difikilte lekòl dominikal nan legliz. An menm tan, w ap jwenn lide
pou konprann koz yo ak konsekans yo epi tante solisyone yo. Sepandan, sa ki pi
difisil la se pa mank lide oswa konesans legliz yo pa genyen puiske responsab
yo, an majorite, byen fòme pou jwe wòl la. Se yon pwoblèm administratif melanje
avèk tradisyon ki fè desizyon k ap bon yo pa ka pran.
Mete sou sa, gen yon pwoblèm suivi ki fè
menmsi yon desizyon pran, li pa kontinye pou yon lòt rezon ki ka depann de
responsab lekòl la oswa fason legliz la administre. Pandan m ap envite ou li « L’Organisation
de l’Ecole du dimanche », men yon desizyon legliz te ka pran pou redui
neglijans ak inefikasite lekòl la.
Twa avantaj pou yon monitè
1. Lajan pou
peye plan entènèt chak mwa
Sa ka parèt senp men yon monitè bezwen
fè rechèch sou anpil sijè l ap trete. Li te ka kreye yon gwoup Whatsapp pou
motive elèv yo, fè pase tout mesaj ki konsène klas la. Konsa, li t ap pi fasil
pou gwoup la konnen elèv ki absan, malad oswa gen yo ka.
2. Frè pou
transpò chak mwa
Gen monitè ki pa nan nesesite a men pito
se li menm ki refize li pase nou panse sa. Paske, wòl li se ta vin avan elèv yo
alòske li konn rive anreta. Li te ka gen tan repase leson an tou. Se pa yon favè
legliz la oswa klas la t ap fè l. Li merite li. Konsa, li t ap ka fè konomi frè
transpò a pou fè lòt depans.
3. Frè pou
achte liv
Tout moun konnen se sèl liv lekòl la
monitè yo genyen an jeneral. Poutan, yo ta dwe gen Bib Etid, Kòmantè biblik,
Diksyonè biblik e sitou liv Organisation de l’Ecole du dimanche. Wi, monitè yo
dwe fòme men lajan an ta dwe soti nan lekòl la pou byen lekòl la.
Men « pa gen lajan »
Se pa lajan ki vin anpremye. Nou te ka
sipoze volonte : èske nou vle
pou chak monitè benefisye privilèj sa yo ? Ansuit, ta dwe gen planifikasyon : kilès ki pou
diskite epi bay lòd pou chak benefisyè jwenn privilèj sa yo ? Ofinal, nou
te ka ajoute estrateji : kòman
legliz la oswa lekòl la pral fè pou jwenn lajan sa a ?
Yon lidèchip optimis
Mwen pa premye kretyen ki pale sou sijè
sa a. Yon ankèt te ka meyè desizyon an pou konnen si monitè yo pa nan nesesite
a. Konsa, responsab yo pa t ap bay eskiz pou montre pa gen lajan, yo t ap wè
kote pou pran li paske elèv yo bezwen aprann byen. Yon lidè pa deside san li pa
mezire kapasite moun l ap dirije. Sa vle di, opinyon oswa vizyon ou genyen an,
pataje li epi deside sou repons ak reyaksyon ou jwenn yo. Lè sa a, si gen yon
pwoblèm, se pa ou ki responsab. Men avan ou konnen ou pa responsab, ou dwe fè
tout sa ki nan kapasite ou paske se ou ki gen pouvwa pou deside.
Kèk estrateji ki ka itil
Kisa ou panse si:
1. Nan ofrann
chak klas, yon pousantaj te soti pou monitè yo ?
2. Nan ofrann
tout klas, yon pousantaj te soti pou monitè yo ?
3. Responsab
lekòl dominikal la fè yon bidjè epi prezante asanble a li ?
4. Selon sous
finansman legliz la, lajan sa a ta soti nan bidjè previzyonèl la ?
5. Chak klas
te pran responsablite fè yon ofrann chak premye oswa dènye dimanch pou monitè
yo ?
Ou gen yon kesyon ? Yon sijesyon ? Yon dezakò ? Ekri l
nan kòmantè a.
Jérôme D. Emerson
