#35| Kòman legliz ka ede jèn yo reyisi? (#3)

 

Emmanuel Norcius 

1) Paran an, lidè legliz la dwe chèche zanmi timoun yo. Konsa y ap pi lib pou di sa yo genyen kòm dezi.

 2) Depi timoun nan kòmanse gen bon konprann fòk li gen yon kras libète. Libète pou l soti avèk zanmi l, rantre ayon lè granmoun yo fikse. Y ap bay mwens manti. 

3) Fè yo plis konfyans. Montre yo sa. 

4) Evite fè presyon sou yo legliz la kòmkwa pou nenpòt bagay se sanksyon. Plis prevni pase sanksyone.

Emmanuel Norcius 

Lektè nan ATG17

#34 | Kòman legliz ka ede jèn yo reyisi? (Repons #2)

 

Job G114

Sa mwen kapab di sou sijè sa, chak lidè (paran ak tout responsab legliz yo spesyalman) ta dwe fè :

1) Se chèche alèz avèk jèn yo nan tout sans ki pa p deranje yo ki pa p enfliyanse yo yon fason pou yo vin tèlman alèz pou yo pa jennen di nou tout bagay.

2) Fè yo santi yo an konfyans. Lè yo gen konfyans yo pa p pè rakonte nou tout ti sekrè yo genyen epi nenpòt sa ki mal yo ta vle al fè yo pa p wont vin chèche konsèy nan men nou.

Anpil lidè pa ka genyen konfyans jèn yo se paske yo otoritè. Lè jèn yo ta vle vin pale avèk yo pou mande yo konsèy, yo pa ba yo bò pou antre sou yo e jèn nan pral chèche sa li pa jwenn nan deyò e li pa p fè paran oubyen responsab legliz sa yo konfyans..

Ekri nan 36396642 pou jwenn liv sa a gratis sou telefòn ou.

Paran ak responsab legliz yo ta dwe chèche konnen jèn yo avan, chèche konn kisa yo vle, dyaloge avèk yo, pa jije yo lè yo fè yon bagay ki mal. Montre yo pi bon vwa yo kapab swiv epi evite di yo koze k ap blese yo. Korije yo anprive, konsa n ap sove anpil ladan yo.

Job

Lektè nan G114

Li twazyèm opinyon an: Emmanuel Norcius

#33| Kòman legliz ka ede jèn yo reyisi? (Repons #1)

Givischar FELIX 

Nan refleksyon mwen sou avni jèn yo nan Legliz, jodi 30 mas 2023 a, mwen te poze yon kesyon nan 2 gwoup WhatsApp pou m te jwenn opinyon lòt kretyen:"Kisa lidè yo (paran, responsab legliz) ta dwe fè pou ede jèn yo reyisi san yo pa oblije pran pòz yo se kretyen pandan y ap mennen vrè vi yo ankachèt?"

Se avèk plezi m ap pataje youn aprè lòt repons ki te plis konvenk mwen e k ap fè w reyalize pwofondè pwoblèm jèn yo ap sibi sitou nan sektè pwotestan an. Entansyon an senp: fè lidè yo itilize lòt estrateji pou ede jèm yo reyisi. Pa neglije pataje repons sa yo tout kote e bay tout lidè evanjelik yo. 

______________________

Antanke jèn ki legliz k ap viv ak obsève sitiyasyon jèn yo. Mwen ka di pi gwo zam pou ede yo se lanmou ak egzanp. Sa ki fè yo wè lemonn pi bon pase Legliz se paske valè ki legliz yo pa parèt jan yo ta dwe parèt. 

Egzanp, lè m ale legliz yo di m maryaj se bèlbagay. Poukisa fanmi yo pa ka mache? Poukisa pa gen lanmou ak respè nan mitan paran yo? 

Poukisa lè m ale legliz yo di m padone, mache nan lanmou alòske toujou gen chire pit nan mitan ansyen yo? 

Mwen panse pi bèl fòs pou ede lajènès la swiv Kris se lanmou ki dwe renye, egzanp ki dwe bay. Lè nou fè yon erè, fòk egzòtasyon yo fèt sou baz lanmou olye de jijman.

Sentespri konvenk kè moun men li itilize aksyon avèk pawòl nou.

Pou nou ede m ki se jèn, montre m valè nou yo pi bon pase sa ki deyò yo a. 

Lanmou pa gen anyen ki malonèt, li gen pasyans, li gen bon kè, li pa egoyis, li pa chache parèt tèt li. 

Nou se limyè, se nou ki ta sipoze klere ak valè nou yo.

Givischar FELIX 

Lektè Bib nan ATG25 (EBP|10 sou 10)

Li dezyèm opinyon an: Opinyon Job

#32 | Èske yon kretyen ka fè sa li vle nan kò li?

 

Bondye te kreye nou lib, gason kou fanm. Se akoz libète sa ki fè pèsonn pa fèt tou kretyen menmsi paran li ta sove. Chak moun lib pou kwè ak pa kwè nan Jezi.

"Moun ki kwè epi ki resevwa batèm va delivre. Men, moun ki pa kwè va kondane"(Mak 16.16).

Sepandan, lè ou kwè, sa vle di ou repanti de lavi ou t ap mennen nan sistèm monn lan (1 Jan 2.15-16). Ou resevwa Sentespri ki fè w vin piti Bondye, patizan Kris. 

"Pou nou menm, nou p'ap viv dapre egzijans kò nou ankò, men dapre egzijans Lespri Bondye a, paske Lespri Bondye a nan nou. Si yon moun pa gen Lespri Kris la nan li, li pa pou Kris la "(Women 8.9).

Puiske ou pou Kris la, kò w pa pou ou ankò paske se avèk san li, nan lanmò li sou kwa a, Bondye te achte ou.

"Bondye achte nou kach, li peye chè pou sa. Se poutèt sa, sèvi ak kò nou yon jan pou fè lwanj Bondye"(1 Korent 6.20).

Fè lwanj Bondye nan kò w se fè tout sa k ap fè l plezi ladan. Pou sa, ou bezwen "Kouri pou dezòd lachè" (1 Korent 6.18). 

Lòm divize nan 3 pati: kò, nanm ak lespri. Lè Bib la pale de kò, sitou nan 1 Korent 6.20 an, li pale de lavi ou. Sa vle di, kò ou montre lavi w ap mennen nan Kris la. Si w ap itilize l pou fè tèt ou oswa lòt moun plezi, li pa pou Kris la. 

Alò, èske yon kretyen ka fè sa li vle nan kò li? Non. Okontrè, se fason yon moun ap mennen kò li ki fè yo ka rele l kretyen paske pa gen kretyen san sanntifikasyon. 

Jerome D. Emerson