#37| Kòman legliz ka ede jèn yo reyisi? (suit)

Toujou nan objektif pou jwenn opinyon sou kòman legliz ka ede jèn yo reyisi, men lòt reyaksyon mwen jije enpòtan pou lidè kretyen ak paran yo li epi eseye pratike. (JDE)

____________________

Avi pa m se kesyone jèn yo avèk anpil sajès sou fason y ap viv la pou n ka konnen vrè sous pwoblèm nan. Aprè nou fin konnen si se ta pwoblèm ekonomik, legliz ta dwe voye yo al pran yon kou pwofesyonèl oubyen ede yo fè aktivite biznis jis yo ka ede tèt yo.

Depi y ap travay gen ti mwayen k ap antre y ap wè nesesite pou yo chanje vi yo t ap mennen an.

Edeline G73

__________________

Jodi a, nou konstate gen yon delesman konsiderab bò kote paran nou yo e mete ak de move manèv bò kote timoun yo pou detounen atansyon granmoun yo ki vle fè efò pafwa. Move manèv sa vini sitou avèk move itilizasyon telefòn yo avèk kalite zanmi yo ki anpil nan yo pa montre bon vizyon yo genyen.

E legliz la pa twò konsyan de sa pou yo pote soutyen pa yo jan sa ta dwe ye. Sosyete a pa ka kontinye ale konsa sinon nou tout gen pou nou soufri pi plis pase jan sa ye.

Paran yo bezwen fè yon efò anplis nan kontwole telefòn yo pou konnen sa timoun yo ap mennen sou yo. Kontwole lè y ap rantre lakay la leswa, mòd zanmi yo...

Legliz la bezwen plis prezan nan fòmasyon jèn yo. Pa kouri dèyè yo lè yo tonbe nan sa k mal, konseye yo.

Ann nou renmen plis epi ann fè byen san rete!

Clerjuste ATG8

____________________

1) Fè edikasyon seksyèl jèn yo

2) Mete yon lekòl prenipsyal  andan legliz yo pou koup yo avan maryaj

3) Motive jèn fi ak jèn gason yo pou y al lekòl epi aprann metye

Marc Brezil ATG17

____________________

Konsènan paran ak responsab legliz e yo m ap di si nou te gentan kreye lyen avèk jèn yo soutni yo pale ak yo sou kòman yo dwe mennen vi yo ak sèvi Bondye, devwa nou se kontinye fè l. Jèn se avni legliz la, se yo k ap vin ranplase ansyen yo. Nou dwe ansenye yo levanjil la jan l ye a e aprann yo konsekans peche. Aprann yo renmen èt y ap adore a. Lidè yo dwe ankadre jèn yo, chache konn nesesite yo e sipòte yo jan nou kapab.  

 Ange Berlune ATG25

_______________________

Pou mwen menm, li se yon pwoblèm edikasyon jeneral. Edikasyon se youn nan zam ki ka rann yon moun lib pandan l responsab epi gen matirite. Pou sa rive fèt m t ap pwopoze:

1- Fè etid biblik avèk jenès la sou tematik tankou: peche, kisa li ye, kilè w peche epi ki konsekans li. Konsa y ap konnen ki kalite benefis ki genyen nan sanntifikasyon.

2- Fè fomasyon pou yo sou sèks pandan n ap mete yo an konfyans pou yo DISKITE ak otorite yo tou.

3- Etabli yon relasyon sensè, konstan, zanmitay ak yo pou ede yo pale ak otorite a, ki ka ede yo pran bon chimen, si yo nan move a.

4- Otorite yo dwe avan tou yon MODÈL a suiv.

Emmanuel  G131

_________________________

Chita ak yo konn sa yo vle, kisa ki fè yo pa pran vwa legal pou viv ensanm nan. Ede yo rezoud pwoblème nan. Si tout fwa yo ta vle marye tout moun kole men ansanm pou retire yo nan sa. Aprè akonpanye yo nan lapriyè ak lapawòl ak vizit .

Christelle G79

________________________

Li opinyon lòt jèn sou menm kesyon an:

Givischar Felix

Job G114

Emmanuel ATG17

#36 | Yon kretyen se yon kwayan avize

 

Moun ki pa pran kwa l pou l suiv mwen, li pa kapab moun pa m nonplis (Matye 10.38).

Ou se yon moun avize lè ou aji avèk entèlijans ak pridans. Ou konn sa ou dwe fè ak prekosyon ou dwe pran pou evite sibi konsekans move chwa ou.

Kwè nan Jezi vle di ou pran pawòl ou tande sou li yo pou verite. Ou mete konfyans nan sa li di, ou obeyi kòmandman li yo. Menmlè se yon moun parèy ou k ap anseye ou (Matye 28.20a) oswa ki ba ou lòd (Matye 23.1-3), se Bondye ou obeyi. Nenpòt difikilte ou ta jwenn akoz Levanjil, ou p ap chite menmsi se ta yon frè oswa yon sè ki ta fè li. Paske, se pa yon moun w ap suiv, se Kris la.

Ou pa t kretyen sou aksyon yon kretyen. Si se te sa, ou te mal konprann Levanjil avan ou te konvèti. Paske, lè ou se vrè kretyen, se sou Kris k ap mennen ou je ou yo dwe fikse. Anyen ni pèsonn pa dwe demotive ou. Kèlkeswa sa ki rive, sonje Jezi toujou la pou ede ou (Filipyen 4.13). Soufrans yo se konsekans chwa ou te fè pou viv dwat, pa dekouraje (2 Timote 3.12).

Panse sou chwa w ap fè jodi a pou ou pa bay pèsonn responsab konsekans ou pral sibi demen. 

Jérome D. Emerson