Tanpri, louvri je m. Fè m wè sa m fè a.
Si mwen te aji ak mechanste, mwen p ap rekòmanse (Jòb 34.32).
Nan premye lèt
apot Pòl te ekri nan ministè li, swa nan kòmansman 51 yo, li te ankouraje kretyen
Legliz Tesalonik yo priye tout tan (1 Tesalonisyen 5.17). Ensitasyon sa a valab
pou moman w ap viv la. Se nan tout sikonstans, depi ou vivan, ou bezwen priye Bondye
pou remèsye li, mande sekou ak fòs pou mennen batay espirityèl la.
Sepandan,
lè w ap mande Bondye kichòy, ou ta dwe gade si li pa ba ou li deja. Pa mande tankou
yon avèg k ap tann kui a sonnen pou li konnen degouden tonbe ladan. Anpil fwa,
Bondye ka mete opòtinite pou jwenn sa w bezwen.
Yon lòt
rezon pou gade se fason w ap viv parapò avèk sa ou konnen ak kwè. Nan Ezayi
59.1-2, men sa Senyè a di : « Non !
Se pa paske Senyè a manke fòs ki fè li pa vin delivre nou. Se pa paske li soudè
ki fè li pa tande lè n ap lapriyè nan pye l. Men se mechanste nou yo ki mete
yon baryè ant nou ak Bondye nou an. Se peche nou yo ki fè l vire figi l pou l
pa tande nou».
Lè
ou konn Bondye, ou konnen kòman li mande ou viv. Li pa tande priyè ou ase, li
bezwen tande verite w ap di ak wè w ap viv apa pou li (Matye 3.8). Li pa gen je
pou wè pwoblèm ou yo sèlman, li vle wè aksyon tou. Ebyen, ou pa dwe priye li sèlman,
louvri je ou pou wè si lavi w ap mennen an fè li plezi tou.
Jérome D. Emerson
