Èske Bondye ka fè m jwenn moun pa m nan vre?
Kretyen ki pa kwè Bondye ka chwazi yon moun (gason oswa fanm) pou yo a pa anpil. Anpil nan yo pa kwè ankò aprè yo te fin twonpe sou yon chwa, nan yon revelasyon oswa yon deklarasyon dirèk. Pa manke istwa sa yo nan monn evanjelik la, sitou nan milye pwotestan yo.
Poutan, lè nou gade nan Bib la, nou pa wè twòp egzanp ki montre Bondye te konn bay yon sèvant oswa yon sèvitè li yon konjwen. Majorite ka yo se gason an ki pran madanm li: egzanp Lemèk ki te pran Ada ak Sous (Jenèz 4.19) ak Jida ki te pran Chiya(Jenèz 38.2). Lòt fwa se paran ki te deside, egzanp Abraam ki te fè chache Rebeka pou Izaak(Jenèz 24.1-6) ak Laban ki te bay Jakòb Leya ak Rachèl (Jenèz 29.24,28).
Premye ka a se Èv Bondye te chwazi pou Adan ki te pou kont li nan jaden an men kontèks la pa sipoze yon ansèyman pou kretyen yo akoz pa t ko gen lòt fanm sou latè. Dayè, mesye yo te gen abitid pran fanm san konsilte oswa respekte lwa Bondye yo. Se sa ki te lakòz Salomon te gen tout madanm sa yo (1 Wa 11.1-3).
Rive nan Nouvo Testaman an, sitou nan ministè Jezi, te plis gen diskisyon ak ansèyman sou divòs (Matye 19.1-10). Istwa pale de fiyansay Jozèf ak Mari san montre se te chwa Bondye. Pakont, Bondye te chwazi Mari pou konsepsyon Jezi (Matye 1.18-23).
Sou kesyon Pòl t ap reponn kretyen Lavil Efèz yo sou maryaj, li te plis pale sou devwa konjwen yo (Efezyen 5.22-33) menm jan li te fè nan lèt pou kretyen lavil Kolòs, ak Korent, pou Tit ak Timote. Angwo, pa gen yon ansèyman dirèk sou kòman yon kretyen ka jwenn yon moun pou l marye oswa tann Bondye.
Pakont, gen tèks ki montre sa Bondye atann de pitit li yo:" Se pou chak gason konn chwazi madanm li yon jan ki respektab, ki dakò ak volonte Bondye" (1 Tesalonik 4.3).
Kretyen an lib pou chwazi: yon mesye ka chwazi madanm li, yon madanm ka chwazi mari li depi li respekte prensip yo. Sepandan, tèks nou sot li a pa pale de menaj. Se yon lòt ka.
Men, e si yon sèvant ta priye Bondye pou ba li yon fiyanse pou l marye? Èske li enposib pou yon sèvitè jwenn yon fiyanse pou fè vi li? Repons la ka "wi" oswa "non". Wi, paske Bondye kapab e non pou de rezon sa yo.
Premyèman, gen swadizan kretyen ki plis fokis sou yon moun l ap chache. Li p ap mennen yon lavi apa pou Bondye vre e li pa entèrese pou konnen Bondye atravè pawòl li. Li plis kwè li ka jwenn pase li fè pou jwenn.
Dezyèman, majorite kretyen ki kwè Bondye ka ba yo yon moun gentan dekri moun sa a. Sa ki pral fè yo refize kategorikman yon koutizan ki pa prezante kritè predefini yo. Nan sans sa a, yo plis ap egzije Bondye fè tèt yo plezi (Jak 4.3).
Ou pa kwè Bondye ka ba w yon moun? Se ou ki vle chwazi l? Fè sa pou l nan volonte Bondye.
Ou kwè Bondye ka ba w yon moun? 😊 Tande tout moun ki vin pale avèk ou epi mande Bondye pou konfime ou avan ou rejte li. Paske Bondye pa janm fè move chwa. Si w ap mande palafwa, resevwa palafwa tou.
Jerome Dorsonne Emerson
Modifye: 30 oktòb 2023
