#51| Ou pa renmen don sa a?

 

Ou pa renmen don sa a?

Tèlman gen sèvitè ak sèvant k ap bay tèt yo tit, sitou avèk rezo sosyal ki prèske pa kite anyen sekrè, gen yon tandans ki mete yon gwo konplèks kay kretyen yo sou zafè don: "mwen pa renmen don sa a".

Konsa, anpil moun idantifye plizyè don yo pa renmen, tankou pastè, nimewo 1, evanjelis, apot ak pwofèt. Genyen tou ki pa idantifye don yo, byenke pa gen kretyen ki pa gen don. Alò, èske li nòmal pou yon kretyen pa renmen yon don?

An jeneral, degoutans oswa perèz pou yon don soti nan fason moun ki swadizan genyen yo ap jere l oswa itilize li pou enterè, pouvwa oswa vizibilite li bay. Petèt, se sa ki fè nou jwenn plis pastè pase sèvitè. Poutan, liberalite, konesans, sajès, egzòtasyon ak sèvis, se 5 pami don ki inyore pandan gen anpil byeneme ki manifeste yo.

Daprè 1 Korent 12.7, li pa enpòtan pou yon kretyen renmen, ou pa, yon don paske se Sentespri a menm ki bay don li vle bay moun li vle: "Lespri Bondye a fè travay li yon jan nan lavi chak moun, men li fè l pou byen tout moun". 

Depi jou ou te konvèti tout bon an, sa vle di, ou te sove epi ou te batize nan Sentespri a, ou te resevwa yon don ki se yon kapasite sinatirèl pou sèvi Bondye . Tout sa w gen pou fè se itilize li pou byen lòt moun (1 Pyè 4.10, Efezyen 4.12).

Don Sentespri a bay yo pa pou fè atis, vin popilè oswa fè kapris. Se pou sèvi Legliz li. Renmen ou pa, se li menm ki chwazi ou, se pa t ou menm. Anplis, yon don pa yon feblès, se yon fòs pou sèvi. Depi l nan ou, se sèten, l ap itil e w ap konn kòman pou fè l travay granmesi Sentespri a ki abite nan ou pou fè sa.

Men kòman w ap fè rekonèt don ou genyen? Sa se yon lòt kesyon n ap reponn byento.

Jérôme Dorsonne Emerson

Modifye 7 novanm 2022

#50|Poukisa mwen dwe sonde tout sa m ap tande ?

 

« Jwif Bere yo te gen pi bon santiman pase sa Tesalonik yo: yo te resevwa pawòl la byen vit san traka. Chak jou yo t ap egzamine sa ki te ekri nan Liv la pou wè si sa Pòl t ap di yo a se vre ». (Travay 17.11)          

Sonde pa anpeche kwè

Juif Bere yo pa t fè retisans, yo te kwè nan evanjelis yo san bay pwoblèm. Yo pa t fè fo diskisyon. San dout, Sentespri te avèk Pòl pou li te ka konvenk oditè li yo. Se pa nan bèl pawòl ni nan fòse : juif yo te kwè fasil nan Jezi, Sovè a.

Bib la se vrè mezi a

Juif sa yo pa t rale liv filozofi ni apiye sou deklarasyon ate yo. Se nan Liv lalwa yo yo t ap verifye pawòl Pòl yo. Pòl pa t bezwen doute sou kapasite li ni fòse yo kwè. Li te konnen li t ap pale verite. Se Sentespri a ki t ap fè travay li (1 Tesalonik 4.8).

Aple pa anpeche erè

San dout, juif Bere yo pa t kite vokasyon Pòl ipnotize yo. Sa ki te enpòtan, se pou pawòl li yo te konfòm avèk sa ki ekri nan Liv la. Aple ou pa, yon predikatè dwe preche verite ki nan Bib la, sinon, nenpòt oditè avize ka rejte ansèyman li.

Egzamine pou jwenn verite

Juif Bere yo pa t bezwen kwè nan yon atis, yon vedèt, yon nonm ki popilè. Yo t ap chache verite pou jwenn libète nan Kris la (Jan 8.31-32). Ke Pòl te fò, elokan, chwazi, puisan, se pa t sa ki te entèrese yo. Yo te bezwen verite. Pou sa, yo te oblije pase sa li t ap di yo nan mezi san fay la : Liv la.

Konfyans pou sove depann de ou

« Sali a pèsonèl » pa vle di w ap sove tèt ou jan ou kwè. Pito, se selon verite a (Women 10.17). Kifè, si se pa nan vrè pawòl sou Kris la – puiske gen anpil pawòl sou li – ou kwè, ou p ap ka sove. Ebyen, pou evite pran nan Levanjil bò katedral (Galat 1.6-7), ou bezwen egzamine sa w ap tande.

Egzamine pa yon peche

Non, volonte oswa kapasite pou reflechi sou yon doktrin avan ou kwè li pa yon peche. Okontrè, sa ap evite fè gwo peche. Se menm Pòl sa yo t ap egzamine pawòl li ki pral di nan yon lèt li te voye bay menm juif sa yo : 

« Egzamine tout bagay byen, kenbe sa ki bon» (1 Tesalonisyen 5.21). 

Sitou, lè yon kretyen popilè, gen tandans pou kwè tout sa li di, ekri oswa fè. Li menm ka panse li pi saj pase Sentespri. Ou menm ki deja avize, evite kouri kwè san sonde. W a sove tèt ou ak tout moun k ap suiv oswa tande ou.

Jérôme Dorsonne Emerson

#49| Kòman m ap fè konnen si panse m yo bon?

 

Kapasite pou ou panse soti nan libète Bondye bay chak moun, depi sou Adan jiska ou menm. Se yon travay ki soti nan volonte ou e ki ede ou reflechi, granmesi entèlijans ou, sou sa ki vizib oswa envizib, sa ou santi, sa ou imajine.

Panse ou kontrè ensten ou ki diferansye ou de bèt akoz yo pa ka reflechi. Se sa ki fè yo souvan kalifye "bèt" yon moun ki pa ka panse. Konsa tou, yo pale de ensten pou siviv (instinct de survie) ki pouse moun pwoteje tèt yo ak viv nan sosyete a. W ap poze nenpòt zak pou chape anba yo fiziyad san reflechi akoz ou pè mouri.

Malgre ou pa nan yon sitiyasyon, yon zòn, yon pozisyon, ou souvan ap reflechi sou sa w ta fè. Nan lespri ou, ou brav. Ou wè lavi a bèl, fasil. Ou ka imajine tout sa ki enposib nan reyalite a. Konsa tou, ou ka gen lide fè mal. Alò, kòman w ap fè konnen si panse ou yo bon oswa mal? Apot Pòl reponn nan tèks sa a:

"Pou fini, frè m ak sè m yo, bagay ki pou nan lespri nou se bagay ki bon, ki vrè, ki jis, ki sen, ki bèl, bagay moun respekte, ki pwòp epi bagay moun ka fè lwanj pou yo" (Filipyen 4.8). 

Koulye a, ou gen 8 kalite pou verifye pou kont ou panse w ap fè. 

Jerome Dorsonne Emerson