#53 | Yon sekrè pou aprann renmen li Bib la

 

Lekti Bib la se yon fado lè ou panse se yon obligasyon pou li l chak jou menmsi ou pa anvi. Non, Bondye pa bezwen nou li pawòl li si nou pa gen dezi fè sa. Se tankou ou t ap meprize yon granmoun k ap pale avèk ou. Men, lè ou respekte yon moun, ou pote anpil atansyon nan sa l ap di.

Pou ou ka (re)jwenn pasyon nan li Bib la chak jou menm jan avèk lektè nan 10 sou 10, gen plizyè bagay ou ka fè, pami yo, m ap konseye ou prensip sa a : li pou ou konprann. Wi, lè w ap li pou konprann, ou gen plis enterè pou louvri Bib la chak jou. Men, kisa w ap chache konprann ?

Plis monn lan ap evolye, se plis gen bagay ou pa rive konprann. Se nòmal, paske gen pwofesi k ap akonpli. Egzanp, èske ou janm li 2 Timote 3.1 pou konprann rezon boulvès nan peyi ou ? Koute sa byen :

« Mete sa byen nan tèt ou: nan dènye jou yo, tan an pral difisil anpil ».

Pawòl sa a te ekri nan lane 64 yo aprè Jezikri. 1959 ane aprè, tan an ap vin pi difisil e lòm ap vin pi mechan. W ap viv sa ou te konn wè nan sinema, bagay ou pa t janm imajine ap pase devan ou e yo touche pwòch ou. Si ou rete ap panse sou tout evènman sa yo, sèvi Bondye p ap gen sans paske w ap plis panse kòman pou sove tèt ou.

Lè ou li 1 Timote 4.1, ou ka konprann difikilte nan tan an pa sèlman nan evènman yo. Li nan entèpretasyon Levanjil tou.

« Lespri Bondye te di sa byen klè: nan dènye tan an, gen moun k ap lage konfyans yo nan Bondye. Yo pral obeyi yon bann lespri k ap bay manti, yo pral swiv yon bann pawòl ki soti nan move lespri yo”.

Anfas reyalite sa yo, li enpòtan pou ou chache konprann Levanjil pou fo doktrin pa fè ou chanje kan, chache mirak agoch adwat jiskaske ou mouri san sove. Pou sa, lekti Bib la pa dwe yon fado pou ou.

« Ala bon sa bon pou moun ki pa koute konsèy mechan yo, ki pa swiv egzanp moun k ap fè sa ki mal, ki pa chita ansanm ak moun k ap pase Bondye nan betiz, men ki pran tout plezi l nan lalwa Seyè a, k ap repase l nan tèt li lajounen kou lannwit. »

Se sèten, lè ou gen krentif pou Bondye, ou pa ka pa renmen pawòl li. Nonsèlman, l ap fè ou byen, granmesi meditasyon, w a p ka konpann konpleksite lavi a. Konsa, chak fwa ou santi dekourajman, w ap plonje nan Bib la pou chache rekonfò nan pwomès Bondye yo.

 Yon atik ki ka entèrese ou: Mennen tèt ou byen nan Kris la

Jerome Dorsonne Emerson

#52| Yon kretyen ka koz yon nanm pa sove ?

 

“Men ki bò kondanasyon an soti pou yo: limyè a te vini nan lemonn men lèzòm te pito fè nwa a pase limyè a paske sa y ap fè a mal” (Jan 3.19).

Nan mesaj li t ap bay sou Mòn nan, Jezi te di disip li yo :

« Se limyè nou ye pou moun sou latè » (Mat 5.14).

Antanke limyè, yon kretyen reflete imaj Kris la tout kote : nan travay, nan lekòl, nan vwazinay, sou rezo sosyal yo sitou. Pou rezon sa a, aksyon li dwe konfòm avèk limyè sa a. Tankou Pòl te di kretyen lavil Efèz yo :

«…limyè a fè moun fè bagay ki bon, bagay ki dwat ak bagay ki vre » (Efezyen 5.9).

Si yon kretyen pa ta viv selon limyè, èske li ka lakoz yon moun pa sove ? Dabò, nou dwe konprann kilès yon vrè kretyen ye. Nou ka itilize mo « limyè » a pou fè sa. Konsa, yon kwayan ki se limyè pa ka lakoz yon nanm kondane pou move aksyon li, pawòl li ak konpòtman li. Pa gen moun ki vin kretyen pou kondane oswa fè pechè pèdi.  

Ansuit, nou bezwen konprann moun ki pa vle konvèti yo ap chache tout eskiz pou rejte Kris. Yo menm ki pa vle pou kretyen jije yo pa ezite fè sa chak fwa yo wè nesesite pou repanti. Jezi te di disip yo konsènan farizyen yo :

« Se pou nou koute yo, se pou nou fè tout sa yo di nou fè. Men pa fè tankou yo.. » (Matye 23.3).

Ou menm ki se yon limyè, briye nan tout sa w ap fè pou yon lòt moun ki nan fè nwa ka klere.  

Finalman, Jezi pa t vin kondane, misyon li se te sove tout moun san patipri. Puiske chak moun lib pou chwazi, genyen ki pa chwazi limyè a. Se chwa pa yo. Nan jou jiman an, yo p ap gen eskiz.

Li tout atik yo isit la: Lis tout atik yo

Jérôme Dorsonne Emerson