#55 | 10 bagay yo pa fòse yon vrè kretyen fè

10 bagay yo pa fòse yon vrè kretyen fè

Konbyen fwa sa rive w ap ankouraje yon moun ki fèk konvèti oswa ki legliz lontan oswa ki fèk batize, epi malgre tout sa ou fè, li pa janm chanje? Sa ki pi fasil pou fè, se dekouraje menmsi ou konnen ou dwe kontinye. Ebyen, tèks sa a pa ekri pou fè ou sispann paske se ka ministè ou. Toutotan, ou ka ankouraje yon moun sèvi Bondye byen, li bon. Men pou ou ka pi efikas nan ministè sa, li enpòtan pou ou konnen avèk ki tip kwayan ou annafè. Konsa, w ap konnen ki pi bon estrateji ak egzijans pou reyisi.

Lis aksyon oswa konpòtman sa yo pa egzostif men yo ka ede ou gen yon lide sou yon vrè kretyen.

    1.      Batize

Depi jou ou te konvèti a, ou se yon kretyen paske yon vrè repantans toujou suiv batèm Sentespri (Travay 2.38-41). Lè ou fin sove, ou pa ka refize batèm ki se prèv kwayans ou nan Jezikri (Mak 16.15-16). Yo pa fòse yon moun ki konvèti tout bon plonje nan dlo batèm. Fòse batize se youn nan pi gran koz chite anpil manm nan Legliz Evanjelik yo.

    2.      Ale legliz

Se pa ale legliz ki fè ou vin yon vrè kretyen men pèsonn pa bezwen fòse ou ale nonplis puiske ou konnen se moman pou kominote a reyini pou yo edifye ak adore Bondye (Travay 2.42 ; 1 Konret 11.20-22). Yon moun ki pa vle ale legliz ap jwenn ase pretèks pou jistifye sa men yon vrè kretyen konnen youn dwe sipòte ak padone lòt nan lanmou Kris la (Kolosyen 3.13). Kou yo toujou di, depi se kote ki gen moun, konfli a posib. Pou legliz zanj yo, se nan syèl la l ap ye. 

    3.      Li Bib la regilyèman

Pi souvan, kretyen yo renmen priye paske se mwayen pou pale avèk Bondye. Sepandan, se nan Bib la nou jwenn ansèyman sou lapriyè (Matye 6.5-13 ; 21.22 ; Lik 11.1 ; Jak 4.3, 1 Tesalonisyen 5.17). Eskiz nimewo 1 pou pa li Bib la regilyèman se manke tan. An reyalite, se manke enterè ak inyorans paske yon vrè kretyen se yon disip k ap aprann sèvi Mèt li chak jou. Li dwe gen yon sous l ap puize pou li ka pi efikas chak jou (2 Timote 3.16).

    4.      Priye

Se Bib la ki di : « Pa janm sispann lapriyè » (1 Tesalonisyen 5.17). Pakonsekan, yon kretyen bezwen priye chak fwa sa nesesè (Filipyen 4.6). Li difisil pou sèvi Bondye san yon videpriyè puiske Bondye se Lespri. Ebyen,  yon moun ki deside sèvi Bondye pa ka bezwen yo fòse li devlope yon relasyon pèsonèl avèk li. Fòse li se inyore verite sa.

    5.      Pran repa Senyè a

Bib la di : « Sa se kò mwen. Se mwen menm ki bay li pou nou. Se pou nou fè sa pou nou ka toujou sonje mwen » (Lik 22.19). Sakris Jezi te fè pou sove yon pechè dwe toujou nan lespri li. Se yon fason pou l toujou sonje pri ki te peye pou delivre li nan peche. Konsa, l ap toujou mennen yon lavi apa pou li ka toujou kominyen. Pèsonn pa oblije fòse yon kretyen raple l sakrifis Sovè li. 

    6.      Mennen yon lavi apa pou Bondye

Pa gen vrè kretyen san yon lavi apa pou Bondye (sanntifikasyon). Paske, men sa Bib la di : « Men sa Bondye vle pou nou : Se pou nou viv papa pou Bondye, pou nou pa lage kò nou nan imoralite » (1 Tesalonisyen 4.3). Yon moun imoral pa ni genyen ni respekte prensip. Li fè sa li vle e li pa gen kontwòl kò li. Poutan, kò kretyen an se pou fè lwanj Bondye (1 Korent 6.19-20). Kòman yon vrè kretyen ap ka viv nan imoralite (pratike peche)? Enposib. Viv pou fè Bondye se yon plezi pou li (Som 34.7). Ou pa ka fòse l fè sa.

    7.      Bay moun ki nan bezwen

Lavi pami premye kretyen yo te kòmanse nan pataje sa yo genyen selon bezwen chak moun (Travay 2.45). Jezi ki t ap viv nan yo a pa chanje (Ebre 13.8), li toujou nan nou jodi a. Ebyen, nou bezwen santi menm devwa sa a anvè frè ak sè nou sitou lè nou konnen yo nan nesesite. Bib la ankouraje nou fè byen nèt ale (Galat 6.10).

    8.      Padone

Pami tout rezon pou yon kretyen ta padone, an nou site 3: 1) se yon devwa (Kolosyen 3.13); 2) Jezi se modèl padon (Kolosyen 3.13 e 3) Se yon mwayen pou jwenn padon anretou (Matye 6.14-15). Refize padone ka anpeche Bondye reponn lapriyè ou (Matye 6.12). Yon vrè kretyen pa chache rezon pou l kenbe frè l ak sè l nan kè l. Li konnen se yon devwa. Yo pa fòse padon ki se yon aksyon lib ou pran pou ou pa vanje. Annefè, pa padone se premye mwayen pou tire revanj. 

    9.      Mande padon

Nan Jak 5.16, sèvitè a ekri : « Se pou nou konfese peche nou youn bay lòt.. ». Menm jan ou konn nan pozisyon pou padone paske yo blese ou, se konsa li posib pou blese lòt moun paske ou pa pafè. Tout moun ka fè erè e nou fè peche san nou pa rann kont. Lè sa rive, diskite pa enpòtan. Rekonèt erè ou epi mande padon. Sa pa fè ou piti, se prèv ou gran. Yon vrè kretyen p ap kite yo fòse li fè sa paske li konn sa ki bon ak sa ki pa bon.

    10.  Evanjelize

Yon kwayan ki sove tout bon resevwa Kris nan lavi li. Granmesi lavi sa a, li se yon limyè k ap klere tout kote li pase (Matye 5.14-16). Kòman l ap ka fè sere limyè sa a ? Anreyalite, tout kretyen konnen byen se devwa yo pou chache nanm pou Kris nan nivo  yo kapab men eskiz pa manke anpeche yo fè sa. Sepandan, si yon swadizan kretyen ta pè oswa ou pa ka evanjelize, li ta dwe krenn Bondye pou l pa fè yo pale levanjil, legliz oswa Bondye mal nan fason l ap viv.

 Jérome D. Emerson

Modifye 13 novanm 2023

 Jérome D. Emerson

#54 | Kisa ki fè nou pa ka mete verite nou li yo an pratik?

10 sou 10 se yon metòd pou li Bib chak jou ki te kreye nan dat 1 fevriye 2021 nan vil Senmak. Aktyèlman (10 avril 2023), gen 595 lektè ki fin li Nouvo Testaman an, 143 ap li Nouvo Testaman an epi gen 345 lektè nan Ansyen Testaman. 

Nan yon ti ankèt nou t ap mennen nan jou ki te 11 avril sou pwoblèm mete verite an pratik, nou te poze kesyon sa a nan gwoup fanmi lektè yo ki gen 582 manm: "Daprè ou menm, kisa ki fè malgre n ap li Bib la, nou wè verite a epi nou pa ka mete yo an pratik?"

Nou te jwenn 27 reyaksyon, nou pataje yo nan atik sa a pou fè w dekouvri rezon ki fè sa. 

1. Se paske nou pa kite lespri Bondye a jwenn kè nou tout bon. Wilson G122
2. Se paske nou pa bay Sentespri Bondye kote pou l antre e abite nan kè nou tout bon vre. Eliane ATG25
3. Mwen ta vle di, èske se pa relijyon ki fè nou sa ?Anpil fwa nou li, lè n ta eseye konprann, yo ban nou l tèt anba. Jesula ATG1
4. Se paske nou pa kite volonte Bondye dirije nou epi nou pa aji selon lespri Bondye a.  Wilguens ATG27  
5. Nou pa konprann. Si nou te konprann sa nou li a nou t ap mete l an aplikasyon e konsa nou te ka rale yon souf. Mayette ATG7 
6. Pou mwen menm: se paske nati peche a nan nou. Nou gen plis panchan pou fè sa ki mal pase sa ki byen. Pafwa, ou konn ap fè sa ki byen, puiske ou se yon pechè, ou doute de sa. Acé ATG21
7. Se menm jan avèk parabòl nonm k ap simen an nan Matye chapit 13 la. Pou mwen menm, se paske nou pa kondisyone lavi nou yon fason pou pawòl la fè efè lè nou fin li l. Move vi n ap mennen yo (pratike zèv lachè) tèlman ak yon nivo wo anndan nou, malgre nou li verite a li pa fè efè. San nou pa bliye enfliyans dyab la. Lesly G121
8.  Daprè mwen menm, se paske genyen verite pou ou arive mete l anpratik, li mande ekzijans. Genyen ekzijans ki mande soufrans. Kretyen denojou pè soufri. Ni moun k ap di verite a, ni moun k ap tande verite pa pratike l. Bèl diskou sèlman pa genyen pratik. Payen yo pa bezwen bèl pawòl se pratik la yo vle. Phanès G123
9. Bonjou dapre mwen menm anpil fwa se nou menm ki dirije tet nou ,nou mache selon la che,depi se Bondye ki dirije nou ,nou pap aji menm anko,pawol nou ap chanj epi fason nou konpote nou ap idantifye nou an fas yo yon payen. Nadege ATG38
10. Lèw gen krentif pou Bondye e ou vle viv an akò ak pawòl la wap goumen pouw metel an pratik. Sa konn rive ou konnen se pechel ye men w fèl kanmèn sou pretèks ke la chè a fèb, nou bliye ke lespri a li menm li byen dispoze.se vyolans poun fè epi poun chèche sanktifikasyon. Myriam ATG37
11. Se paske n ap viv daprè egjijans kò nou. Stwat ATG14
12. Se paske nou pa kite sentespri Bondye a  aji nan kè nou tout bon vre. Nadège Michel ATG39
13. Daprè mwen menm, rezon ki fè anpil nan nou li Bib la nou wè verite a nwa sou blan epi nou pa mete yo an pratik, anpil fwa se relijyon yo ki konn koz. Moun k ap anseye nou yo anpil ladan yo defòme verite a pou yo fè nou kwè yon lòt bagay epi yo vin mete w nan obligasyon pou dakò ak sa yo di w lan ki pa gen anyen pou wè ak verite. Lè konsa ou vin nan konfizyon. Konsa tou, Satan li menm ki se yon rize konn jwe tout jwèt pou li detounen nou  de verite a. Si yon moun pa konn verite a li klè moun sa ap toujou kaptif e ak kouran levanjil ki deyò yo la se grav. Si yon moun pa kite Lespri BonDye dirije l epi rete nan priyè, l ap toujou pa ka pratike verite a, si moun sa tou pa chèche sonde, egzamine predikatè yo paske menm Bib la di sa se pou nou egzamine yo, kidonk n ap toujou pa ka met an pratik verite an lè li anfas nou. Pa gen anyen ki kapab chanje yon verite tou. Se pou nou priye pou Sentespri a kapab fè nou wè klè lè gen mansonj ak verite. Job G114
14. Pou mwen, sa ki rann n ap li Bib nou paka metel an pratik, ka gen plizyè rezon pisouvan dekourajman ki kòz parese sa konn trouve se tròp travay, poutan li senp genyen tou se koz monn nan ki pa fasil poul kite. Mackenson ATG34
15. Avi pa m dèfwa se pa an pratik nou pata mete yo anpratik men se twòp bagay n ap wè ak tande k ap pase nan peyi nou vin rann lespri nou twouble.  Rémy ATG40
16. Relijyon yo ak fo doktrin! Anplis majorite asanble yo pa sèvi ak 5 don ministeryèl. Fòk pastè yo sispann fè bagay pou kont yo. Se pou doktè yo jwe wòl yo epi lapè! Marc ATG17
17. Daprè mwen, non sèlman nou li, nou manke, nou pa kite lespri a fè travay li dwe fè a. Paske, Jezi te di lè l vini l ap kondwi nou nan tout verite. Men nou pran sa k al nan san nou epi nou tande twòp moun. Nou vin gen plis dout toujou. Nou bezwen kite lespri a dirije tout bon. Anpil enfliyans monn sa anpech nou, nou plis wè sa moun panse de moun si nou fè sa lespri mande nou. Jounaydline G115
18. Se  paske  nou pa kite lespri Bondye dirije nou. Lè n ap sèvi Bondye nou dwe veyatif epi  nou dwe vyolan paske gen de bagay ki prezante devan w e konnen li p ap fè Bondye plezi se yon vyolans pou w fè  menmjan avèk Jozèf ki te anfas madan Potifa. Li te fè yon vyolans li met tèt li deyò men Bondye te kanpe avèl paske sa l te fè a te fè Bondye plezi. Ocianie G112
19. Daprè mwen menm, se paske: 1.Nou pa kite lespri verite a pèse nou,nou jis li Bib la pou li. 2.Nou souvan nan konfizyon avèk sa nou li yo. Chak moun bay vèsè yo yon sans. Lè konsa, nou pa konnen kisa ki verite tout bon vre. E souvan, se sa ki pa bon an nou plis kenbe paske se li menm nou te gentan gen nan lespri nou pou n fè. Ivania ATG27
20. Mwen te kapab di menmsi moun nan lire Bib li chak jou epi li pa janm mache selon lapawòl Bondye mwen kapab di moun sa nan fènwa toujou. Kris poko jwenn avèk kè l. Peterlee ATG40
21. Daprè mwen menm, se paske nou manke pridan. Menm jan Bib la di l, se pou nou pridan tankou sèpan. Manke pridans sa a vin koz nou rapwoche nou bò kote peche a pi plis pa rapò avèk sa n ap imajine. Sa n ap gade avèk zye nou ki vin debouche sou yon pakèt vye aksyon ki pa nan volonte Bondye.. Job ATG20
22. Paske nan pratike pawòl Bondye gen chaje kwa a (soufrans yo, pwoblèm yo...)  nou jis pa kite pawòl yo konvenk nou. Nelcia ATG23
23. Daprè mwen, gen plizyè bagay ki fè malgre nou wè verite nou pa ka mete l an pratik. Lè n ap gade nan lòm nou nou wè verite se bagay ki pi difisil pou yon moun pratike paske nan verite ap gen soufrans, gen privilèj ou difisil pou jwi. Moun ap rayi ou e nou menm antanke kretyen difikilte a se paske nou twò atache avèk lemonn. Monn menm  se mansonj k ap renye ladan. Christopher ATG27
24. Daprè mwen menm, se paske lè nou li Bib la nou pa kite lespri Bondye dirije nou. Nou li l selon lachè, nou pa kite nou transfòme vre. Nou li Bib la avèk entelijans nou. Kidonk, l ap difisil pou nou ka pratike sa nou li a paske se entèpretasyon pa nou ak konpreyansyon pa nou ki gid nou.  Youdelande ATG33
25.  Nou li nou pa ka fè bon pratik lan se paske nou manke:1) disèneman 2) nou manke krentif pou Bondye 3) nou prefere fè lemonn plezi ke Bondye ak legliz nou4) nou manke jwenn tewolojyen k ap pataje bon egzanp nan antouraj nou. Pa egzanp sou chè a ou di m pa vòlò pandan ou menm ou pa peye enpo, ou dim. Néricille G112
26. Bonswa tout moun!!! Mwen salye nou nan non Jezi!!! Daprè mwen, se paske nou pa gen pwisans sentespri avè nou, anplis nou konn li bib la nan lespri siperyè sa vle nou nou konn panse nou pi siperyè a sa bib la di.. Duckenson G123
27. Se vre li enpòtan pou nou li Bib la paske se yon enperatif pou tout kretyen otantik konnen byen Pawòl BonDye a, men sa ki pi enpòtan nou dwe gen Sentespri BonDye nan lavi nou ki pou ede nou pratike Pawòl. Epi tou, nou bezwen rete nan la priyè pou n ka jwenn rema. Lè nou li pou nou konprann byen sa nou li an. Menm jan li Di nan Som 119.11, mwen sere pawòl ou yo nan kè mwen, pou m pa fè peche kont ou. Se sa Lespri BonDye a ede nou fè. Sherly G115

 Ou ta renmen fè pati fanmi sa a pou w ap li Bib ou chak jou epi fè opinyon ou pase lè sa nesesè? Enskri jodi a menm Isit la.