#58| Poukisa pa gen anpil disip Kris?

 

Èske ou se yon disip Kris?

Avan mwen opine sou sa, mwen ta renmen raple ou yon vrè kretyen se yon disip Kris. Mo disip la gen rapò avèk leson oswa ansèyman yon elèv ap resevwa nan men yon mèt. Konsa, Jezi te gen 12 disip epi li te voye yo al fè disip (Matye 28.19). 

Men gen yon gran diferans ant yon disip Kris ak yon fanatik Kris. Li fasil e li esansyèl pou w rekonèt kilès ou ye. Youn nan mwayen pou rekonèt sa se atravè kwayans ou ak konpòtman ou devan moun k ap preche oswa anseye. 

Li difisil pou yon fanatik aksepte kritik sou idòl li akòz li twò pasyone de li. Reyaksyon li ka vyolan epi li pa reflechi avan li pale ak aji. Kontrèman, yon disip konn mèt li byen granmesi andoktrinman. Nan kad lòm, l ap konnen feblès li men pou Jezi, Mèt tout kretyen, pa gen fay. Toutfwa, disip la pa bezwen vyolan. Bib la di:"Lè n ap pale, di bagay ki pou fè yo kontan, ki pou entèrese yo. Konn ki jan pou nou reponn chak moun"(Kolosyen 4.6). 

Yon disip Kris pa nan fo diskisyon:"... pa mele nan diskisyon san sans moun fou yo. Ou konnen sa toujou fini nan kont."  (2 Timote 2.23). Poutan, yon fanatik pran plezi nan fè sa. 

Nan vèsè 2 Timote 2.24-25, apot Pòl bay 5 kalifikatif yon bon disip k ap sèvi Bondye: 

" Yon moun k ap sèvi Bondye 

1°) pa fèt pou nan kont. 

2°) Se pou l viv byen ak tout moun, 

3°) se pou l konn ki jan yo fè enstriksyon moun, 

4°) se pou l gen pasyans. 

5°) Se pou l korije moun ki pa dakò avè l avèk dousè".

Kote fanatik la ka fè vyolans pou konvenk ou se ekip oswa kan pa li a ki pi bon, li prè pou souzestime ou jiskaske li vyolante w, sajès disip Kris la sifi:"Ou pa janm konnen: Bondye ka ba yo yon chans pou yo chanje jan y ap viv la, pou yo vin konn verite a" (2 Timote 2.25).

Avan ou vin disip, ou bezwen yon mèt pou ba ou leson. W ap gen devwa, eprèv ak disiplin pou respekte. Pou sa, fòk ou gen tan pou tande, reflechi, aprann ak sajès pou aplike. 

Yon fanatik pa bezwen egzijans sa yo. Li pa menm konnen kilès Kris ye. Èske se pa sa ki fè anpil moun ki pretann kretyen pandan yo pa konn kilès Kris ye tout bon?

Youn nan mwayen pou ou rekonèt yon disip Kris, se konnen dabò ou se youn. E lè ou konsyan ou se youn, w ap konnen ou angaje pou fè lòt. Ou p ap janm yon fanatik.

Jérôme Dorsonne Emerson

Modifye 16 novanm 2023

W ap renmen sijè sa a👉Tann oswa aji poukisa w priye?👇

#57| Tann oswa aji: Poukisa w priye?

 

Konfyans ou gen nan Bondye konn sanble ba ou yon dwa pou kwè sa w vle ak tann sa w panse li dwe ba ou (Matye 21.22). Eksperyans ou nan priye pou mande Bondye sa w poko janm jwenn ka yon prèv. Paske, si ou kwè Bondye ka ba w, nenpòt sa w mande, ou ta dwe jwenn li. Malerezman se pa sa ki rive.

Souvan, nan kèk sitiyasyon, priye Bondye konn mande pou tann (Women 12.12). Lè konsa, ou pa konn kisa pou fè. Sèl sovè ou se Bondye ki pou entèvni (Lik 7.1-10).

Nan lòt ka, ou ta dwe aji lè ou konnen byen sa Bondye ap tann de ou (Efezyen 5.10). Kifè, anpil fwa, se Bondye k ap tann ou aji (Ezayi 1.15-18). Ou pa ka mande si l vle ou padone yon moun ki fè w mal, ou konnen se yon devwa (Kolosyen 3.13). Ou fiyanse? Travay pou nou marye, pa tann Bondye revele w dat la paske maryaj se volonte li (Jenèz 2.24).

Toujou sonje Bondye ki ba w konfyans la se menm ki ba w entèlijans. Avan ou priye pou konn sa li vle, gade si li pa gentan di w sa. Li ba w Sentespri pou konnen sa ki sinatirèl e li ba w je pou wè sa ki òdinè tou (Sòm 119.18). 

Sèvi Bondye avèk sajès! 

Jérôme Dorsonne Emerson

Foto/Jeanine Kongo