#60 | Kisa ki ka lakoz yon maryaj kraze (1)

🔵 OPINYON

Gen plizyè koz ki ka kraze yon maryaj, pami yo, adiltè. Bondye te deja mete pèp li angad kont sa: " Piga nou fè adiltè" (Egzod 20.14). Pi lwen, nan Malachi 2.16, li mande pou gason yo respekte tèt yo epi kenbe pwomès yo te fè madanm yo.

Lontan, se te yon wont pou yon moun divòse. Kounyea, se yon bagay nòmal. Sa nou dwe konprann sèke nou pa dwe konpòte nou menm jan ak moun ki pa konn Bondye (Women 12.2). Nou bezwen evite suiv prensip monn lan (1 Jan 2.15-16).

Yon lòt koz se lè gen povrete nan fwaye a. Se pa tout fanm ki gen krentif pou Bondye epi ki gen pasyans pou rete byen viv avèk mari l lè li pa jwenn tout sa li bezwen materyèlman.

Pafwa, mari a konn pèdi travay li ki fè madanm nan vin pa gen respè pou li. Nan Ebre 13: 5, nou li: "Pa kite renmen lajan pran nanm nou. Se pou nou kontan ak sa nou genyen. Paske Bondye te di: Mwen p ap janm vire do ba ou, mwen p ap janm lage ou".

Dayè, yon madanm gen responsabilite pou segonde mari li nan kay la. Nou jwenn yon bèl egzanp nan Pwovèb 31.10-31 ki pale sou yon bon madanm.

Medam kretyen yo, an n pwoteje mari nou kont divòs k ap d'étui fanmi yo. 

Myriam ATG37

ETID BIBLIK PÈSONÈL (EBP)

#59| Sispann kache limyè ki nan ou a

« Se limyè nou ye pou moun sou latè. Moun pa kapab kache yon lavil ki bati sou yon mòn » (Matye 5.14)

Yon kretyen se limyè : se sa nou repete souvan paske li ekri nan Bib la e se Jezi menm ki te deklare li devan disip li yo pou fè yo konnen enpòtans wòl yo nan monn lan. Yo pa jis yon seri patizan k ap mache dèyè Jezi paske li popilè oswa li gen lajan. Puiske Jezi se limyè, yo menm k ap suiv li dwe gen limyè sa a.

Menm jan Jezi ap klere monn lan, yo menm tou yo gen pou devwa fè menm travay la. Yo pa dwe kache limyè yo ye. Pami tout rezon yo, se paske moun k ap viv selon prensip monn lan nan fè nwa, yo bezwen soti. Se jan disip yo ap viv k ap fè travay sa. Alò, kòman ou menm ki se disip ka kache limyè sa a nan ou ?

Gen 5 fason ou ka kache limyè ki nan ou a[1] :

1.      Ou fè silans olye ou pale (Efezyen 5.11)

Pale anpil ka fè ou peche (Pwov 10.19) men gen lè pou ou pale lè pawòl w ap di a ka sove ak defann lafwa ou. Gen silans ki konplis. Kretyen an dwe pale nan sousi pou demaske oswa denonse fènwa. 

2.      W ap viv selon prensip monn lan (Women 12.2)

Bondye ap travay nan ou menm jan lemonn ap travay sistèm yo. Si Sentespri li ap viv nan ou toutbon, w ap konn sa Bondye vle ou fè nan nenpòt peryòd nan lavi : ansyen kou nouvo tan.

3.      Ou inyore verite a ki se limyè (Som 119.105)

Anreyalite, se pawòl la ki fè ou se limyè. Se li k ap gide ou. Chak fwa ou refize mache nan vrè wout la osinon ou viv andeyò prensip ki nan Pawòl la, se limyè a ou kache. Annefè, pawòl la se yon limyè pou kretyen an (Pwovèb 6.23).

4.      W ap viv nan peche (Jan 3.19)     

Gen moun ki pa konvèti akoz yo pa vle move zèv yo parèt nan limyè. Kòman yon kretyen ka fè kache limyè li te aksepte pou klere chemen lavi li ? Ebyen, si w ap viv nan peche, se tankou limyè a pa nan ou vre.

5.      Ou pa vle evanjelize (Efezyen 5.16)

Si avan ou te aksepte Jezi, ou te nan fè nwa, jodi a ou nan limyè (Efezyen 5.8). Zanmi ou yo, kamarad klas ou, kòlèg travay ou, vwazen ou yo bezwen limyè sa a ki fè w ap briye a. Chak fwa ou pa vle evanjelize, ou kache limyè a.

L ap difisil pou ou kontinye kache limyè ki nan ou a lè ou genyen li. Paske, limyè pa ka rete anba tab (Matye 5.15). Sa vle di, tout antouraj ou ap klere. Yo ka chwazi rete nan fè nwa akoz yo pa vle zèv yo parèt aklè, lè sa a ou pa responsab. Sepandan, refi yo pa dwe anpeche ou briye.

W ap renmen atik sa ki sou menm sijè a: Yon kretyen ka koz yon nanm pa sove?

Jerome Dorsonne Emerson

---

[1] Bible d’Etude Vie Nouvelle, Mat 5.14, p1395