#62| Kisa ki ka lakoz yon maryaj kraze (3)

Selon mwen, gen 3 rezon fondamantal ki kapab kraze yon maryaj. 

1) Kominikasyon

Se lè pa gen dyalòg, konjwen yo pa renmen diskite sou sa ki byen ni sou ki mal k ap pase nan fwaye a. Lè konsa konn gen ipokrizi nan mitan yo. Zanmi konn gen plis enfòmasyon sou sa k ap pase nan fwaye yo. 

2) Manke atansyon youn pou lòt

Fanm renmen lè mari li toujou ap felisite l lè li fin abiye, fè manje,  fè travay. Li renmen pou mari a fè l santi li se fanm. Lè l ap pale avèk li, menm si sa l ap di a pa ta nan sans mari a, li pa dwe inyore l. Se menm jan pou gason an, li bezwen atansyon madanm li.  

3) Sèks (fè bagay)

Sèks se youn nan pwen ki vrèman enpòtan nan fwaye a. Nan Jenèz 2.21-23, nou wè Adan te santi l pou kont li lè l te fin bay bèt yo non. Ebyen, Bondye te fè moun pa l la mete bò kote l. Se sa ki fè apot Pòl pral konseye konjwen yo rete ansanm sof nan moman pou yo priye (1 Korent 7.4-5). Gen gason depi li bay fanm nan byen materyèl, li panse sa sifi. Non, sèks se yon medikaman, depi yon konjwen pa ka jwenn sa li bezwen li pral pran l yon lòt kote.

Medam ak mesye kretyen yo, jere fwaye nou malgre tout pwoblèm. 

💢💢💢💢💢💢💢💢

Li repons de lòt lektè sou menm kesyon an👇

Myriam ATG37

Nelcia ATG23

💢💢💢💢💢💢💢💢

Sherly G115 

Lektè nan EBP

#61| Kisa ki ka lakoz yon maryaj kraze (2)

Selon mwen menm, gen 3 rezon ki ka koz yon maryaj kraze:

1. Si youn nan patnè  yo pa fidèl jan Bib la di sa nan Matye 19:9. Fidelite se angajman yon moun pran pou fè oubyen respekte yon bagay. Alòs, si youn nan patnè yo pa respekte angajman yo te pran pou renmen, sipòte, respekte... maryaj la ap kraze.

2. Egoyis bò kote youn ou tou 2 patnè yo ki vin rann yo entoleran.  Egoyis se wè tèt ou sèlman san sonje lòt moun k ap viv bò kote ou. Santiman sa desann valè konjwen ou epi meprize efò l ap fè. 

3. Paran youn ou tou 2 patnè yo ki konn mele nan ti bouch pa gou yo genyen nan fwaye a akoz yo pa dakò pitit yo soufri. 

Yon koup ki pran konsyans de 3 koz sa yo ka evite fwaye yo kraze. 

------------

Li repons Myriam ATG37 sou menm kesyon an Repons Myriam

-------------

Nelcia ATG23 

Etid Biblik Pèsonèl (EBP)