#65| Refleksyon sou reyenkanasyon

 

Gen kat gran pwen tout moun ki kwè nan enkanasyon (Quid la réincarnation ?) ta dwe reflechi sou li. 

1. An nou ta dakò tout moun k ap viv aktyèlman reyenkane, ki wòl fè pitit jwe nan sa? Yon fanm te ovile, li ansent epi aprè 9 mwa, li pouse yon timoun ki pase tout laj nesesè pou l vin gen nanm. Poukisa si l te reyenkane, li pa t tou pale depi li sot nan vant? Poukisa zanfans, adolesans, jenès ak vyeyès egziste? Lespri ki reyenkane retounen pase tout etap sa yo nan chak kò li antre?

2. Ki enpòtans lamedsin nan tout rechechèch li yo sitou nan branch gwosès ak ADN? Chak moun gen yon anprent, antou ki bay 8 milya nan monn lan aktyèlman. Lespri ki reyenkane a se youn epi chak moun ki reyenkane se yon lòt? Sa ta vin fè gen 2 fwa 8 milya moun oswa 2, 3 ak 4 milya reyenkane?

3. Ant kò, nanm ak lespri ki se twa pati ki fòme yon èt, kisa ki reyenkane a menm? Vin gen yon katriyèm pati nan lòm? Ki wòl li menm? 

4. Puiske lòm gen memwa, li t ap viv sou tè a depi jou l t ap viv la, poukisa li pa ka sonje anyen nan sa li te fè nan kò li te ye a? 

Mwen ta renmen resevwa plis limyè nan kòmantè yo sou kesyònman sa yo de tout moun ki kwè nan reyenkanasyon. 

Jérôme Dorsonne Emerson

Foto: https://www.espritsciencemetaphysiques.com/reincarnation-vie-passee.html

#64| Lekti Bib chak jou: temwayaj

"Ki pi gwo bagay ou aprann depi lè w ap li Bib la chak jou e ki ta dwe ankouraje tout kretyen fè sa?" se kesyon nou te poze lektè nan 10 sou 10 yo nan seri opinyon n ap pibliye sou blòg "SÈVI BONDYE AVÈK SAJÈS". Nou envite w li reyaksyon 9 lektè sou sa.

"Mwen te toujou gen difikilte pou m Li 4h Am 5h Am koz parès men depi lè m fi n rantre EBP se yon lòt pèsonaj paske l motive li epi kenbe yon relasyon ak Bondye akoz lapawòl la.Mwen konseye nen pot moun kapab rantre nan fanmi sa ou p ap regrèt paske moun k ap li pawòl Bondye ap viv nan limyè li p ap jan m domine pa fènwa. An nou pa sispann li Bib ou chak jou"._Marc ATG17

"Mwen dekouvri Bib la gen yon mistè kache, chak pasaj, menm si m te konn li l deja, li toujou nouvo. E gen anpil pasaj m po t ko janm tande pale de yo nan okenn meditasyon. Pandan m ap li Ansyen Testaman an la, li fè m valorize pi plis la Gras ke m ap jwi jodia. Paske la lwa pa t dous ditou, si se pa t la Gras mwen t ap pèdi. Mèsi pou eksperyans sa EBP."_Saniva ATG31

"Pi gwo bagay mwen aprann depi lè m ap li Bib la chak jou se  mwen vin konprann se mwayen ki pi fyab pou tande Bondye pale. Li se nouriti pou nanm ou, li pèmèt ou otomatikman konnen volonte papa w ki nan syèl la, donk sa pou fè ak sa pou pa fè. Mwen ap ankouraje lòt kretyen li l paske ou pa ka kretyen san pawòl moun ou di ki mèt ou a. Menm jan Som 1:3 di l byen, li tankou yon pyebwa yo plante bò kannal dlo: Li donnen lè sezon l rive. Fèy li p ap janm fennen. Tou sa l fè soti byen"._Givischar ATG25

"Mwen viv BonDieu. Mwen konprann, epi tande lè l pale avèk mwen. Mwen genyen pou m pataje, pou m ankouraje moun ki pat ko konprann pou ki rezon pou yo li"._Sarha G130

"Pi gwo bagay mwen aprann pandan m ap li Bib chak jou se konesans m vin genyen nan levanjil e Bondye vin pale avè m pi fasil mwen vin santi m pi konvenkan pou m pale de Bondye. Mwen ap ankouraje chak kretyen rete nan pye Bondye e li pawòl chak jou"._Christopher ATG27

"Pi gwo bagay mwen aprann depi lè m ap li Bib la se konprann pawòl BonDye a pi plis chak jou. Mwen swete chak grenn moun kontinye li Bib la paske l ap pote yon gran chanjman nan lavi lektè li yo". _Lamage G109

"Pami gwo bagay mwen aprann yo se pratike chak jou lanmou Bondye nan fon kè m pou mwen ak pou pwochen m,  espesyalman sa ki ta swete ènmi m yo. Nan Women 12:19, apot Pòl mande kretyen yo pa tire revanj"._Néricile G112

"Li ede m genyen yon relasyon avèk Bondye. Mwen ta renmen tout kretyen pa li pou li men mande Bondye ouvri je yo plis chak jou". _Nadege ATG38

"Sa mwen aprann li pèmèt mwen gen yon relasyon pi etwat avèk Bondye. Li ouvri  zye m sou anpil prensip e chak chapit nan Bib la mwen li, mwen jwenn yon vèsè ki rekonfòte nanm mwen. An n kontinye li Bib nou zanmi m yo"._Fleurgie ATG38

Atik sa ka entèrese w: 10 bagay yo pa fòse yon vrè kretyen fè

#63| Lanfè oswa renmen: poukisa w kwè nan Jezi?

Yè swa (16 avril 2023), mwen t ap suiv yon deba ant vodouvi TAR avèk pastè Junior Sanon sou paj Facebook Joassaint Gelin sou tèm "SOSYETE AK RELIJYON". Se yon bèl deba kote sajès t ap gide entèvenan yo ak menè a.

Pami plizyè sijè ki te diskite, mwen te apresye deklarasyon pastè a te fè lè TAR te vle fè konprann anpil moun ap sèvi Jezi paske yo pè ale nan lanfè. Pastè Sanon te deklare: "Mwen p ap sèvi Jezi paske m pè ale nan lanfè men paske m renmen l. Menmsi yo ta di m pa gen lanfè m ap rete kretyen". Annefè, Bondye te voye Jezi mouri pou mounite a paske l te renmen l (Jan 3.16) e Jezi te mande pou disip yo obeyi l si yo renmen l (Jan 14.15), se pa si yo pè li oswa pè ale nan lanfè. TAR gen rezon, daprè pastè Sanon, paske anpil kretyen mal prezante Jezi nan kondisyone konvèsyon pou evite dife lanfè.

Avan li te fè eklarasyon sa a, pastè Sanon te bay vodouvi TAR rezon sou jan li konprann Levanjil paske  monn evanjelik la ak vodou a soudevlope menm jan avèk Ayiti. Anpil kwayan pa byen resevwa li vin fè yo mal konprann ak viv li. Se sou menm pwen sa a li te fè TAR konprann Jezi gen pou l vin chache Legliz pou l al viv pandan yon tan nan syèl la (Nòs Anyo a) epi l ap retounen sou latè kontrèman avèk TAR ki kwè kretyen yo pral pase tout etènite yo ap louwe Bondye. 

Joassaint Gelin

Sou pwen louanj sa a (adorasyon), gen anpil inyorans nan sektè evanjelik la, sitou nan milye pwotestan an. Moun yo, pou majorite, kwè se nan leve men anlè yo ka adore Bondye sèlman alòske adorasyon se yon viv, se pa jès, pou repete Pastè Sanon, san wete leve men anlè a ki se youn nan ekspresyon yo. Konsa, anpil kwayan plis fokis sou chante, danse ak leve men anlè pandan y ap viv Bondye mal. Yo pa vle li ni etidye Bib la pou konprann kòman yo dwe sèvi Bondye.

Tout kretyen ta dwe suiv deba sa a  pou tire plizyè leson:

1. Nou ka opoze sou kwayans men sa pa dwe divize nou antanke sitwayen ayisyen.

2. Nou ka fè deba san youn pa joure lòt. Itilize sajès pou defann sa w kwè.

3. Pa sèlman di ou kwè nan Jezi, ou bezwen aprann fondman kwayans ou pou w ka defann lafwa ou epi viv avèk konviksyon.

4. Menm jan anpil moun kwè Krisyanis enpòte, vodou enpòte tou. Se yon kesyon de chwa. 

Pou w ka viv deba sa a, mwen envite w klike sou lyen sa a Deba TAR avèk Sanon

∆ Atik sa a ka entèrese ou si ou te renmen sa a: Poukisa pa gen anpil disip Kris?

Jerome Dorsonne Emerson