#68| De (2) chanjman nesesè nan lekòl dominikal

Ayiti se youn nan peyi kote teknoloji pa enterese anpil enstitisyon. Soti nan Leta pase nan lekòl, legliz pa epanye. Malgre anpil kretyen ap itilize zouti teknolojik yo, lidè yo pa twò wè li nesesè pou ranplase kèk mwayen demode. Poutan, n ap remake sistèm monn lan ap fè plis envansyon itil men ki sèvi zouti pou manje tan kwayan yo. 

Lekòl dominikal ki sanble yon eleman Jezi te anseye disip yo oswa apot yo te mete nan legliz la te kreye nan lane 1780 (L'histoire de l'école dominicale). Dayè, li pa menm respekte vizyon fondatè li Robert Raikes. Kifè, si, olye li fèt pou timoun, li valab pou jèn ak granmoun, poukisa pa ka gen lòt chanjman ladan? Pami yo, kontaj aplikasyon Bib ak Chan sou telefòn.

Anreyalite, lide pou konte Bib ak Chan nan rapò lekòl la parèt biza paske fòk sekretè a ta verifye si aplikasyon yo sou li toutbon. Men, se ladan elèv yo li pasaj yo ak chante nan asanble a. S on lòt deba.

Konsa tou, èske li pa ta bon pou retire Bib ak Chan nan rapò yo puiske, akoz chète Bib, mwens manm vini avèk yo nan kilt? Detoutfason, anpil ladan yo te deja pa t renmen sa avan. 

Mete sou nesesite pou monitè benefisye kèk privilèj (Li atik la👉 Avantaj yon monitè lekòl dominikal),

Bib ak Chan yo nan rapò yo bezwen chanje. Jwèt pou tout sientandan lekòl dominikal k ap panse pou tout chanjman nesesè nan Legliz Jezikri a. 

Jérôme Dorsonne Emerson

#67| Kisa ki ka lakoz yon maryaj kraze? (4)

Premye rezon ki ka fè yon maryaj kraze se lè gen enfidelite antre patnè yo. Youn ap bay lòt manti, youn ap fè ipokrizi ak lòt lan. Lè pa egzanp chak moun ap jere ekonomi yo ki se resous ki ta dwe komen nan fonksyònman fwaye a.  

WhatsApp nou nan 4075-6250 pou enskri.

Mesye a konn nan relasyon avèk plizyè fi epi madanm nan menm pou li montre li egal avèk mari li, li oblije al pran lòt gason sou mesye a tou. Ò, pawòl Bondye a montre kòman lanmou nan fidelite dwe manifeste selon Ebre 13:4:

"Maryaj se yon bagay tout moun dwe respekte anpil. Moun ki marye yo dwe rete fidèl yonn ak lòt. Bondye gen pou jije moun k ap mennen movèz vi yo ansanm ak moun k ap fè adiltè yo". 

Dezyèm rezon an ki fè maryaj yo kraze se lè mari a konprann depi li marye yon fanm li fè kay mete l, li ba li manje li fini. Li konsidere tèt li kòm yon  wa ki ka fè sa l vle ak sa li pito pandan l ap tann madanm li obeyi li nan tout sikonstans. Soumisyon an dwe youn anvè lòt selon egzijans prensip maryaj la:

" Se pou nou yonn soumèt devan lòt pa respè pou Kris la"(Efezyen 5:21).

Néricile G112

ETID BIBLIK PÈSONÈL (EBP)

#66| Lavi yon kretyen divize nan 2 pati

 

« Nan tan lontan, nou te nan fè nwa. Men koulye a, paske n ap viv ansanm nan Senyè a, nou nan limyè. Se sa ki fè, fòk nou mennen tèt nou tankou moun k ap viv nan limyè » (Efezyen 5.8)

Selon yon lwa fizik, fè nwa ak limyè pa ka okipe menm espas la nan yon menm tan. Nou ka remake sa chak maten, lè l ap fè jou, se limyè solèy la k ap parèt tandike nan lannuit, li disparèt pou kite fè nwa vini. Anndan yon kay, depi ou limen lanp oswa anpoul, tout bagay vin klè. Flach telefòn ou an montre ou sa chak fwa ou oblije limen li pou klere wout oswa yon espas pou w ka wè.

Ebyen, lwa sa a nan domèn espirityèl la tou. Lè konsa, fènwa senbolize mal ak peche tandike limyè se kontrè a: lajistis(Pwovèb 4.18. 1 Tesalonisyen 5.5). Puiske avan, ou t ap viv nan fè nwa, lè ou batize nan Sentespri, ou resevwa limyè Kris la. Se sa ki fè lavi divize nan de (2) pati : yè ak jodi a. Yon tan pase nan peche, yon tan prezan nan fè sa ki dwat. Konsa, li fasil pou ou konnen si ou se limyè.

Gen 3 fason pou ou konnen si w ap mennen tèt ou tankou moun k ap viv nan limyè.

1.  Kalite aksyon w ap poze (Efezyen 5.9)

Pòl di:

...limyè a fè moun fè bagay ki bon, bagay ki dwat ak bagay ki vre” (Efezyen 5.9).

Se kalite aksyon w ap poze ki montre lavi w ap mennen. Menm jan ou ka rekonèt yon bon moun avèk yon mechan, se konsa ou ka rekonèt yon vrè ak yon fo kwayan.

2.      Moun w ap chache fè plezi (Efezyen 5.10)

Li ka difisil pou konnen aksyon ki bon ak move puiske Bib la pa drese yon lis egzat. Men si w ap chache fè Bondye plezi nan tout sa w ap fè, lè yon moun deranje pou sa ou fè ki dwat, w ap konnen se Bondye ou ranje.

3.  Aktivite w ap patisipe (Efezyen 5.11)

Nan 2 Pyè 2.20-22, apot Pyè ap pale de yon kwayan ki te kite vye vi nan monn lan e ki jwenn limyè nan Jezi. Konesans sa yo te pèmèt li sou wout sali a. Malerezman, puiske li pa t ko sove, zèv monn lan retounen pran pye sou li. Apot la itilize yon pwovèb ki montre vrè nati kwayan sa a : li pa t janm rejenere vre. Ebyen, li posib pou ou konnen jan w ap viv nan kalite aktivite w ap patisipe nan monn lan. 

Jérôme Dorsonne Emerson