#70| Avantaj ak dezavantaj maryaj avèk pitit ki atache avèk paran l

Sijè deba nou te lanse 18 avril la te lanse konsa: "Ki avantaj ak dezavantaj ki genyen lè ou marye avèk yon pitit (gason oswa fi) ki atache twòp avèk manman li?"

Se yon plezi pou nou kontinye pataje repons lektè nou yo ki te plis remakab. Nou espere w ap apresye epi aprann de yo. 

_________________

Avantaj ki genyen lè yon gason twò atache avèk manman l sèke l ap trete madanm li byen. Pou dezavantaj, l ap toujou bay manman l priyorite sou madanm li. 

(Régine G94)

L ap trete madanm li menm jan l trete manman l, se avantaj la . E dezanvantaj ki genyen l ap toujou  esplike manman l tout sa k ap pase lakay li, kit li bon kit li pa bon. Si manman an se yon moun ki renmen tripotay, l ap bliye si lang ak dan pa janm pa mòde. Olye pou l ta mete lapè pou de moun yo byen viv, l ap mete divizyon.

(Ocianie G112)

Pitit se kado Bondye bay, se yon benediksyon nan yon fanmi lè ou byen ankadre l edikativman, sosyalman ak espirityèlman. Avantaj la se posibilite pou l atache anpil avèk moun li marye a pou li soumèt devan li, ba l anpil tandrès ak afeksyon. Pakont, dezavantaj la se difikilte ki ka genyen pou li reponn egzijans matirite l ak sans lidèchip li nan maryaj la sitou si se gason an l ap difisil pou l obeyi totalman pawòl sa ki ekri nan Matye 19.5-6: "Se poutèt sa, gason an va kite papa l ak manman l pou l mete tèt li ansanm ak madanm li. Yo tou de va fè yon sèl kò. Konsa, yo pa de ankò, men yo fè yon sèl kò. Se poutèt sa, pèsonn moun pa gen dwa separe sa Bondye mete ansanm". (Néricile G112)

Dezavantaj lè yon fi oswa yon gason atache avèk manman l se lè youn ap pale nan kay la, lòt la ka pran pòz chèf li paske paran l la. Avantaj se si gen yon ka ijan tout moun ap dejan okouran pou pote sekou.

(Marc ATG17)

Avantaj sa genyen: Yon moun konsa l ap fasil pou l gen anpil afeksyon lakay li. Menm fason l te atache avèk manman l lan se konsa l ap atache avèk konjwen li. Li p ap janm kache konjwen li anyen si l pa t konn fè manman l sekrè. 

(Nathanaël G121)

Selon mwen menm avantaj ki genyen lè yon pitit atache avèk paran l twòp sa ka koze anpil pwoblèm nan fwaye paske tout sa yo ta genyen antre yo, yo pral bezwen esplike li. Paran sa p ap jan m dakò pitit li  genyen okenn pwoblèm. Genyen paran ki konn bay pitit li konsèy pou kraze fwaye li epi vini jwenn li, 

(Nadege ATG38)

Bon, pou mwen menm, kèlkeswa pitit li ye a kanmenm fòk li te atache avèk paran l epi pale tout ti koze yo pandan l sou kont yo  Mwen vle pale pou fanmi ki toujou reyini tout pitit pou fè edikasyon familyal yo. Koulya, puiske lè a rive pou yon pitit kite kay paran l, li dwe konnen moun li dwe atache avèk li plis la se konjwen li.

Dezavantaj la, si se pa sa mwen di anvan yo ki fèt ap gen eskandal chak jou.

(Wilson G122)

#69| Rezon ki fè limyè ou dwe briye

« …se pou limyè nou klere devan tout moun, pou lè yo wè tout byen n ap fè yo, y a fè lwanj Papa nou ki nan syèl la » (Matye 5.16).

Yo anpil moun ki kwè yo ka mennen yon lavi apa pou Bondye ankachèt. Pèsonn pa dwe jije aksyon yo, se kè yo k ap sove yo e se Bondye sèlman ki ka jije yo. Sa ki pi grav nan kwayans sa a se libète ak kouraj pou fè sa k ap fè pale Bondye mal nan plas fè sa ki byen. Yon moun ka santi li pi fyè lè l ap fè sa li vle pase lè l ap fè sa Bondye vle.

Pi bon mwayen pou ou sèten w ap klere se lè w ap fè byen. Se pa nan mete bèl rad ni di bèl pawòl oswa konn chante sèlman. Pa kite pyès okazyon pou fè sa ki dwat (Galat 6.10), konsa w ap pouse fènwa epi bay Levanjil plas pou renye.

Se yon devwa

«…se pou limyè nou klere devan tout moun ». Amwenske ou ta gen yon lòt motivasyon, ou pa ka chwazi kwè nan Kris ki se limyè pou ou kontante ou viv nan fènwa. Se tankou limyè a pa efikas pou klere ou, alewè pou reflete nan ou. Puiske limyè fèt pou klere, se devwa ou pou klere tout kote ou ye.

Pou yo wè bon zèv ou yo

Pèsonn pa bezwen konnen don ou fè yon moun ki nan nesesite (Matye 6.2-4). Sepandan, se pa de byen sa a Jezi t ap pale nan diskou li a. Se tout byen ki nan volonte Bondye (bon zèv). Se sa ki fè, di zanmi ou bonjou sèlman pa yon bon zèv nan je Bondye (Matye 5.46-48). Pa chache fè byen pou fè wè, se pa yon bon zèv. Se tout sa ou fè ki pa asire ou anyen an retou.

Pou Bondye jwenn lwanj

Ou pa fè byen pou byen pa ou ni pou yo felisite ou, remèsye ou ak pale byen de ou. Se sa ki konn lakoz dekourajman, ou pa wè rezon an, ou refize. Sa se peche (Jak 4.17). Pa chache enterè ni yon rekonpans anretou, fè sa paske se yon devwa. Obeyi Bondye se yon devwa, ou bezwen fè l paske ou fè l konfyans. Se konsa l ap jwenn lwanj nan men moun ki benefisye a.

Jérôme Dorsonne Emerson