#72| Kisa ki ka anpeche yon kwayan batize? (1)

 

Yon moun ki gen lafwa se yon moun ki kwè nan yon evènman li wè ou pa. Li konnen Bondye egziste. Sa ki ka anpeche li resevwa sakreman batèm nan se kapab premyeman si li pa ka obeyi prensip ki etabli nan legliz li pèsevere. 

Dezyèman, li ka yon moun k ap viv nan plasaj. L ap mache legliz men li ka manm nan lòt sektè. Li vin pa santi li ka temwen Jezikri akoz de konpòtman li genyen nan anviwònman imedya kote l ap viv la. 

Konsa tou, li ka pa santi li gen konesans ase sou pawòl Bondye ki se bousòl yon kretyen. Jan apot la di nan lèt li te ekri kretyen Lavil Efèz yo:"Nan tan lontan, nou te nan fènwa. Men koulye a, paske n ap viv ansanm nan Seyè a, nou nan limyè. Se sa ki fè, fòk nou mennen tèt nou tankou moun k ap viv nan limyè a. Paske, limyè a fè moun fè bagay ki bon, bagay ki dwat ak bagay ki vre"(Efèz 5: 8-9).

Néricile G112

1. Manke konpreyansyon: Ou sipoze konprann sa wap fè a. Gen moun paske li poko konn sa batèm nan ye tout bon, li gendwa pa vle batize.

2  Anpèchman familyal: sa se youn nan koz k ap domine anpil kwayan jodi a akoz yo sou lòd paran yo. Lè sa rive, gen dirijan ki konn di: Bib la di nou dwe obeyi paran nou yo se vre men lè se fwa ou w ap defann, ou pa oblije obeyi paske paran k ap anpeche ou batize a, ènmi an ka sèvi avèk li pou anpeche ou sove.

Dickenson G123

Foto: CHRÉTIEN lifestyle

#71| Lanfè ak paradi sou tè a?

 

Pou anpil moun, lanfè ak paradi sou tè a. Se la w ap peye mal ou fè, la w ap jwenn rekonpans pou byen ou fè. 

Youn nan lojik pou kontrekare egzistans lanfè se renmen Bondye (1 Jan 4.8). Annefè, yon Bondye ki renmen pa ka prepare yon dife etènèl pou pitit li. Se t ap yon Dye kriminèl. Men, Bondye pa prepare dife pou pitit li, paske pa gen pitit Bondye ki pral nan lanfè. Sa ki te ka lakoz sa a, Jezi te vin mouri pou li. Konsa, granmesi konfyans nenpòt kreyati mete nan Jezi, li p ap peri (Jan 3.16). 

Se paske Bondye renmen nou ki fè nonsèlman, li te voye Jezi mouri pou nou, li kontinye pran pasyans pou nou kwè nan li (2 Pyè 3.9). Volonte se pou tout moun epanye dife lanfè (1 Timote 2.4).

Kwayans lanfè ak paradi sou tè a se yon eskiz pou rejte Kris epi mennen yon vi nan inyorans konsekans peche. Ò, Jezi te vini pou nou te ka kite lavi k ap lakòz kondanasyon nou (Travay 17.30). 

Si lanfè ak paradi sou tè, poukisa yo rayi, pèsekite e menm tiye moun k ap fè byen? Yo ta dwe viv anpè. Poukisa mechan an ap byen viv epi malere yo ap pase mizè jis yo mouri san jwenn jistis?  

Si lanfè sou tè, poukisa tout monn lan abandone Ayiti nan soufrans li alòske li pa deklare lagè kont pyès peyi? Èske ka gen lanfè ak paradi nan yon sèl peyi oswa se nan chak peyi gen paradi oswa lanfè? 

Kwayans pa envante verite. Li ka fè yon verite sanble manti. Konsa tou, li ka fè yon manti pase pou verite men yon jou tout moun gen pou dekouvri verite a. Paske, nan jou jijman an, tout bagay pral klè. Se sa ki fè kretyen yo kwè nan pwomès Jezi yo. Se pa bon moun ki ale nan paradi, se sila ki repanti. Konsa, Jezi te pwomèt yon kriminèl lavi aprè lanmò lè li te di l: 

Sa m ap di ou la, se vre wi: Jodi a ou pral avè m nan paradi (Lik 23.43).

Finisman istwa Laza ak nonm rich la ka aprann nou anpil sou lanfè ak paradi:

"Nonm rich la di li: Tanpri, Abraram papa, voye Laza kay papa mwen.

Mwen gen senk frè. Mwen ta vle li al di yo jan bagay la ye pou yo pa vin isit nan touman sa a.

Abraram reponn li: Yo gen Moyiz ak pwofèt yo pou avèti yo, se pou yo koute yo.

Li di li: Non, papa Abraram, yo p ap koute. Men, si yonn nan mò yo al jwenn yo, y'a chanje lavi yo.

Lè sa a, Abraram di li: Si yo pa koute Moyiz ak pwofèt yo, yo p ap kite pesonn lòt fè yo wè verite a. Li ta mèt yon mò ki ta leve vivan ankò, yo p ap koute li.

(Lik 16.27-31)

Jerome Dorsonne Emerson