Renmen Bondye te gen pou lèzòm te fè li voye Jezi sèl Pitit li a mouri pou yo te ka sove (Jan 3.16). Jiskela, se renmen sa ak sakrifis pitit li a ki bay sali a, pa gen moun ki te ka sove tèt li. Si se te sa, sakrifis la pa t ap enpòtan. Men chak moun ki vle sove gen yon sèl bagay pou fè: kwè nan Jezikri. Se sa plizyè tèks anseye (Efezyen 2.8-9, Women 3.23-24, 6.23, Jan 14.6, Travay 4.12).
Alò, kòman "pèseverans" ka kondisyon sali? Èske ka gen 2 kondisyon pou sove: youn depann de Jezi, lòt la depann de lòm? Nan ka sa, ki sali ki t ap pi bon oswa pi asire? Poutan, kwayans la soti nan deklarasyon sovè a menm:
Men, moun ki va kenbe fèm jouk sa kaba, se li ki va delivre"(Matye 24.13).
Jezi te fè deklarasyon sa a sou "Mont des Oliviers" nan yon kontèks pwofetik. Li t ap pale sou gran tribilasyon an ak retou li. Kidonk, daprè siy li bay yo, tan sa poko rive e li pa konsène Legliz. Pran tèks sa a pou kondisyone sali se inyore valè lakwa ak lafwa. E pou finalite, se rann tout Bib la kontradiktwa paske pèsonn pa ka fè anyen pou sove.
Pakont, yon moun ki sove (te deside aksepte Jezi pou sovè ak mèt li) ap pèsevere. Paske, yon moun pèsevere nan yon desizyon, yon chwa li te fè. Kifè, san desizyon, pa ka gen pèseverans. Egzanp, disip ki te kwè nan Kris yo nan jou Pannkot la (Travay 2.41) te pèsevere nan ansèyman apot yo (v42). Yo pa t pèsevere pou yo te kwè, batize epi sove. Yo te sove.
Nan Travay 2.47, Bib la di :
"Chak jou Bondye t ap mete lòt moun li t ap delivre (sove) yo nan gwoup la".
Se pa t moun ki t ap pèsevere li te ajoute, se sila yo ki te sove. Puiske sove se yon gras, Jezi pa bezwen pèseverans ou pou l fè sa. Siwi, levanjil t ap plis pase yon anak. Premye pechè ki pa t ap sove se kriminèl sou kwa a ki pa t menm gen tan manm yon legliz, alewè pou li ta gen tan bay dim ak ofrann.
Pèseverans pou sove fè wè lide efò, kenbe, reziste, pèsiste alòske tout fòs kretyen an pou kenbe, reziste ak pèsiste soti nan Kris la:
Pou fini, chache fòs nou nan lavi n ap mennen ansanm ak Seyè a ak nan gwo pouvwa li(Efezyen 6.10).
Si ou te ka jwenn fòs nan lachè, ou te ka jwenn limyè nan monn lan, ki wòl Jezi t ap jwe nan pwosesis sali ou? Se Bondye te ki ba w pouvwa pou sèvi l, se pa ou menm ki degaje w pou fè sa. Lavi ou se yon konba men se Bondye ki ba w zam yo:
Pran mete sou nou tout kalite zam Bondye ban nou pou nou ka kenbe tèt anba riz Satan (Efezyen 6.10-18).
Kapasite pou reziste soti nan Bondye granmesi tout zam ki site yo. Avan ou te konvèti, se nan peche ou t ap viv. Ou pa t nan kondisyon pou sove, ou pa t ap chache fas Bondye.
Tout moun fè peche; yo tout vire do bay Bondye ki gen pouvwa a. Men Bondye ki renmen yo, li fè yo gras. Li fè sa pou yo gratis, granmesi Jezikri ki vin delivre yo (Women 3.23-24).
Kisa yon kretyen ka fè pou li sove ki pa soti nan Kris (Efezyen 2.10)? Si li pa soti nan Kris, kòman Kris fè sove li? Verite sou kondisyon sali a se "mete konfyans nan Jezi" (Jan 5.24). Tout kwayan ki sove yo ap pèsevere nan konfyans sa jiskaske yo mouri oswa Jezi retounen.
Jerome Dorsonne Emerson
