#78| Pa gen pwofèt ankò (4)

 

Daprè tout sa nou te aprann nan sijè avan yo ( ), nou ka di "wi, toujou gen pwofèt". Men kèk rezon ki montre sa kontrèman avèk agiman pou kontrekare li. 

1. Bib la se dènye revelasyon volonte Bondye pou lòm

Bib la se revelasyon volonte Bondye pou lòm konnen men gen anpil tèks ki toujou rete mistè. Se pa t yon vèsè Agabis te entèprete pou predi grangou, se Sentespri ki te di revele sa. Konsa, jodi a, Sentespri ka toujou revele sa ki pral pase atravè yon pwofèt.

2. Jezi se dènye pwofèt la

Wi, parapò avèk plizyè pwofèt ki t ap anonse vini Jezi, Jezi se dènye a puiske se li k ap pale nan non Bondye (Ebre 1.1-2). E se nan menm optik sa a li te voye Sentespri a pou chwazi moun k ap kontinye fè travay sa a. Konsa, menm jan Jézi te vin akonpli misyon li epi l te voye disip yo kontinye (Matye 28.19-20), Sentespri a toujou akonpaye kretyen pwofèt pou di oswa revele oswa fè konprann sa ki gen pou rive.

3. Tout kretyen ka pwofetize

Wi, men sa pa vle di tout kretyen se pwofèt. Koute sa Pòl te di:

"Men, tout moun pa apòt, tout moun pa pwofèt, tout moun pa dirèktè, tout moun pa gen don pou fè mirak"(1 Korent 12.29).

4. Pwofèt yo te sispann anonse aprè Jan Batis

Jan Batis te dènye pwofèt ki te anonse Jezi. E se li menm ki te batize l. Pa bezwen gen lòt moun pou anonse li ankò paske l vini, li mouri, li resisite e li monte nan syèl. Koulye a, lòt anons la se pou retou li. Se sou retou sa nou bezwen siveye fo pwofèt (Matye 24.24-25).

Ou gen yon kesyon? Ekri l nan kòmantè a.

Jerome Dorsonne Emerson 

#77| Pa gen pwofèt ankò? (3)

 

Definisyon yon pwofèt valab pou de testaman yo nan yon sèl sans: yon moun Bondye voye pou pale nan non li. Men nan Nouvo Testaman an, li pa sèlman anonse sa ki pral rive, li edifye, ankouraje ak konsole (1 Korent 14.1-2). San dout, se paske travay sa  enpòtan ki fè Pòl te di: 

"Konsa, frè m yo, anvan tout bagay, se pou nou chache don pou nou ka bay mesaj ki soti nan Bondye. Pa anpeche moun pale langaj"(1 Korentyen 14.39).

Li klè, pwofèt yo egziste nan Ansyen ak Nouvo Testaman an. Nan sa ki Nouvo yo, nou ka site Agabis: 

"Lè sa a, kèk pwofèt soti Jerizalèm rive Antyòch.Youn ladan yo, ki te rele Agabis, leve epi avèk pouvwa Sentespri, li fè konnen ta pral gen yon gwo grangou sou tout latè. (Grangou sa a te rive vre sou reny wa Klòd.) (Travay 11.27-28). 

Gen senk prèv pou jistifye pwofèt yo daprè tèks sa a: 

1. Kèk pwofèt: sa vle di te gen plizyè pwofèt nan lavil Antyòch men Lik pale sèlman sou Agabis. 

2. Jezi te gentan monte nan syèl: aprè Jezi te gen pwofèt nan legliz la. Raple nou Antyòch kote yo te rele disip yo kretyen pou premye fwa (11.26).

3. Avèk pouvwa Sentespri: se pa t Agabis ki te deside pale, se Sentespri a pou montre verite 2 Pyè 1.21 an.

4. Li fè konnen ta pral gen yon gwo grangou sou tout latè: pwofesi. Li pa t ka wè sa ni li pa t yon ekonomis tankou Etzer Emile pou l te predi grangou sou baz done ekonomik.

5. Grangou sa a te rive vre sou reny wa Klod: plis detay sou grangou sa a: Plis detay sou grangou sou Klod

Si pou moun ki kwè tout kretyen ka pwofetize paske yo gen Sentespri (1 Korent 14.5), Pòl te montre plizyè kote se yon don endividyèl li ye. Sentespri chwazi pwofèt menm jan Bondye te konn chwazi nan Ansyen Testaman an.

1. 1 Korent 12.10: 

Lespri a bay yon moun don pou fè mirak, li bay yon lòt don pou l bay mesaj ki soti nan Bondye.

2. Women 12.6: 

Bondye pa bay tout moun menm don. Men, nou fèt pou nou sèvi ak kado a dapre favè Bondye fè nou an. Si yon moun resevwa don pou l anonse mesaj ki sòti nan Bondye, se pou l fè sa dapre lafwa li genyen an.

3. Efezyen 4.11:

Se li menm ki fè lèzòm kado divès pouvwa. Li bay kèk ladan yo pouvwa pou sèvi apòt, li bay lòt ladan yo pouvwa pou sèvi pwofèt, li bay lòt ankò pouvwa pou anonse bon nouvèl la, li bay dòt ankò pouvwa pou sèvi tankou pastè ak direktè. 

4. 1 Korent 12.29: 

Men, tout moun pa apòt, tout moun pa pwofèt, tout moun pa direktè, tout moun pa gen don pou fè mirak.

Katriyèm pati

Jerome Dorsonne Emerson

#76| Pa gen pwofèt ankò? (2)

 

Kilès yon pwofèt ye?

Se yon sèvitè oswa sèvant Bondye enspire pou di sa ki gen pou rive. Li se yon anvwaye, yon medyatè, yon anonsè. Nan tradiksyon kreyòl la, nou jwenn ekspresyon sila pou pale de travay pwofèt la: moun k ap bay mesaj ki soti nan Bondye. 

Nan prediksyon li yo, li ka: 

1. Fè lèzòm konnen sa Bondye vle 

• Mwen te pale ak pèp mwen an, mwen te di yo se pou yo rann jistis san patipri. Se pou yo aji ak bon kè yonn ak lòt, se pou yo gen pitye yonn pou lòt. (Zakari 7.8-10)

2. Fè konnen yon bagay ki te kache 

Wa a di Danyèl konsa: -Se vre wi! Bondye ou la gen plis pouvwa pase tout lòt bondye yo. Se li ki chèf tout wa, se li menm ki fè moun konnen sekrè ki kache, depi ou te ka fè m konprann sans rèv mwen te fè a (Danyèl 2.47)

3. Fè konnen yon evènman k ap rive 

Enben! Se Seyè a menm ki pral ban nou yon siy. Men li: Jenn tifi ki ansent lan pral fè yon pitit gason, l a rele l Emannwèl (ki vle di: Bondye avèk nou). (Ezayi 7.14)

4. Fè konnen jijman Bondye 

Men sa mwen menm Seyè a, mwen di: M ap fè yon moun nan fanmi ou menm soti pou ba ou traka. M ap wete madanm ou yo nan men ou, m ap bay yon moun nan fanmi ou yo. L a kouche avèk yo devan tout moun ( 2 Samyèl 12.1-14).

5. Edifye, ankouraje e konsole 

Okontrè, moun k ap bay mesaj ki soti nan Bondye, se ak moun y ap pale pou fè yo grandi nan konfyans yo nan Bondye, pou ankouraje yo, pou konsole yo (1 Korent 14.3).

Yon pwofèt pa di sa li vle

Bib la klè sou sa:

"pwofèt yo pa t janm bay mesaj paske yo menm yo te vle. Okontrè, se Sentespri ki te pouse yo lè yo t ap bay mesaj ki soti nan Bondye"(2 Pyè 1.21).

Li fasil pou dekouvri yon fo pwofèt: se sila ki deside di sa ki pral rive san Bondye pa t revele li anyen (Jeremi 14.14). Se sa ki fè li p ap rive (Detewonòm 18.20-22).

Li atik sa pou konnen 10 siy sou yon fo pwofèt : Kòman pou rekonèt fo pwofèt yo

Se Sentespri ki bay yon kwayan don pwofèt, li pa t chwazi vin sa byenke li ka mande sa (1 Korent 14.5,39). Men nan tou de ka yo, se Sentespri a ki pouse yo pale oswa ekri. 

Twazyèm pati

Jérôme Dorsonne Emerson

#75| Pa gen pwofèt ankò? (1)

Nan sektè pwotestan an, don pwofèt se youn pami deba ki pa janm fini. Gen yon gwoup kretyen ki kwè pa gen don sa a ankò alòske yon lòt kwè genyen. Tou de gwoup sa yo ta chita sou Bib la pou agimante. 

Nan premye blòg sa a, n ap pale sou kèk agiman sila ki kwè yo bay pou demontre pa gen pwofèt. 

1. Bib la se dènye revelasyon volonte Bondye pou lòm

Daprè agiman sa a, pa gen pwofèt ki ta gen pou revele sa Bondye vle antanke pòtpawòl li. Legliz la fonde, Bib la konplè, ni apot ak pwofèt pa enpòtan ankò puiske tout kretyen ka li Bib la pou konnen sa Bondye vle ak sa ki gen pou rive. 

2. Jezi se dènye pwofèt la

Deklarasyon sa a soti nan Ebre 1.1-2:

Nan tan lontan, Bondye te mete pawòl nan bouch pwofèt yo nan divès okazyon ak divès jan pou l te ka pale ak zansèt nou yo. Men, nan dènye jou sa yo, se pitit li a menm Bondye te voye pale ak nou nan non li. Se ak Pitit sa a Bondye te kreye tout bagay. Se li menm tou Bondye chwazi pou eritye tout bagay lè sa va fini nèt.

3. Tout kretyen ka pwofetize

Daprè kwayans sa a, tout sa ki te gen pou di ak rive yo deja ekri. Nenpòt predikatè ka pwofetize paske se sa ki nan Bib la l ap reanonse.

4. Pwofèt yo te sispann anonse aprè Jan Batis 

Lide sa a soti nan Matye 11.13:"

Anvan Jan Batis te rive, tout pwofèt yo ansanm ak lalwa Moyiz la te pale sou Peyi Bondye a." 

Kifè, pa ta gen pwofèt pou anonse anyen ankò aprè Jezi. 

Pandan w ap kontinye li plizyè blòg sou sijè sa a, nou ta renmen ou konnen objektif final la se bay Bib la tout otorite li nan lavi tout moun ki kwè nan Kris, e non yon gwoup. 

Dezyèm pati

Jerome Dorsonne Emerson