Lè ou byen edike, se chwa ou fè ki montre sa. Se jan w ap viv ki fè wè sa. Bon jan ledikasyon pa yon pretansyon ki mete w nan yon nivo pou yo respekte ou si ou menm ou pa respekte tèt ou.
Chaje kwayan ki kwè pèsonn pa ka enfliyanse yo, se byen puiske kwayans ou ka enfliyanse konpòtman ou men, èske se nan tout ka?
Men sa nou li nan Bib la:
Piga nou twonpe tèt nou: move zanmi gate bon levasyon (1 Korent 15.33).
Kwè yon zanmi pa ka gate bon levasyon ou se youn, konnen mwayen li ka fè sa se de. Konsa, men 5 konsèy ki ka ede ou konprann posiblite pou sibi enfliyans negatif.
1. Konprann avan ou kwè
Ou lib pou kwè sa w vle men pa janm bliye sa w kwè pa fòseman verite. Nayvte fè ou opine ak di sa w santi fasil. Lè konsa, li fasil pou pran pozisyon. Li enpòtan pou w konprann avan w kwè sitou lè se lòm k ap pale. Sinon, w ap twonpe fasil.
2. Reflechi avan ou aji
Aksyon w, bon ou move, se chwa w. Ou ta mèt regrèt aprè, se ou ki responsab. Pou rezon sa, panse sou zak ou pral poze se yon devwa pou evite moun kondui w nan move chemen. Refleksyon se byen prive ou men aksyon w se byen piblik.
3. Pa minimize enjistis
Enjistis rete enjistis kèlkeswa gwosè li oswa otè li. Avan ou kite yon vwa, yon lidè, yon panse, yon prensip, yon doktrin fè ou aji, chache konnen si moun ki konsène a merite sa. Pèsonn pa dwe sibi konsekans chwa li pa fè e li dwe jwenn tout pwoteksyon posib. Se vre, li difisil nan monn sa a pou jistis renye, men se pa ou menm ki pou fè enjistis.
4. Evite suiv tandans foul la
Monn lan gen 8 milya moun alèkile, se ou menm ki ou sèl. Sa vle di, pa gen yon lòt tankou w. Alò, imajine yon tandans ki jwenn apwobasyon anpil moun ki ta dwe reflechi avan men ki pa, akoz youn pa gentan konsilte lòt. Devwa w se analize pou wè bon ak move kote. Konsa, ou ka dekouvri danje. Foul la se yon pouvwa men pouvwa a gen sous ou ka pa janm konnen e li pa anpil.
5. Pa pè fawouch pou prensip ou valorize
Anpil kwayan panse yo ka kretyen legliz epi yo viv tankou enkwayan deyò, nan lekòl, nan lari oswa menm lakay yo. Tout sa koz yo pa fyè de kwayans yo. Yo pè fawouch pou sa yo te di "Amèn" pa fè yo "blèm". Ebyen, si Levanjil pa enfliyanse ou ase pou enfliyanse antouraj ou, se antouraj ou k ap enfliyanse ou.
Boutofen, tout moun ak tout bagay ki domine ou, fè ou pran desizyon pou aji oswa adopte yon konpòtman se enfliyans. Se sa ki bay adjektif "enfliyansè" ki se yon moun k ap enfliyanse yon piblik granmesi ekspozisyon medyatik li ki ka pawòl, imaj, mizik, ansèyman, elatriye.
Antanke limyè, yon kretyen egziste pou l briye, jan Jezi te di disip li yo:
"...se pou limyè nou klere devan tout moun, pou lè yo wè tout byen n ap fè yo, y a fè lwanj Papa nou ki nan syèl la"(Matye 5.16).
Jérôme Dorsonne Emerson
Foto:marionfayolle
