#89| Nan kisa ou vle Bondye sove ou egzakteman ?

 

Pa gen dout nan sa, Bondye vle sove tout moun. Jezi ak disip li yo pale sou sa anseyman ak deklarasyon yo te fè nan ministè yo.

Paske, Bondye sitèlman renmen lèzòm li bay sèl Pitit li a pou yo. Tout moun ki va mete konfyans yo nan li p ap pedi lavi yo. Okontrè y a gen lavi ki p ap janm fini an (Jan 3.16).

Se bagay konsa ki byen, ki fè Bondye, Sovè nou an, plezi. Li ta renmen wè tout moun sove, li ta renmen wè tout moun rive konn verite a (1 Timote 2.3-4).

Kòman yon Bondye ki vle sove ou e ki montre sa nan renmen li gen pou ou pa ka sove ou ? Èske li ka sove ou san ou pa vle ? Oubyen, èske ou poko soti nan danje ou bezwen li sove ou a ? An nou wè repons pou twa kesyon sa yo :

1.      Si Bondye pa ka sove ou, se tankou danje ou ye a pi fò pase li. Nan ka sa a, Bondye pa t ap puisan. Jezi li te voye pou sove ou pa t ap ka resisite pou li te ka gen viktwa sou lanmò. Puiske ou kwè Bondye kapab, li posib pou se ou ki pa dakò sali li a.

2.      Non, Bondye pa ka sove ou san desizyon ou paske ou bezwen kwè nan Jezi, moun li te voye vin sove ou (Jan 3.16). Sove se yon nesesite. Pou sa, ou dwe konvenk ou se yon pechè pou Jezi ka yon sovè pou ou.

3.      Repons twazyèm kesyon an voye nou nan kesyon prensipal la: Nan kisa ou vle Bondye sove ou egzakteman ?

Avan tou, li enpòtan pou ou chache konnen nan kisa Bondye vle sove ou. Bib la di :

« Moun Bondye voye nan lachè a vin chache sa ki te pèdi pou l delivre [sove] yo «  (Lik 19.10).

« Sou pwen sa a, Bondye moutre nou jan li renmen nou anpil; paske nou t ap fè peche toujou lè Kris la mouri pou nou » (Women 5.8).

Bondye pa t voye Jezi pou sove ou nan tout danje ak tout sa ki ka reprezante li pou ou. Dayè, se peche ki te fè Bondye te mete Adan ak Èv deyò nan jaden an. Se pou sa Jezi te vin mouri. Nan epòk disip yo te kòmanse akonpli misyon yo, men sa nou aprann:

Yo t ap fè lwanj Bondye. Tout moun te renmen yo. Chak jou Bondye t ap mete lòt moun li t ap delivre yo nan gwoup la (Travay 2.47).

Se pa t moun ki te nan pwoblèm Jezi t ap delivre, se te sila ki te kwè nan li (Mak 16.16). Konsa, se tout moun ki kwè nan Jezi k ap sove. Sove sa a pa anpeche plizyè danje moun bezwen sove anba yo, tankou povrete, maladi, mizè, doulè ak tout sa ki ka lakoz lanmò.

Jezi te mouri pou li te ka sove nou. Apot li te voye preche yo te sibi pèsekisyon jis yo te mouri. Youn ladan yo te di :

Si espwa nou gen nan Kris la se sèlman pou lavi sa a li bon, nou se moun ki pi malere ki ta gen sou latè (1 Korent 15.19).

Vrèmanvre, lè nou sove, nou gen tout sa nou bezwen nan Kris : lavi etènèl. Se sa ki ban nou asirans n ap resisite epi kontinye viv avèk Jezi nan wayòm li. Kanta pou pwoblèm sou tè sa a, maladi, pèsekisyon  ak tantasyon, y ap toujou rete konba. Nou jis bezwen pran zam Bondye ban nou yo pou nou lite kont yo pandan n ap tann Kris retounen vin chache nou. Amèn !

 Jérome Dorsonne Emerson

 

#88| 10 pi gran rezon ki ka fè yon moun kite legliz

Teyoloji ak lojik fè nou konprann gen de kalite legliz: legliz inivèsèl ki regwoupe tout kretyen nan monn lan. Se sa nou ta rele Wayòm Bondye a, moun Bondye yo, moun sove yo. Tandike, legliz lokal se ka yon asanble ki reyini nan yon kay (edifis) e ki ta nan yon misyon oswa zèv, propriyete yon lidè. Se sa ki pral fè anpil legliz pote non fondatè yo : legliz entèl, kay pastè entèl. An reyalite, se pa yon ansèyman biblik men li fè gwo enpak sou konsepsyon fidèl yo de vrè imaj legliz la.

Plizyè fwa, nan ekri li yo, apot Pòl pale de legliz Bondye a :

« …pou nou tout ki nan legliz Bondye a lavil Korent. Bondye te rele nou pou viv apa pou li, nou tout ki pou Bondye nan Jezikri, ansanm ak tout lòt moun toupatou k ap rele non Jezikri, Senyè nou an. Paske Jezikri se Senyè yo menm jan li Senyè nou tou » (1 Korent 1.2).

Rezilta apèl Bondye

Mwen pa ekri atik sa a pou montre kretyen ka kite legliz Kris la (asanble li a : Matye 16.18) puiske moun Jezi sove yo fè yon sèl pou lavi avèk li, kèlkeswa kote y ap viv sou latè. Lavi apa y ap mennen pa favorize yo bay eskiz pou yo ta kite paske se pa fidelite yo nan yon legliz lokal ki fè yo kretyen, se Kris k ap viv nan yo ki fè sa. Kidonk, rezon nou pral site yo konsène nouvo [konvèti] ak ansyen manm legliz lokal ki bezwen plis atansyon lidè yo. Konsa, chak lidè ki fin li yo va panse pou anpeche yo pèdi. Konsa tou, chak manm legliz ki ta gen lide kite asanble li va reflechi sou vrè motivasyon li ak enposiblite pou jwenn yon legliz san pwoblèm.

10 pi gwo rezon ki ka fè yon moun kite yon legliz lokal

        1.      PÈSEKISYON

Men, yo pa kite l pouse rasin nan kè yo. Yo pa kenbe l pou lontan. Lè yo tonbe anba tèt chaje ak pèsekisyon akòz pawòl Bondye a, lamenm yo jwenn okazyon pou yo tonbe nan peche (Matye 13.21).

Pèsekisyon se tout enjistis yon moun ap sibi. Kifè, li ka vin sou plizyè fòm ak sous. Lè yon moun deside suiv Kris, li renonse kont tout sa ki te ka anpeche li konvèti (Lik 14.33). Malerezman, se pa tout nouvo kwayan ki ka reziste. Desizyon ki pi fasil la se kite.

        2.      PLEZI NAN MONN LAN

Nan tan lontan, nou te nan fènwa. Men koulye a, paske n ap viv ansanm nan Seyè a, nou nan limyè. Se sa ki fè, fòk nou mennen tèt nou tankou moun k ap viv nan limyè a (Efezyen 5.8).

Fè nwa karakterize tout sa ki kontrè moral kretyen yo. Antanke limyè, yon kretyen pa ka viv menm jan lè li te nan fè nwa. Li dwe briye. Ebyen, gen anpil moun, sitou jèn, ki oblije kite legliz paske ansèyman y ap ba yo kontrè avèk dezi yo genyen. Se youn nan rezon ki fè yo bay tout kalite eskiz pou pa li Bib la, patisipe nan etid, gen yon relasyon pèsonèl avèk Bondye, pou n site sa yo sèlman. Anreyalite, plezi monn lan toujou gen pye sou kou yo. Chite vin pi fasil pou yo pase yo pèsevere.

        3.      ANVI GEN LAJAN / LANMOU POU LAJAN

Gen lòt ankò ki resevwa pawòl la tankou grenn ki tonbe nan mitan pikan. Yo tande pawòl la, men traka lavi ak anvi gen lajan, tou sa toufe pawòl la, kifè yo pa ka bay anyen menm (Matye 13.22).

Premye disip yo pa t rich, Jezi nonplis pa t leve nan yon fanmi rich. Sa pa t anpeche li te akonpli misyon Papa li. Disip yo ki te fin jwenn menm misyon an pa t kite anyen nan epòk yo a ralanti yo. Se pa yon rezon pou kretyen pa travay oswa yon agiman pou jistifye yon kretyen dwe pòv. Lavi yon pitit Bondye nan monn sa a pa fasil (2 Timote 3.12) men l ap jwenn fòs pou l viv (Filipyen 4.13). Sousi yo ak richès p ap ka retire yo nan plan delivrans la (Women 8.38).

Bib la di : 

«…renmen lajan fè moun fè tout kalite bagay ki mal. Gen moun ki sitèlman anvi gen lajan, yo pèdi chemen lafwa a nèt: se pa de ti soufrans ki tonbe sou yo (1 Timote 6.10).

        4.      POVRETE

Pito nou chache bay bagay peyi Wa ki nan syèl la premye plas nan lavi nou, chache viv jan Bondye vle l' la anvan. Lè sa a, Bondye va ban nou tout lòt bagay sa yo tou (Matye 6.33).

Povrete se yon eta ekonomik ki kondisyone lavi yon moun ki pa gen ase resous e ki pa gen mwayen nesesè pou reponn tout bezwen debaz li yo, fizik kou mantal.  Se sa ki fè li pa ka mennen lavi nòmal. Jeneralman, lè yon moun ki pòv konvèti, li konte sou asistans legliz oswa pwochen li. Ebyen, si li pa jwenn, youn nan desizyon li ka pran se kite, sitou si li jwenn yon lòt mwayen pou siviv. Sepandan, se pa tout moun ki pòv ki kite Kris menm jan se pa tout moun rich ki p ap sèvi Bondye. Kèlkeswa koz povrete a ak mank asistans pou yon pòv, pwoblèm ekonomik se youn nan rezon ki fè anpil moun kite legliz.

        5.      MALADI

 Kisa, atò, ki va fè nou pèdi renmen Kris la gen pou nou an? Soufrans ka fè nou sa? (Women 8.35)

Lè sante ou aletere, ou plis ap chache gerizon. Si ou pa gen konfyans Bondye ka geri ou oswa maladi pa vle di ou pa sove, li fasil pou kite legliz. Poutan, anpil moun ki t ap sèvi Bondye te malad, apot Pòl se yon egzanp e gen anpil moun ou konnen ki se lidè men k ap soufri anba yon maladi. Malerezman, nan chache gerizon, yon legliz lokal ka pèdi yon manm li si li pa gen fidèl pou priye pou sa (Jak 5.16).

        6.      PWOBLÈM FAMILYAL

Benediksyon pou moun ki anba pèsekisyon lè y ap fè sa Bondye mande, paske peyi Wa ki nan syèl la, se pou yo li ye (Matye 5.10).

Nan kesyon maryaj, yon konjwen ka lakoz yon lòt kite legliz. Kèk egzanp se enfidelite, vyolans ak iresponsablite ki ka kreye konfli ki vin debouche sou sanksyon. Akoz pwoblèm ekonomik yo ki karakterize povrete yon kretyen, yon jèn ka rankontre anpil difikilte lakay li soti nan chanjman konsepsyon li, pase nan atitid li rive nan desizyon l ap pran ki ka kreye fristasyon. Pakont, nan peyi ki bay tout sitwayen opòtinite, pwoblèm familyal ka pa yon koz majè.

        7.      SANKSYON

Si yon moun pa swiv lòd mwen bay nan lèt sa a, make li. Piga pesonn gen okenn rapò avè l, pou l sa wont (2 Tesalonisyen 3.14).

Nòmalman, objektif sanksyon pa pou mete yon manm deyò legliz. Se pou korije li. Konsa, tout sanksyon ki vize eksklizyon yon manm nan yon asanble pa evanjelik. Domaj, fason anpil ladan yo fèt okazyone sa. Dèfwa tou, se manm ki sanksyone a ki pa dakò koreksyon an e ki deside chanje legliz lokal oswa kite nèt.

        8.      ESKANDAL

Se pou nou viv yon jan pou nou pa bay ni jwif yo, ni moun ki pa jwif yo, ni legliz Bondye a okazyon tonbe nan peche (1 Korent 10.32).

Gen moun ki kwè se nan dènye jou sa yo gen eskandal legliz. Tout moun bezwen konprann depi aprè Adana k Èv te fin peche, se tout sa ki egziste sou latè ki gen men lòm sou li ki ka eskandalize sof pou kèk ka Bondye epanye. Genyen ki kwè tout tout lidè legliz aksepte eskandal yo. Nan legliz Korent, Pòl te denonse yon peche li te estime menm sila ki p ap sèvi Bondye p ap fè (1 Korent 5.1-5). Depi plizyè moun ap viv ansanm, yon pawòl oswa yon konduit ka toujou koze eskandal. De danje pou yon kwayan evite se konplisite li ak desizyon l ap pran akoz de sa. Malerezman, kite se youn.

        9.      DESEPSYON

Pa kite pesonn pase ou nan betiz paske ou twò jèn. Men, se pou ou tounen yon egzanp pou moun ki kwè yo, nan jan ou pale, nan jan ou mennen tèt ou, nan jan ou gen renmen, nan jan ou gen konfyans, nan jan w ap mennen yon lavi ki dakò ak volonte Bondye (1 Timote 4.12).

Yon kwayan, lidè ou pa, dwe yon modèl. Antanke kwayan, li se yon limyè k ap klere e lidèchip li se yon pouvwa pou l gide. Nan nenpòt sans la, yon sèvitè Bondye oblije modèl nan tout egzistans li. Li ka fè erè men li pa ka pwofite enpèfeksyon li pou li imajine enjistis l ap fè pa gen enpak sou asanble li e menm nan sosyete a. Pou di vre, gen anpil moun sensè ki antre legliz pou sèvi Bondye. Yon frè malentansyone, yon sè endisipline, yon zen lakoz li chite.

        10.  KONFLI

Lè yonn rete li di: Mwen menm, mwen se moun Pòl; yon lòt: Mwen se moun Apolòs, èske se pa tankou moun lemonn n ap pale? (1 Korent 3.6).

Fanatis, ipokrizi ak perèz pou laverite se twa nan rezon ki lakoz konfli nan legliz lokal yo. Asireman, manm ki enplike yo pa panse sou konsekans konfli sa yo. Yo plis kontante yo regle kont yo piblik oswa prive nan lespri Bondye ap ba yo rezon: enpansab! Depi gen konfli ki pa ka rezoud, p ap ka gen antant, ò se kote ki gen antant Bondye fè pouvwa li, benediksyon li ak prezans li manifeste ( Matye 18.19-20). Divizyon kreye konfizyon ak enkoreyans ki akouche dekourajman. Se la anpil moun ka jwenn okazyon pou kite legliz li.

Kisa ki ka fè ou kite ?

Asireman, gen plizyè lòt rezon ki ka fè yon moun kite yon asanble. Fin site yo difisil e li t ap rann tèks sa a long. Men, sa ki sèten, yon kretyen ka kite yon legliz lokal, li p ap janm kite Kris si nan tan lontan Bondye te rete nan yon tanp, granmesi Jezi ki te vin mouri, li rete nan tout moun ki kwè nan li (Jan 14.16 ; Ebre 9.24).

Si ou te kite legliz pou youn nan rezon sa yo osinon lòt, pa rete deyò nan lespri Bondye ap sove ou paske ou te gen rezon. Sa ki pi enpòtan se rejwenn yon fanmi kretyen k ap ede ou konnen, konprann levanjil pou ou ka grandi nan lafwa epi jwenn matirite ou.

Si ou te gen entansyon kite kote w ap pèsevere a, panse yon lòt fwa avan pou ou konnen si se pa pi move desizyon w ap pran.

Ou menm ki se lidè legliz, reli tout rezon sa yo, etidye yo avèk manm yo, gade ou menm si pa gen youn ki enplike ou pou ou korije sa. Paske, se pa moun ki soti ki andanje sèlman. Sila ki lakoz li soti a ka koupab tou.

Ou menm ki pa vle antre pou tout rezon sa yo ak lòt, konnen pa gen yon legliz k ap ka satisfè tout sa ou bezwen pou sèvi Bondye. Petèt, si ou chache Bondye, li ka itilize ou pou konble vid ki manke a paske li pa gade pèsonn sou aparans pou itilize yo (Travay 10.34).

Jérôme Dorsonne Emerson

Foto: www.benoit-et-moi.fr

#87| Ki rapò kretyen avèk travay?

Anpil moun kwè legliz pa ankouraje kretyen travay. Pou yo, lidè yo plis preche reziyasyon epi manipile yo pou jwenn lajan. Yon ansèyman konsa pa konfòm avèk levanjil ki fè rekòmandasyon sa yo:

Nou sonje lè m te lakay nou, mwen te di nou: moun ki pa travay pa gen dwa manje non plis. (2 Tesalonik 3.10)

Mwen moutre nou ki jan pou n travay di nan tou sa n ap fè pou n ka ede pi fèb yo, pou nou toujou sonje pawòl Seyè a ki te di ak pwòp bouch li: Gen plis benediksyon pou moun k ap bay pase pou moun k ap resevwa. (Travay 20.35)

Se pou moun ki te konn vòlò sispann vòlò. Okontrè, se pou l travay di ak men l san fè move konbinezon, pou l sa gen dekwa bay moun ki nan bezwen. (Efezyen 4.28)

Lafwa yon moun gen nan Bondye pa dispanse li de travay. Okontrè, travay te la avan e aprè peche. 

Seyè a, Bondye a, pran nonm lan, li mete l nan jaden Edenn lan pou l travay li, pou l pran swen l. (Jenèz 2.15)

Apre sa li di Adan. Ou koute pawòl madanm ou, pa vre! Ou manje fwi pyebwa mwen te ba ou lòd pa manje a. Poutèt sa ou fè a, m ap madichonnen tè a. W a gen pou travay di toutan pou fè tè a bay sa ou bezwen pou viv. (Jenèz 3.17)

Apot Pòl ale pi lwen nan ansèyman li yo pou montre enpòtans travay:

Si yon moun pa pran swen fanmi l, sitou moun k ap viv lakay li, li nye konfyans li nan Bondye, li pi mal pase yon moun ki pa janm kwè nan Bondye. (1 Timote 5.8)

Yon kretyen ki pa vle travay sou pretèks li gen lafwa se yon wont pou levanjil Kris la ak tout kretyen k ap fè tout kalite sakrifis pou pran swen moun ki sou responsablite yo.

Jerome Dorsonne Emerson

Foto/Le National 

https://www.lenational.org/post_article.php?pol=2212