Ou sèten ou se kretyen epi ou sove. Men yon erè pase, fiyanse ou/ou ansent, komite legliz deside marye nou alòske nou youn poko gen yon metye e nou tout de lakay paran nou. Èske ou t ap dakò? Si ui oswa non, poukisa?
Legliz pa t ap ka
enpoze sou mwen pou m marye paske se konsantman m ak mennaj la, m pa t ko menm
fiyanse ak li ki pou mande legliz maryaj. Kò m m pa ko prè m pa t ap dakò.
Néricile
Non, m pa t ap dakò
marye paske maryaj pa repare peche e maryaj se konsantman 2 moun yo. M ap pran sanksyon
lidè m epi lè m prè pou m marye a m a fè sa.
Loveda
Mwen pa t ap dakò, paske aprè maryaj la nou pral travèse nan
yon lot etap, youn pa ka rete ap gade lòt nan je. N ap bezwen lajan pou fonksyone,
nou t ap pran desizyon pou chache sòti tèt nou epi genyen yon bagay nan men nou
avèk volonte Bondye wè nou genyen li t ap ede nou sòti ladan. Paske lè ou marye ou dwe pran swen fanmi an se sa Bib la di.
Wisline
Pou mwen menm, se yon vrè sèvitè mwen ye, mwen konnen byen sa
Bib la di sou kesyon peche a. Mwen konnen byen ki rezilta peche bay. Malè a
deja fèt, pouvike mwen pa konnen ki lè lanmò ap frape pòt kay mwen, m ap marye
bay !! Si w pa dakò sa rete nan wòl ou zanmi, oubyen mande Bondye
gras pou fè menm jan avèk Jozèf.
Phanès
Si youn nan nou
pare, m ap dakò. Nan ka kontrè, mwen pa t ap dakò paske Bib la di klè fòk ou ka
pran swen fanmi an.
Jocelyn
Pou mwen menm, pa gen moun ki t ap vin fòse m marye paske si
responsab fwaye pa jwèt epi vin jwenn pitit tonbe ankò, bon tèt chaje nèt, m pa
t ap marye..
Chrisline
Pou mwen menm, m ta rive nan yon ka konsa pou legliz ta di l
ap marye nou, m pa t ap dakò paske nou fiyanse deja se sèten ap gen yon dat ki
te fikse pou nou marye e kòm se yon erè paske erè an se nan nati nou li ye, nou
menm lòm nou pa ka evite sa. Nenpòt moman nou ka fè yon erè men se pa erè nou
fè a ki pou fè legliz di li pral kouri marye nou. Mwen
menm ak fiyanse m, nou youn pa pa fè se efò n ap fè. Nan ka sa legliz dwe
chèche premyèman: ki koz ki fè erè sa rive? M p ap kouri di lachè fèb, men nan
ka sa li kapab se kenbe nou pa t ka kenbe ki fè nou rive jis la nan ansent. M
pa t ap dakò legliz marye nou paske fòk gen konsantman. Se vre nou te konsanti
pou fiyanse epi fikse jou maryaj lan, kategorikman m pa t ap dakò marye tout tan
jou maryaj la pa rive. Pou fini, jan de ka sa yo mande anpil anpil matirite pou
jere yo. Job
Mwen pa t ap dakò marye paske m pa gen metye ni fi an pa gen
metye. Lè nou fi n marye kisa n pral manje, kay chè, manje chè lekòl menm se pa
pale. Anplis, depi ou fin marye, tout moun konnen w granmoun ou
pral degaje w pou kont ou. Si w te kay paran, menm si se yon mayi blan ki kuit
ou t ap gen espwa. Men ou kouri marye san pwofesyon, san travay. Ou ka menm rive
pa jui maryaj ou an ou byen. Fanmi an ka menm fè l pran yon lòt moun, boum! maryaj kraze
plat!
Marc
Brezil
Non mwen pa t ap
dakò paske aprè maryaj la se pa legliz lan li pral pran lòt responsabilite yo
pou mwen. E si m pa t deside marye legliz pa ka fòse m paske sak rive a gentan
rive.
Lamage
Selon mwen menm m
pa t ap dakò. Sof si responsab legliz la. T ap tyeke yon djòb pou mwen, menm si se pa
pou nou tou 2 men fòk yon manb legliz la ka an mezi fè m jwenn yon dyòb. Anplis
lwe kay pou mwen, pandan yon ane, rès ane yo travay la ta peye l pou Mwen.
Paske yo plis sou marye moun olye yo ede moun jwenn yon kote pou asire kèk
depans. Eeee lekòl ti moun sa aaaaa se gwo koze wi. E fòk yo ta byen peye m
atan nan djòb sa a wi.
Gélème
Depi ou dakò renmen
oubyen fiyanse, sa vle di ou te gentan pare ak tout bagay ki ta parèt. Fiyansay
se pre-maryaj. Fòk moun nan te gentan konnen li pa t ap fè tout tan yo la kay
paran an tou. Yon lè, fòk yo kite lakay paran yo. Malgre se pa nan move
kondisyon konsa moun nan ta vle, li rive sa a pa enposib se yon obligasyon fòk
ou marye nan nenpot fason l ye a.
Nadege
Mwen menm mwen t ap
marye, paske konsyaman tout kretyen konnen sitou lè w pa pare ou pa dwe fè
eksè. Paske paran yo toujou di : "gaz ak dife fraji l anpil”. Si m pa swiv
konsèy parantal yo, ni konsèy biblik yo, mwen tou konnen mizè m pral kòmanse. Konsa
tou, mwen te gendwa pa asepte marye. Si paran m vle ede m, mwen t ap mande l peye
lekòl pwofesyonèl pou mwen epi fiti mari m t ap fè menm jan an. Aprè sa nou t ap
marye.
Wideline
Se konsantman de (2) moun
ki fè yon maryaj. Legliz ka pwopoze m maryaj selon sa Bib la di men se
mwen menm ak fiyanse m ki pou deside si n ap marye paske nou p ap fè anyen e se
pa maryaj la k ap efase peche a. Sa ki pi enpòtan se rekonèt ou peche. Legliz
ka ban m konsèy men yo pa ka fòse m
marye. Si yo ban m kay m ap marye, men si se yon pati nan maryaj
la y ap kouvri, m ap reflechi avan mwen deside.
Jacqueline
La a gen 2 ka nan
kesyon sa a: Anndan legliz yo, yo pa vle mo renmen an se fiyanse yo konnen
tandiske fiyanse a se yon lòt bagay. Si se fiyanse, m pa wè rezon pou de (2)
moun al fiyanse san yo pa ko gen yon bagay nan men yo. Si w pwomèt maryaj, ou
pa gen anyen nan men w, kisa ou pral fè pou viv ? Pou mwen, menmlè m ta
fiyanse, si m pa ko fin prè pou maryaj, m p ap tande legliz pou m kouri al marye.
Ou ka fin marye tou, fi a vin nan akouchman, ou pa ka pran swen li. Tout sa w
te genyen pase nan maryaj paske ou te fè l brid soukou.
Job
