#96| 10/10 : yon metòd pou li nan Bib la chak jou

Konbyen ou te deside li nan Bib la chak jou epi ou rive nan wout ou dekouraje ? Pafwa, ou konn pa menm kòmanse jis ou pa janm gen lide a ankò. Ebyen, 10 sou 10 se yon metòd k ap ede ou, motive ou, raple ou chak jou pou li yon chapit. Li gratis. Pandan 260 jou, w ap li tout 27 liv nan Nouvo Testaman an.

Li fasil pou antre ak kòmanse. Men sa ou dwe konnen :

1.      W ap ekri responsab yo sou Whatsapp nan 4075-6250. W ap tou jwenn yon mesaj otomatik ki gen yon lyen (ekriti ble). Peze sou li pou w ka ranpli fòm nan.

2.      Responsab yo ap ajoute ou nan yon gwoup Whatsapp ki gen nouvo enskri. Se la w ap jwenn enfòmasyon pou konnen metòd la plis.

Men kèk prensip w ap bezwen respekte pou benefisye metòd la.

1. 10 sou 10 tou gen yon kalandriye lekti ki divize nan 26 pati. Se pa ou menm k ap chwazi liv w ap li.

2. Ou dwe make pwen chak jou soti 4trè nan maten rive 9vè nan aswè.

3. W ap nan yon gwoup fanmi ki gen tout lektè yo. Se la w ap resevwa mesaj sou pwogram nan, lyen pou li atik evanjelik ak bon jan enfòmasyon ak fòmasyon k ap itil ou nan tout nivo: sosyal, edikatif, santimantal, familyal…

4. Ou pa dwe pataje pyès mesaj nan gwoup lekti a aprè ou fin make pwen.

Kisa “Make pwen” an ye?

Ou make pwen chak fwa ou fin li chapit jounen an selon kalandriye a epi ou chwazi yon vèsè pou pataje nan gwoup lekti ou ye a. Ou ka make pwen nan plizyè lang ou vle: kreyòl, anglè, fransè ak espanyòl.

Pa gen eskiz!

Plizyè pwoblèm ka anpeche ou make pwen : chaj, siyal, oubli oswa neglijans. Sa ki pi enpòtan se toujou fè tout efò posib pou ou make pwen chak jou. Pa gen eskiz !

Ou vle kòmanse pwosesis la koulye a ? Peze la pou w enskri:Enskripsyon nan 10/10

Jerome Dorsonne Emerson

Pa janm sispann fè byen

 

« Se poutèt sa, moun ki pa fè byen li konnen li gen pou l fè a, li fè peche » (Jak 4.17)

Nan katriyèm chapit liv Jak la, li pale sou konvwatiz ak yon seri de lit ki genyen nan legliz Bondye a k ap fin kraze li. Pou Jak, rezon yo se paske nou youn pa sispann denigre lòt, nou vle pou se dezi pa nou ki satisfè. Depi nou genyen, zafè ki gade lòt la.

Ou peche lè ou pa fè sa lalwa mande, se sa apot Jan aprann nou (1 Jan 3.4). 

Jeneralman, plis moun kwè peche se fè oswa di sa ki mal. Se sa ki parèt lèd nan sosyete a tankou tiye, vòlè, fè adiltè, divòse, kòripsyon, elatriye. Se vre. Peche sa yo se peche pa komisyon. Sa vle di, se mal ou dispoze fè alòske ou konnen sa pa bon. Ou konnen manti pa bon, ou manti kanmenm. Konsyans ou repwoche ou paske ou te konnen. Ou santi ou koupab, ou bezwen mande padon pou w santi ou soulaje.

Men nan Jak 4.17, otè a pale sou peche pa omisyon ki se lè ou pa vle fè sa pawòl Bondye a anseye. Nou ka pran egzanp bon samariten an pou eksplike kalite peche sa a. Yon prèt ak yon levi ap pase nan yon chemen, li wè yon nonm yo te bat twaka mò. Yo tou de janbe lòt bò wout la pou evite kò a ak pote li sekou. Li pa t ko mouri. Se yon samariten ki t ap fè wout la ki pran swen nonm lan, mennen li nan yon lotèl, peye kòb nan pòch li pou sove li. Jezi mande kilès nan twa moun sa yo ki te montre li se frè nonm lan. Direktè lalwa a di se bon samariten an. Jezi di li :« Ale, fè menm bagay la tou ». (Lik 10.30-37). 

Kòman ou konn aji ?

Yon prèt ak yon Levi se de moun ki konn lalwa, petèt menm jan ak ou menm ki konn anpil vèsè, ki diplome nan teoloji oswa ki konn swiv seminè biblik ak konferans. Kisa ou konn fè lè ou wè yon pwochen nan nesesite ? Si ou wè yon moun ou p konnen grangou, èske w ap ba li manje oswa w ap di li: gade yon moun ki pa manje depi maten ! Daprè sa Jezi te di nan Lik 10.37 la, ou dwe nouri moun sa a. Sinon, ou peche paske ou pa fè yon byen. 

Kote kritik yo pi fasil

Li pi fasil pou nou wè epi kritike yon lòt ki pa genyen. Se tankou malè yon lot plis atire atansyon nou pase bonè li. Se sa ki pa bon an ki souvan soulve kolè nou, raple nou sa levanjil mande men li difisil pou nou fè sa ki nesesè a. Anpil fwa, se manke lajan ki fè yon pwochen pa bati yon bon kay, li pa achte yon bon rad, yon bon soulye. Se kont volonte li. Kisa ou ka fè antanke kretyen nan yon ka konsa? 

Ka nonm nan te touche kè samariten an

Konpasyon se yon santiman ki pouse ou aji nan malè yon lòt moun. Se sa ki fè yo rele moun k ap fè byen «papa bon kè». Menm jan ak samariten an, kalite moun sa yo renmen reyaji pou ede pwochen yo ki nan nesesite. Chak fwa ou konnen yon bezwen pou w satisfè, ou pa fè l, se tankou sa pa touche kè w. Menm jan ak prèt ak Levi a, sa pa regade ou. Kite mele ou ! Sepandan, si ou pa kapab, ou ka pran pitye pou li oswa lapriyè pou li.

Eskiz fè nou peche anpil

«Fè byen se frèt» se youn nan pwovèb ayisyen itilize anpil pou jistifye mank konpasyon yo. Pwiske moun ou fè byen an ka vin ènmi ou, trèt ou epi pafwa menm tiye ou, ou bouche kè ou pou li. Levanjil pa aprann sa. Bousòl yon kretyen se Bib la, se pa pwovèb yon peyi. Li pa ka aprann pou fè byen epi pou li kite prensip monn lan anpeche li. Dayè, nan pa vle fè byen ak pwochen nou, se tout sitwayen yo, kretyen ou pa, ki sibi konsekans yo. Timoun ou pa vle ede jodi a ka tounen yon bandi k ap ba ou pwoblèm demen. Kidonk, ou pa dwe chache eskiz pou pa ede li nan nivo ou kapab. 

Koute sa Jezi, mèt w ap sèvi jodi a, gen pou di nan peryòd jijman nasyon yo : « Mwen te grangou, nou ban m manje. Mwen te swaf dlo, nou ban m bwè. Mwen te lwen peyi m, nou te resevwa m lakay nou. Mwen te touni, nou te ban m rad. Mwen te malad, nou pran swen m. Mwen te nan prizon, nou vin wè m. » (Matye 25.35-36). 

Moun ki te fè byen sa yo pral poze li kesyon sou kilè yo te fè sa, koute sa li va reponn yo: «Chak fwa nou te fè sa pou youn nan pi piti pami frè m yo, se pou mwen nou te fè li. » (Matye 25.40). Sa montre nou enpòtans fè byen sitou avèk moun ki pa ka remèt nou. Konsyans nou pa dwe anpè lè nou wè yon lòt nan bezwen. 

Yon leson pou jounen an !

Pa janm sispann fè byen !

Ou ka gen mil rezon pou ou pa fè sa ki byen nan avantaj yon sè, yon frè, yon enkoni, yon ènmi, yon zanmi. Rezon sa yo se pou ou men Bib la mande pou ou pa neglije fè byen : Pa janm bouke fè byen. Paske, si nou pa dekouraje, n a rekòlte lè lè a va rive. (Galat 6.9).

Jérôme Dorsonne Emerson