#99 | Sis rezon pou ou pa doute sou sali ou

 

Doute ou sove se yon bagay nòmal men li pa enpòtan. Si nan kèk ka, li ka ede ou gen plis konfyans ak dekouvri fo doktrin, nan ka sali ou, li pa pote pyès avantaj.. Men kèk rezon ki ka ede ou konprann sa.

1.      Dout se yon sousi

Jezi te poze disip li yo ki t ap doute kesyon sa a : ” Kilès nan nou, afòs li fè tèt li travay (enkyete), kapab mete kèk ane an plis sou lavi l?” Nan pasaj sa a, Jezi ap pale sou lavi fizik e non etènèl. Leson nou bezwen tire ladan se rezilta a : sa p ap itil nou anyen. Konsa, pou anpil sousi w ap fè, l ap pote plis enkyetid. Konsa, li pa enpòtan pou ou doute sou sali ou.

2.      Dout pa ka sove ou

Si ou pa ka mete yon ane sou lavi fizik ou ki ta depann de pridans ak lasante, li pi difisil pou lavi ki p ap janm fini ou jwenn yon sèl fwa a. Dayè, pou sove ou, Bondye pa mande ou doute, li mande ou kwè nan li. Fè li konfyans. Si w ap doute, se pa delivrans li bay la w ap chache. Anpil fwa, se peche, inyorans ak lojik ki fè nou doute sou pwomès Bondye fè nou. Gen moun ki pa vle dakò sove se yon gras, yo bezwen ede Bondye sove yo.

3.      Bondye pa janm bay manti

Pòl t ap t ap lapriyè pou travay Bondye t ap fè nan kretyen lavil Filip yo lè li te di : « Mwen sèten Bondye ki te kòmanse bon travay sa a nan nou, li gen pou l kontinye l jouk li va fini l nèt, lè jou Jezikri a va rive » (Filipyen 1.6). Pòl pa t doute sou pouvwa Bondye pou kontinye travay li nan lavi yon kretyen. Se sa ki fè, tout sa yon kretyen ka fè pa soti nan li, se pou glwa Bondye (Efezyen 2.10).

4.      Sali ou se yon pwomès

Se pa t ou menm ki te mande Bondye sove ou, se li menm ki te deside fè sa lè li te voye Jezi, Sèl Pitit li a, vin mouri sou kwa a pou ou (Jan 3.16). Lè Bondye pwomèt ou kichòy, se pa sousi w ap fè k ap fè ou jwenn li, se konfyans ou gen nan li. Otè liv Ebre a di konsa : « An n kenbe espwa nou genyen an byen fèm. Paske, nou mèt sèten, Bondye ap kenbe pwomès li” (Ebre 10.23). Si se Jezi ki sovè ou, se li menm ki te di l ap vin chache ou vivan oswa resisite, se sou li pou konte e non sou yon lòt moun ki ta vle fè ou pèdi lespwa.

5.      Doute pa vle di ou pa sove

Nonsèlman, doute pa ka fè ou sove, li pa ka desove ou nonplis. Toujou sonje pwomès pou sove ou ak pou beni ou pa menm. Nan Jak 1.5-8, dout ka anpeche ou jwenn sajès (oswa nenpòt demann) nan lapriyè men lapriyè pa kondisyon ni mwayen pou ou sove. Kidonk, lafwa pou ou sove diferan de lafwa pou Bondye reponn rekèt ou yo. Pa melanje yo. Youn se yon mwa pou jwenn (Efezyen 2.8-9) tandike lòt la se yon kondisyon pou jwenn (Matye 21.22).

6.      Se pa sa Bondye mande

Bib la di : « Nenpòt moun ki mete konfyans yo nan li p ap janm soti wont » (Women 10.11). Li di ankò : « Pa kite bagay sa yo toumante nou. Mete konfyans nou nan Bondye, mete konfyans nou nan mwen tou» (Jan 14.1). Plis w ap mete konfyans ou nan Bondye, se plis w ap grandi espirityèlman. Si w ap fè sa Bondye pa mande a, rezilta ou jwenn nan pa soti nan li.

Se pou ou kwè ou sove nenpòt sa ki ta rive. Pa janm bliye se nanm ou Jezi te sove (Matye 26.16). Se pa kò ou. Konsa, menmsi ou ta nan nenpòt sikonstans kote kò ou ka peri, nanm ou sove pou tout tan. Amèn !

Jérôme Dorsonne Emerson

#98| Damou pa sifi pou yon maryaj kè kontan

 

Gen anpil kritè selibatè yo egzije pou marye ki plis antrave siksè nan fwaye yo pou senp rezon kritè sa yo pa chita sou eksperyans ak reyalite maryaj la. Se nan lide sa a mwen envite ou li tèks sa a ki nan liv Gary Chapman nan: CE QUE J'AURAIS AIMÉ SAVOIR AVANT DE MARIER. 

« Si sèlman m te konnen damou pa t sifi pou konstui yon maryaj ki bay kè kontan»

Mwen te dwe wè sa, men nan moman sa a, mwen pa t konprann. Mwen pa t janm li liv sou maryaj, kidonk mwen te lwen reyalite a. Mwen te jis konnen mwen te gen santiman pou Kawolin epi mwen te konnen santiman sa yo pa t menm jan ak santiman m te genyen pou lòf fi. 

Lè nou youn te konn ap anbrase lòt, mwen te gen lenpresyon m t ap vole, epi lè m te vin wè li ankò aprè yon bon tan, mwen te gen anpil frison. Tout bagay te fè m plezi lakay li : nan zye m, li te bèl, fason li te abiye, fason li te konn pale, jan li te konn mache. Sitou bèl grenn zye mawon li yo, mwen te renmen yo anpil. 

Mwen te alèz anpil avèk manman li; m te menm bay tèt mwen pou pentire kay li yon fwa. M te prè pou m fè tout bagay pou m fè fi sa a konnen konbyen mwen te renmen li. Mwen pa t ka imajine yon jèn fanm te ka pi bèl pase li. E mwen panse li te renmen mwen menm jan m te renmen li an.

Paske nou te byen dispoze parapò ak santiman sa yo, nou te sèten nou youn t ap ka fè kè lòt kontan pou lavi. Sepandan, nou te vin wè sa nou te santi yo pa t reyèl : aprè sis mwa maryaj, santiman si womantik ki t ap mennen nou nan yon eta san parèy te vole gagè. Sa ki te vin pran plas yo te : doulè, kòlè, desepsyon ak yon tristès anmè kou fyèl. 

Ni li menm ni mwen menm pa t panse bagay yo ta pral pase konsa lè nou te damou tankou moun fou. Nou te panse ti jès nou yo ak sa nou te santi youn pou lòt t ap rete nan fwaye a pou tout tan. 

Depi lè m ap konseye koup ki vle marye m rann mwen kont majorite ladan yo gen menm konpreyansyon an, ki trè limite, de kisa « damou » ye. Nan premye fwa m ap rankontre yon koup, mwen poze yo kesyon sa a souvan: «Poukisa ou vle marye ? ». E yo tout reponn mwen prèske menm jan : « Paske nou youn renmen lòt». 

…Jodi a, avèk rekil ak eksperyans, mwen panse mwen konnen. Men, m doute jèn fiyanse sa yo konnen. Mwen pè pou yo pa konprann renmen menm jan Kawolin ak mwen te konprann li. Epi mwen konnen koulye a damou yon moun pa sifi pou yo konstui yon maryaj ki gen kè kontan.  

Ce que j’aurais aimé savoir avant de me marier

Gary Chapman

Chapitre 1, p11-12

Tradiksyon kreyòl : Jérôme D. Emerson