#101| Yon vrè kretyen pa dwe inyore lalwa peyi li

[....Li pa fè sans pou di ou se kretyen, ou pa pral tribinal ak moun. Premyeman, si se trennen yo trennen ou devan tribinal la, ou oblije ale. Yo te trennen Jezi devan tribinal, lè l te rive li pa t mande ki dye ki patwone tanp jistis Pilate (Pilat) la ak tanp jistis Herode (Ewod) la. Dezyèmman, si se yon dosye ki gen karaktè krim, ou pa ka regle l nan tèt kole. Ka sa a depase nou. Se otorite Leta yo ki dwe anbrase chay la.

Ki kretyen ki ka fè pitit li epi pou li pran yon fèy papye pou li fè batistè oubyen aknesans pou li ak pwòp men l ? Ki moun ki bezwen yon kat elektoral epi pou se yon ti bout katon li pran pou li fè afè l ? Osinon li al jwenn pastè legliz li pou fè l pou li, aprèsa mete so legliz la sou li pou l ka valab ? Se pa kay Leta nou ale lè nou bezwen:

● Akdenesans?

● Kat idantifikasyon nasyonal?

● Matrikil?

● Fòmilè “ak maryaj”?

● Sètifika medikal?

● Paspò?

● Papye tè?

Poukisa nan lòt inisyativ yo se pa Leta nou jwenn ? Se konnen nou pa t konnen si se chemen Leta pou nou te pran pou biznis ? Se konnen nou pa t konnen si se chemen Leta pou nou te pran lè n ap prete moun kòb?

Pa fè kwayans nou tounen tòtèm espirityèl pou anpeche nou jwi dwa nou nan sosyete a.

E nou ka menm pran prizon « mal » nan inyore oubyen neglije devwa nou oubyen nan monte sou dwa lòt moun, paske tout moun dwe konnen lalwa, an fransè « Nul n’est censé ignorer la loi ».

Estervinson JEAN LOUIS

Kretyen konn lalwa an Ayiti

Editions PETRA

Pastè Estervinson ap siyen liv sa a samdi 27 me 2023 nan STELA nan Senmak ak dimanch 28 me nan COMPLEXE ÉDUCATIF ALPHA. Ou ka achte yon kay prevant 800 goud pou w benefisye 200 goud. Rele oswa WhatsApp Editions PETRA nan 36396642.

#100| Ki enpòtans kwayans ou?

Pi gwo obstak ki ta genyen nan sèvi Bondye, se kwayans. Li fondamantal, li omniprezan nan lavi ou sou latè e li jwe wòl ou konn pa imajine. Se li ki detèmine panse ou, konpòtman w, aksyon ou ak pawòl ou. 

Chak fwa yon moun oblije enpoze ou sa pou kwè ak fè, ou ta dwe reflechi sou enpòtans libète ou. Kòman mwen fè di mwen kwè nan Jezi epi pou se yon lòt moun k ap di m sa pou mwen fè san rete?  

Ki enpòtans kwayans mwen lè mwen pa ka fè sa mwen kwè? Se mwen ki te deside sèvi Bondye, m te aksepte konvèti e batize, poukisa toujou gen yon moun k ap siveye m, dirije m, jiskaske yo sanksyone m pou yon fot m te dwe evite? 

Trè souvan, konpòtman mwen konn pi grav pase yon moun ki poko konvèti. Olye pou m fè sa Bondye mande m fè, m ap gade sa lòt moun ap fè pou m pa fè l. Mwen gen Bib la men m pa gen tan pou li l. Bondye la ap tann mwen men m pa jwenn tan pou priye li. 

Poukisa mwen kwè nan Jezi? Ki enpòtans kwayans mwen si tout tan se lòt moun k ap di m sa pou m fè? 

Ki enpòtans kwayans mwen? 

Jerome Dorsonne Emerson