3. Ou mande PADON
Nan konfesyon David la (Sòm 51.18), li te mande Bondye anpil bagay:
1. gen pitye pou mwen,
2. efase tout sa mwen fè ki mal,
3. lave mwen
4. foubi mwen
5. netwaye mwen
6. fè mwen tande pawòl ki pou fè kè mwen kontan,
7. pa kite move lide nan tèt mwen
8. pa voye mwen jete,
9. pa retire Sentespri w nan mwen
10. pa kite yo tire revanj sou mwen, elatriye.
Lè w regrèt peche w fè, gen 3 bagay ou pa eseye fè :
1. ou pa dwe fè awogans,
2. chache eskiz
3. efize pinisyon.
Se moman pou w lapriyè pou mande Bondye gras li, pou li restore w epi kontinye sèvi avèk w. David te gen anpil pouvwa lè l t ap fè peche. Li pa t mete l nan plas Ouri ki te ka sipliye li pou pa voye l devan lame a pou mouri, ni li pa t imajine kòman li t ap reyaji si l ta konnen madanm li twonpe l. Li t ap pwofite pouvwa li, poutan lè li vin rekonèt tò li, li te vin tankou yon timoun. Sinon, si li te kite ògèy pran tèt li tankou Sayil, ka li te ka pi grav.
Mande padon egzije imilite, souplès ak brizman kè. Se sa k fè si w pa ka desann ou devan Bondye lè w peche, ou p ap ka jwenn padon li nonplis.
Jerome Dorsonne Emerson
