4. Ou inyore konsekans peche a
Gen kretyen ki byen konnen sa l ap fè a pa bon e li konnen sa k ap tann li kòm konsekans men sa pa anpeche li fè l. Se nan ka sa a anpil sèvitè Bondye te pran. Nou gen 4 nan egzanp ki pi popilè yo :
1. Adan ak Èv devan fwi a,
2. David devan Batcheba,
3. Amnon devan Tama,
4. Ananyas ak Safira devan apot yo
Lè w panse ou pa gen anyen w ap sibi akoz yon peche, ou tante plizyè bagay :
1) ou vle twonpe Bondye (sa w p ap janm ka fè),
2) ou vle pase pou yon kretyen espesyal (pèsonn pa konsa devan Bondye sinon nan sanntifikasyon e Bondye pa gade pèsonn sou figi),
3) ou minimize pouvwa Bondye.
Krentif pou Bondye (Pwovèb 1.7) ta dwe fè w pè fè peche paske li tout kote an menm tan (omniprezan). Si ou kwè sa tout bon, kwè l ap gade ou tou. Domaj, gen kretyen ki chwazi fè peche a jis pou l ka fè lòt moun plezi oswa montre li pa diferan.
Trè souvan, santiman sa kraze ministè anpil lidè. Se pa paske tout moun ap fè e di yon bagay ki fè l bon. Kou di pastè Marcello, se pa paske tout moun ap pratike yon manti ki fè l vin verite. Anpil fwa, sa tout moun ap fè yo se yo ki pa bon. Vle ale nan menm sans ak tout moun se pi gwo pyèj Satan ka mete pou fè w tonbe nan peche.
Nan inyore konsekans peche, Ananyas ak Safira te jwenn lanmò.
Pa janm bliye sa ! Bondye pa chanje. Sèl sa ki ka sove w lè w fè peche, se repanti. Sinon, se kòlè li k ap tonbe sou ou paske refize repanti pa ba w dwa gen avoka nan dènye jou jijman an.
Jerome Dorsonne Emerson
