Nou tout ap chache viv byen. Paske nou soti nan Adan ak Èv, je nou toujou sote sou sa ki bon pou manje, sa ki bèl e sa ki ka fè je nou louvri (Jenèz 3.6). Se sa k ap fè n tonbe souvan nan tantasyon an.
Apot Jan te di : « Pa renmen lemond, ni anyen ki soti nan lemond. Si yon moun renmen lemonn, li pa gen renmen pou Papa a nan kè li. Bagay ki soti nan lemond se egzijans lachè, se gwo tantasyon, se lògèy k’ap vire tèt moun lè yo gen anpi byen sou latè » (1 Jan 2.15-16)
Olye pou w ap chache kè kontan nan lemonn kote li posib pou tonbe anba anpriz Satan (1 Jan 5.19), men 4 konsèy nou jwenn nan Sòm 1.1-2 ou ka pratike
1. Pa koute konsèy mechan yo
Yon konsèy se sa yon moun panse li di w ki ka fè w poze yon aksyon. Nan sans sa a, gen bon ak move konsèy. Yon moun ki mechan pa ka ba w bon konsèy. Jezi te di : « Yon nonm ki bon, se bon bagay ase li ka rale soti nan tou sa li genyen ki bon yo. Konsa tou, yon nonm ki mechan, se move bagay ase l ka rale soti nan tou sa li genyen ki move yo » (Matye 12.35) David te di : « Mwen rayi tout moun k ap fè sa ki mal. Mwen pa chita ansanm ak mechan yo » (Som 26.5).
2. Pa swiv egzanp moun k ap fè sa ki mal yo
La a, otè a p ap pale de tout moun antanke pechè, men moun k ap fè tout kalite enjistis. Apot Pòl te di : “Piga nou twonpe tèt nou; move zanmi gate bon levasyon” (1 Korent 15.33). Si Jezi se chemen ki mennen kot Bondye, move zanmi ap mennen ou nan chemen pèdisyon.
3. Pa chita ansanm ak moun k ap pase Bondye nan rizib
Pase moun nan rizib se youn nan siy dènye jou yo (2 Pyè 3.3). Bib la : “ Moun k ap pase moun nan betiz pa renmen moun rale zòrèy yo. Yo pa janm mande moun ki gen bon konprann konsèy”(Pwovèb 15.12). Si ou chita avèk yo, teste sajès ou.
4. Repase lalwa Senyè nan tèt ou
Medite, se reflechi anpil e nan yon fason apwofondi. Se lè ou konsantre ou sou yon pawòl, yon vèsè oubyen yon panse. Youn nan kondisyon pou Jozye te reyisi se te medite pawòl ki nan liv lalwa a lajounen kou lannwit (Jozye 1.8). Izaak te konn medite (Jenèz 24.63). Salomon te di : «Yon moun ki dwat kakile anvan li bay repons. Men mechan yo prese bay move pawòl" (Pwovèb 15.28). Medite pa vle di reflechi sou yon bon sijè puiske ou ka panse pou fè mal : « Li kouche sou kabann li, l ap fè move plan. Li sou yon move pant, li dakò ak tout sa ki mal»(Pwovèb 36.4).
Meditasyon w ap fè chak jou yo pa anven. Ou tankou yon pyebwa yo plante bò kannal: Li donnen lè sezon l rive. Fèy li p ap janm fennen. Tou sa l fè soti byen » (Som 1.3).
Jérôme Dorsonne Emerson
